Read dyu Isirayɛlidenw ka bɔko jɔnya la kitabu 17 Bible Online

Isirayɛlidenw ka bɔko jɔnya la kitabu 17 - dyu bible

Isirayɛlidenw ka bɔko jɔnya la kitabu 17

¹Isirayɛli jama bɛɛ bɔra Sin kongokolon kɔnɔ ka to ka o yaala ka sigi ka kɛɲɛ ni Masaba ka fɔta ye. U tagara sigi Erefidimu. Jii tun te yen ni jama b'a min.

²O la, u ye Musa kɛlɛ, u ko: «Jii d'an ma, an b'a min.» Musa y'u jaabi ko: «Mun na aw b'a fɛ ka ne kɛlɛ? Mun na aw be Masaba darabɔ?»

³Minnɔgɔ gwanna jama na o yɔrɔ la. U tora ka ŋunuŋunu Musa kama k'a fɔ ko: «Mun na i ye an minɛ ka bɔ Ezipiti, k'a to anw, n'an deenw, ani an ka begɛnw bena sa minnɔgɔ bolo?»

⁴Musa kasira Masaba nɔɔ fɛ ko: «Ne ka kan ka mun kɛ jama nin ye? A tora dɔɔni u tun bena ne bon ni kabakuruw ye.»

⁵Masaba ye Musa jaabi ko: «Taga jama ɲafɛ, e ni Isirayɛli cɛkɔrɔba dɔw. I ye Nili baji gosi ni bere min ye, i ka taga n'ale ye i bolo.

⁶Ne bena lɔ i ɲa fara kan *Orɛbu kulu kɔrɔ. I ka fara nin gosi, jii bena bɔ a la, jama ben'a min.» Musa y'a kɛ ten Isirayɛli cɛkɔrɔbaw ɲana.

⁷A y'o yɔrɔ wele ko Masa ani Meriba, bari Isirayɛlidenw ye sɔsɔli kɛ, ani ka Masaba kɔrɔbɔ. U ko: «Masaba b'an cɛma wa, walima a t'an cɛma?»

⁸Amalɛkiw nana Isirayɛlidenw kɛlɛ Erefidimu.

⁹Musa y'a fɔ Zozuwe ye ko: «Cɛɛ dɔw woloma ka taga amalɛkiw kɛlɛ. Sini, ne bena lɔ tintin kan ni Ala ka bere ye n bolo.»

¹⁰Zozuwe ye amalɛkiw kɛlɛ i ko Musa tun y'a fɔ cogo min na. Musa ni Arɔn ani Huri yɛlɛla tintin kan.

¹¹Ni Musa y'a bolo wili tuma min na, Isirayɛlidenw tun be see sɔrɔ. N'a y'a bolo jigi tuma min na, amalɛkiw be see sɔrɔ.

¹²Musa bolow jara tuma min na, u ye kabakuru ta k'o bila a kɔrɔ, a sigira o kan. Arɔn ni Huri y'a bolow minɛ ka lɔ, mɔgɔ kelen tun b'a faan kelen na, kelen b'a faan dɔ nin na. A kɛra ten, Musa bolow ma ja tugu fɔɔ ka tile ben.

¹³Zozuwe sera amalɛkiw kɔrɔ k'u faga ni murujan ye.

¹⁴ O kɔ, Masaba y'a fɔ Musa ye ko: «I ka o koo nin sɛbɛn kitabu kɔnɔ janko mɔgɔw kana ɲinɛ a kɔ. A fɔ Zozuwe ye fana ko ne bena Amalɛki tɔgɔ tunu ka bɔ dugukolo kan.»

¹⁵Musa ye sarakabɔyɔrɔ dɔ lɔ yen k'o tɔgɔ la ko: «Masaba ye ne ka kɛlɛkɛtaamasiɲɛ ye.»

¹⁶A ko: «Masaba darabɔra ka ban minkɛ, o la, a bena amalɛkiw kɛlɛ tuma bɛɛ.»