Read dyu Isirayɛlidenw ka bɔko jɔnya la kitabu 2 Bible Online

Isirayɛlidenw ka bɔko jɔnya la kitabu 2 - dyu bible

Isirayɛlidenw ka bɔko jɔnya la kitabu 2

¹O tuma na, Levi kɔmɔgɔ dɔ ye muso dɔ furu, min tun ye Levi kɔmɔgɔ dɔ ye fana.

² O muso ye kɔnɔ ta ka dencɛ wolo. A y'a ye k'o deen tun cɛɛ ka ɲi, a y'a dogo kalo saba.

³Tuma min na a tun te se k'a dogo tugu, a ye segi ta min dilannin tun be ni biin sifa dɔ ye, k'a mɔn ni tulu sifa dɔ ye, ni bɔgɔgwɛ. A ye deen la o kɔnɔ k'a bila Nili baa dagolo la biinw cɛma.

⁴Deen kɔrɔmuso lɔra yɔrɔjan janko k'a filɛ min bena kɛ deen na.

⁵Ezipiti masacɛ denmuso nana bada la ko a be ko yen. A ka baaraden musomanw tun be yaalayaalala bada la. A ye segi nin ye biinw cɛma k'a ka jɔnmuso ci ka ta'a ta.

⁶A y'a daa yɛlɛ k'a ye denɲɛnin lo. Dencɛ tun lo, n'a be kasira. A makari y'a minɛ. A ko: «Nin ye eburuw ka deen dɔ ye.»

⁷Deen kɔrɔmuso nan'a fɔ masacɛ denmuso ye ko: «I b'a fɛ ne ka taga eburumuso dɔ wele, a ka na siin di deen nin ma wa?»

⁸Masacɛ denmuso ko ɔnhɔn. O la, a tagara deen baa wele.

⁹Deen baa nana tuma min na, masacɛ denmuso y'a fɔ a ye ko: «Deen nin ta ka to ka siin d'a ma, n bena i sara.» Muso ye deen ta ka to ka siin d'a ma.

¹⁰ Deen kɔgɔra tuma min na, a baa tagar'a di masacɛ denmuso ma, a kɛra i n'a fɔ ale deen. A y'a tɔgɔ la ko Musa, bari a ko: «Ne y'a sama ka bɔ jii la.»

¹¹ Musa kɛra mɔgɔkɔrɔba ye tuma min na, loon dɔ, a tagar'a balima Isirayɛlidenw fɛ. U be baara gwɛlɛman minw kɛra, a y'o ye. A ye Ezipitika dɔ ye, min tun b'ale Musa balima eburu dɔ bugɔra.

¹²A ye filɛli kɛ a gɛrɛfɛ, a ma mɔgɔ ye minkɛ, a ye Ezipitika nin faga k'a suu dogo cɛncɛn na.

¹³O dugusagwɛ, a bɔra k'a ye ko eburu fila be ɲɔgɔn bugɔra. Tiɲɛ tun te min fɛ, a y'a fɔ ale ye ko: «Mun na i b'i tɔɲɔgɔn bugɔra?»

¹⁴O cɛɛ y'a jaabi ko: «Jɔn y'i bila anw kunna, k'i kɛ anw kitibaga ye? A b'i kɔnɔ ka ne faga i n'a fɔ i ye Ezipitika nin faga cogo min na wa?» Musa siranna, a y'a fɔ a yɛrɛ kɔnɔ ko: «Koo nin bɔra kɛnɛma koyi!»

¹⁵ Masacɛ y'o koo mɛn tuma min na, a tun b'a fɛ ka Musa faga. Nga Musa bolil'a ɲa ka taga Madiyan jamana na. A sera yen tuma min na, a tagara sigi kɔlɔn dɔ daa la.

¹⁶Madiyan murutigi dɔ tun be ni denmuso wolonwula ye. O denmuso nunu nana k'u be jii bɔ, k'u facɛ ka begɛnw min.

¹⁷Begɛndɛndɛbaga dɔw nana k'u gwɛn. Musa ma sɔn, a ye sunguru nunu dɛmɛ, ka jii bɔ k'a di u ka begɛnw ma.

¹⁸U kɔsegira u faa Erewuyɛli fɛ tuma min na, ale y'u ɲininga ko: «Mun y'a to aw nana joona bii?»

¹⁹U ko: «Ezipitika dɔ y'an bɔsi begɛndɛndɛbagaw bolo. Ale yɛrɛ le ye jii bɔ k'a di begɛnw ma.»

²⁰A y'a fɔ a denmusow ye ko: «O cɛɛ be min? Mun na aw y'a to yen? Aw ye ta'a wele a ka na dumuni kɛ.»

²¹Musa sɔnna ka to n'o cɛɛ nin ye. A y'a denmuso Sipora di Musa ma furu la.

²²Sipora ye dencɛ sɔrɔ. Musa y'a tɔgɔ la ko Gɛrisɔn, ko: «Ne kɛra lonan ye jamana nin kɔnɔ.» [1]

²³Waatijan tɛmɛnin kɔ, Ezipiti masacɛ nana sa. Isirayɛlidenw tora ka ŋuna u ka jɔnyabaara kosɔn, ka to ka kasi kosɔbɛ. Ala ye u kasikan mɛn k'u to u ka jɔnya la.

²⁴ A y'u ŋunakan mɛn, a fana hakili tor'a ka layidu la, a tun ye o min ta Ibrayima ni Isiyaka ani Yakuba ye.

²⁵O la, a y'u ye tuma min na, u hinɛ donn'a la.