Read dyu Isirayɛlidenw ka bɔko jɔnya la kitabu 28 Bible Online

Isirayɛlidenw ka bɔko jɔnya la kitabu 28 - dyu bible

Isirayɛlidenw ka bɔko jɔnya la kitabu 28

¹«I kɔrɔcɛ Arɔn wele ka gwɛrɛ i la, ale n'a dencɛ Nadabu ni Abiyu, ani Eleyazari ni Itamari, ka bɔ Isirayɛlidenw cɛma, janko u be kɛ ne ka sarakalasebagaw ye.

²«I bena sarakalasefaniw dilan i kɔrɔcɛ Arɔn ye min ben'a lɔyɔrɔ n'a ka boɲa yira.

³A fɔ baaralɔnbagaw ye, ne ye hakili di minw bɛɛ ma kosɔbɛ, k'u ka Arɔn ka faniw dilan, a bena min don, ka kɛ danna ka se ka sarakalasebaara kɛ ne ye.

⁴U ka kan ka fani minw dilan, olu filɛ nin ye: disilafani, ni sarakalasebagaw kuntigi ka fani, ani forocadennin, ni forocaba kansɔgɔnin, ni kunmelekefani ni cɛsirilan. U ka sarakalasefani nunu dilan i kɔrɔcɛ Arɔn n'a deenw ye, janko u ka se ka sarakalasebaara kɛ ne ye.

⁵U k'u dilan ni jese kɔlɔbolaman, ni jese wulenman, ani jesewulen cɔncɔn, ani jese ɲanaman ye, ka sanu kɛ u la.

⁶«A to baaralɔnbaga ɲanaman dɔ ka sarakalasebagaw kuntigi ka fani dan ni jese kɔlɔbolaman, ni jese wulenman, ani jesewulen cɔncɔn, ni jese ɲanaman ye, ka sanu kɛ a la.

⁷A ka fɛɛn fila dɔw kɛ minw bena fani nin daa fila nunu tugu ɲɔgɔn na a gamanw sanfɛ.

⁸Sarakalasebagaw kuntigi ka fani n'a cɛsirilan ka dilan cogo kelen na, ka nɔrɔ ɲɔgɔn na. A ka dan ni jese kɔlɔbolaman, ni jese wulenman, ani jesewulen cɔncɔn, ani jese ɲanaman ye, ka sanu kɛ a la.

⁹Kabakuru kɔlɔbolaman fila ta ka Isirayɛli dencɛw tɔgɔw sɛbɛn u kan.

¹⁰U mɔgɔ wɔɔrɔ tɔgɔ ka sɛbɛn kabakuru kelen kan, u tɔ wɔɔrɔ ta ka sɛbɛn filanan kan ka kɛɲɛ n'u ka kɔrɔya ye.

¹¹I ka Isirayɛli dencɛw tɔgɔw sɛbɛn o kabakuru fila nunu kan, i n'a fɔ kabakuru sɔngɔgwɛlɛn lɛsɛbaga be taamasiɲɛ lafɛn ɲɛgɛn cogo min na. O kɔ, i ka kabakuru nunu nɔrɔ sanu kan,

¹²k'o nɔrɔ sarakalasebagaw kuntigi ka fani gaman kan. U ka kɛ hakilijigifɛnw ye Isirayɛli dencɛw koo la. Arɔn k'u tɔgɔw bila a gaman kan k'a kɛ hakilijigifɛn ye ne Masaba ɲakɔrɔ.

¹³Kabakuru nunu nɔrɔyɔrɔ ka kɛ sanu ye,

¹⁴ka jɔrɔkɔ fila dilan ni sanu yɛrɛ yɛrɛ ye k'u kɛ i n'a fɔ juru dannin, k'o don kabakuru nunu nɔrɔyɔrɔw la.

¹⁵«A to baaralɔnbaga ɲanaman dɔ ka disilafani dilan kititigɛ kama. A ka disilafani nin dilan sarakalasebagaw kuntigi ka fani dilancogo la, ni sanu ye, ani jese kɔlɔbolaman, ni jese wulenman, ani jesewulen cɔncɔn, ni jese ɲanaman.

¹⁶A ka fani nin kuru ka la ɲɔgɔn kan, a faan bɛɛ ka kɛ kelen ye, a jaɲa n'a kɔnɔ boɲa bɛɛ ka bɛn santimɛtɛrɛ mugan ni duuru ma.

¹⁷Kabakuru sɔngɔgwɛlɛnw nɔrɔnɔrɔ a la, fɔɔ sira naani. Kabakuru minw ka kan ka kɛ sira fɔlɔ kan, o ye kabakuru wuleman cɔncɔn ni kabakuru nɛrɛmuguman ani kabakuru binkɛnɛman ye.

¹⁸Sira filanan ta ka kɛ kabakuru bulaman sifa fila ani diyaman ye.

¹⁹Sira sabanan ta ka kɛ kabakuru bulaman ni kabakuru ɲɛgɛɲɛgɛnin, ani ametisiti ye.

²⁰Sira naaninan ta ka kɛ kabakuru binkɛnɛman, ni kɔlɔbolaman, ani kabakuru binkɛnɛman sifa wɛrɛ ye. Kabakuru nunu nɔrɔyɔrɔ ka kɛ sanu ye.

²¹U ka kɛ tan ni fila ye ka kɛɲɛ ni Isirayɛli dencɛw tɔgɔw ye. Isirayɛli deen tan ni fila nunu tɔgɔw kelen ka ɲɛgɛn kabakuru nunu kelen kan, k'u kɛ i n'a fɔ taamasiɲɛ lafɛn.

²²U bena jɔrɔkɔw dilan ni sanu yɛrɛ yɛrɛ ye i n'a fɔ juru dannin, u ka kɛ disilafani ta ye,

²³ka bololanigɛ sifa dɔ dilan fila, ni sanu yɛrɛ yɛrɛ ye k'u siri disilafani dakun fila la,

²⁴ka sanujɔrɔkɔ fila nunu don o fɛɛn nunu na, disilafani dakun na,

²⁵ka jɔrɔkɔ dakun fila dɔ nunu don kabakuru fila nunu nɔrɔyɔrɔw la, minw be sarakalasebagaw kuntigi ka fani gaman kan. Disilafani nin ka to disi kan.

²⁶I bena bololanigɛ sifa dɔ dilan deen fila ni sanu ye, k'o siri disilafani dakun fila dɔ nunu na kɔnɔna, k'a nɔrɔ sarakalasebagaw kuntigi ka fani na,

²⁷k'o ɲɔgɔn fila kɛ tugu ni sanu ye k'u don sarakalasebagaw kuntigi ka fani gaman kɔrɔ faan fila la, a ɲafɛla la, cɛsirilan siriyɔrɔ sanfɛ.

²⁸Juru kɔlɔbolaman bena siri disilafani nigɛ nunu na ka taga siri sarakalasebagaw kuntigi ka fani taw la, janko disilafani nin ka to a ka fani cɛsirilan sanfɛ, a kana foni ka bɔ fani nin na.

²⁹«Isirayɛli deenw tɔgɔw minw sɛbɛnna kititigɛko la n'u be disilafani kan, tuma o tuma ni Arɔn be don Yɔrɔ Senuman na, olu ka sɔrɔ a disi la, u ka ne Masaba hakili jigi aw koo la tuma bɛɛ.

³⁰ I ka *Urimu ni *Tumimu don disilafani kɔnɔ, janko u ka kɛ Arɔn disi la a dontuma na ne Masaba ɲakɔrɔ. O la, a be se ka ne sago lɔn Isirayɛlidenw faan fɛ o fɛɛn nunu barika la, o bena sɔrɔ a disi la tuma bɛɛ ne ɲakɔrɔ.

³¹«Sarakalasebagaw kuntigi ka fani bena don forocadennin min kan, o bɛɛ bena kɛ kɔlɔbolaman ye,

³²k'a kaan tigɛ a cɛmancɛ la k'o cɛ k'a lamini, deleke kaan dilancogo la, janko a kana faran.

³³I bena gerenadiyiriden bisigi dilan k'u dondon foroca nin dagolo la, kɔlɔbolaman, wulenman, ni wulenman cɔncɔn, k'a lamini, ka welennin sanulamanw don yiridenbisigi nunu ni ɲɔgɔn cɛ.

³⁴N'i ye welennin kelen don, i ka yiridenbisigi kelen don, k'a kɛ ten fɔɔ ka foroca nin dagolo bɛɛ lamini.

³⁵Ni Arɔn be baara kɛ tuma min na, a ka foroca nin don. Welenninw mankan bena to ka bɔ a dontuma n'a bɔtuma Yɔrɔ Senuman na ne Masaba ɲakɔrɔ. O la, a tena sa.

³⁶«I bena sanu yɛrɛ yɛrɛ kɛ ka yirifeerenbisigi dilan ka sɛbɛnni kɛ a kan ko: ‹Nin ye Masaba ta ye,› i n'a fɔ taamasiɲɛ lafɛn be kɛ cogo min na,

³⁷a ka siri kunmelekefani ɲafɛ ni juru kɔlɔbolaman ye.

³⁸O ka kan ka to Arɔn teen na tuma bɛɛ a dontuma na ne Masaba ɲakɔrɔ. O la, Isirayɛlidenw bena sarakafɛn o fɛɛn bɔ, ne bena sɔn o ma, haali n'u m'a bɔ a cogo la.

³⁹«Forocabaw dilan ni jese ɲanaman ye, ka kunmelekefani dan ni jese ɲanaman ye fana, ka cɛsirilan ɲɛgɛn.

⁴⁰«Forocabaw ni cɛsirilanw, ani kunmelekefaniw dilan Arɔn dencɛw ye, minw bena u lɔyɔrɔ yira ka boɲa la u kan.

⁴¹I ka fani nunu don i kɔrɔcɛ Arɔn n'a dencɛw kaan na, ka tulu kɛ u kuun na, ka ne ka baara don u bolo. O la, i k'u saniya janko u ka se ka kɛ ne ka sarakalasebagaw ye.

⁴²I bena kurusiw dilan u ye ni jese ɲanaman ye janko k'u sutara, o kurusi nunu bena jigi fɔɔ woto la.

⁴³Arɔn n'a dencɛw bena to k'u don tuma o tuma n'u be don Ɲɔgɔnkunbɛn fanibugu kɔnɔ, walima n'u be gwɛrɛ sarakabɔyɔrɔ la ka baara kɛ Yɔrɔ Senuman na, janko u kana jalaki ka sa. O ka kɛ landa ye Arɔn n'a kɔmɔgɔw fɛ kudayi.