Read dyu Isirayɛlidenw ka bɔko jɔnya la kitabu 24 Bible Online

Isirayɛlidenw ka bɔko jɔnya la kitabu 24 - dyu bible

Isirayɛlidenw ka bɔko jɔnya la kitabu 24

¹Masaba y'a fɔ Musa ye tugu ko: «Yɛlɛ ka na ne fɛ, e ni Arɔn, ni Nadabu ni Abiyu, ani Isirayɛli cɛkɔrɔba bi wolonwula. Aw k'aw kunbiri gwan yɔrɔjan.

²E Musa dama le bena gwɛrɛ ne la. Tɔ nunu kana gwɛrɛ. Jama fana kana yɛlɛ n'i ye.»

³Musa tagara Masaba ka kumaw n'a ka sariyaw bɛɛ fɔ jama ye. U bɛɛ y'a jaabi ni kaan kelen ye, ko: «Masaba ye min fɔ, an bena o bɛɛ kɛ.»

⁴O kɔ, Musa ye Masaba ka kuma nunu bɛɛ sɛbɛn. O dugusagwɛ, a wilila sɔgɔma joona ka sarakabɔyɔrɔ lɔ kulu nin jukɔrɔ. A ye kabakuru tan ni fila fana lɔ, Isirayɛli deen tan ni fila kɔmɔgɔw tɔgɔ la.

⁵A ye Isirayɛlidenw kanbelen dɔw ci, olu ye saraka jɛnitaw bɔ Masaba ye ka tura kɛɲɛninw faga jɛnɲɔgɔnya sarakaw ye.

⁶Musa y'u joli tilancɛ kɛ minan dɔw kɔnɔ k'a tɔɔ tilancɛ seriseri sarakabɔyɔrɔ kan.

⁷O kɔ, a ye Layidusɛbɛ ta k'a kalan jama ɲana. U ko: «Masaba ye min fɔ, an bena o bɛɛ kɛ, an ben'a sago kɛ.»

⁸ Musa ye joli ta k'a seriseri jama kan k'a fɔ ko: «Nin ye bɛɛn joli ye Masaba ye min ta aw ye, k'o juu sigi kuma nunu bɛɛ kan.»

⁹O kɔ, Musa ni Arɔn, ani Nadabu ni Abiyu ani Isirayɛli cɛkɔrɔba bi wolonwula nunu yɛlɛla kulu kan.

¹⁰U ye Isirayɛli ka Ala ye. A lɔyɔrɔ tun be i n'a fɔ yɔrɔ min dilanna ni kabakuru bulaman sifa dɔ ye min sɔngɔ ka gwɛlɛ. O yɔrɔ ɲaa tun be i n'a fɔ sankolo ɲaa ni kaba t'a kan.

¹¹Nga Ala ma maga Isirayɛlidenw ka ɲamɔgɔ nunu na. U y'a ye. U ye dumuni kɛ ka minni kɛ.

¹²Masaba y'a fɔ Musa ye ko: «Yɛlɛ ka na ne fɛ kulu kan, ka to yan. Ne bena walaka kabakurulamanw d'i ma, ne ye n ka sariya ni ladiliw sɛbɛn minw kan, janko ka jama kalan.»

¹³O kɔ, Musa n'a dɛmɛbaga Zozuwe wilila ka sira ta ɲɔgɔn fɛ. Musa yɛlɛla ka taga Ala ka kulu kan.

¹⁴A tun y'a fɔ cɛkɔrɔbaw ye ko: «Aw k'an makɔnɔ yan, sanni an ka kɔsegi ka na. Arɔn ni Huri be n'aw ye. Ni koo dɔ donna mɔgɔ dɔ n'a tɔɲɔgɔn cɛ, u be taga u fɛ, u b'o ɲanabɔ.»

¹⁵Ayiwa, Musa yɛlɛla kulu kan tuma min na, sankaba ye kulu datugu,

¹⁶Masaba nɔɔrɔ tun be Sinayi kulu kan. Sankaba y'a datugu tile wɔɔrɔ kɔnɔ. Tile wolonwulanan loon, Masaba ye Musa wele sankaba kɔnɔ.

¹⁷Isirayɛlidenw ɲana, Masaba ka nɔɔrɔ tun be i n'a fɔ tasumaba, kulu kan.

¹⁸Musa yɛlɛla kulu kan ka don sankaba kɔnɔ. A tora kulu kan tile bi naani ni suu bi naani.