Read dyu Isirayɛlidenw ka bɔko jɔnya la kitabu 27 Bible Online

Isirayɛlidenw ka bɔko jɔnya la kitabu 27 - dyu bible

Isirayɛlidenw ka bɔko jɔnya la kitabu 27

¹«I bena saraka jɛnita bɔyɔrɔ dilan ni akasiyayiri ye. A jaɲa n'a boɲa bɛɛ ka kɛ mɛtɛrɛ fila ni tilan ye, a faan nunu bɛɛ jaɲa ka kɛ kelen ye. A jaɲa sanfɛ ka kɛ mɛtɛrɛ kelen ni tilan ye.

²I ka gɔɔn bisigi kɛ a nɔnkɔn naani la, u ni sarakabɔyɔrɔ ka nɔrɔ ɲɔgɔn na, k'a mɔn ni zira ye.

³Minan minw bena kɛ ka baara kɛ a kan, i ka olu bɛɛ dilan ni zira ye: bugurigwɛ cɛminanw, pɛluw ni jifilenw, ani kuruw ɲiin caaman, ni takami bɔfɛnw.

⁴I bena fɛɛn dɔ dilan ni zira ye k'a kɛ i n'a fɔ tɛmɛ, ka fɛɛn dɔw dilan ni zira ye i n'a fɔ bololanigɛ, ka kelen kelen don tɛmɛ nin nɔnkɔn naani bɛɛ la.

⁵I bena o don sarakabɔyɔrɔ nin cɛmancɛ la, a tɔɔ ka to sanfɛ,

⁶ka akasiyayiri dɔw lɛsɛ k'o mɔn ni zira ye, u ka kɛ sarakabɔyɔrɔ talɔgɔw ye.

⁷I bena lɔgɔ nunu don bololanigɛbisigi nunu na, u ka to sarakabɔyɔrɔ faan fila la a tatuma na.

⁸A ka kɛ ni yiri ye, a kɔnɔ ka kɛ woo ye. Cogo min yirala i la kulu kan, i k'a dilan ka kɛɲɛ n'o ye.

⁹«I bena luu dɔ kɛ ka fanibugu nin lamini n'a ye, i k'o kɛ ni faniw ye minw danna ni jese ɲanaman ye. Worodugu ɲafan fɛ luu nin jaɲa ka kɛ mɛtɛrɛ bi duuru.

¹⁰Tutunan mugan n'u ka jusigilan ziralaman deen mugan bila yen, ka fani dulonfɛn warigwɛlamanw kɛ u la, ka warigwɛ dilan i n'a fɔ bere, k'o kɛ fani nunu dulonta ye.

¹¹Fanibugu kɔgɔdugu ɲafan fɛ ta ka kɛ ten fana.

¹²Luu nin kɔnɔ boɲa, tileben faan fɛ, o yɔrɔ fani jaɲa ka kɛ mɛtɛrɛ mugan ni duuru ye, tutunan tan n'u jusigilan deen tan ka sɔrɔ yen.

¹³Luu nin kɔrɔnfɛla kɔnɔ boɲa fana ka kɛ mɛtɛrɛ mugan ni duuru ye.

¹⁴K'a ta luu nin donda la ka taga nɔnkɔn dɔ la, o ka kɛ mɛtɛrɛ wolonwula ni tilan fani ye, ani tutunan saba n'u ka jusigilan deen saba.

¹⁵Faan dɔ nin fana ta ka kɛ ten.

¹⁶Luu nin donda fani ka kɛ mɛtɛrɛ tan ye, ka dan ni jese kɔlɔbolaman ye, ni jese wulenman, ani jesewulen cɔncɔn, ani jese ɲanaman, ani ka sɔgɔ, ka tutunan naani n'u ka jusigilan deen naani kɛ u la.

¹⁷Bere warigwɛlamanw ni fanidulonfɛn warigwɛlamanw ka kɛ luu nin lamini tutunanw na. U ka jusigilanw ka kɛ ni zira ye.

¹⁸Luu nin jaɲa ka kɛ mɛtɛrɛ bi duuru ye, a boɲa ka kɛ mɛtɛrɛ mugan ni duuru ye. A laminifaniw ka dan ni jese ɲanaman ye, u jaɲa sanfɛ ka kɛ mɛtɛrɛ fila ni tilan ye. Luu nin ka jusigilanw ka dilan ni zira ye.

¹⁹Ne ka fanibugu nin baarakɛminanw bɛɛ, a gweenw ni luu ta bɛɛ ka kɛ ni zira ye.

²⁰ «A fɔ Isirayɛlidenw ye ko u ka na ni olivutulu ɲanaman ye janko o ka se ka to ka don fitinɛ kɔnɔ, a mananin ka to tuma bɛɛ.

²¹Arɔn n'a deenw ka fitinɛ labɛn, janko a mananin ka to ne Masaba ɲakɔrɔ k'a ta wulafɛ fɔɔ ka taga dugu gwɛ, Ɲɔgɔnkunbɛn fanibugu kɔnɔ, bugu cɛtigɛfani ɲafɛ, walaka bilakɛsu be o min kɔfɛ. O ka kɛ sariya ye min tena dabila Isirayɛlidenw n'u kɔmɔgɔw bɛɛ fɛ fewu.