Read dyu Isirayɛlidenw ka bɔko jɔnya la kitabu 29 Bible Online

Isirayɛlidenw ka bɔko jɔnya la kitabu 29 - dyu bible

Isirayɛlidenw ka bɔko jɔnya la kitabu 29

¹«I ka kan ka koo min kɛ ka Arɔn n'a dencɛw kɛ ne ka sarakalasebagaw ye, o filɛ nin ye. Fiɲɛ te tura kɛɲɛnin min na, i k'o minɛ, ani sagajigi fila, fiɲɛ te minw na,

²ka mugu ɲanaman kɛ ka buru dilan n'o ye, fununan kana don o la, ka mugu nɔɔni ni tulu ye k'a kɛ ŋɔmi ye, fununan kana sɔrɔ o fana na, ani furufuru, tulu funfunnin be minw kan,

³k'u don sinsin dɔ kɔnɔ k'u fara tura ni sagajigi fila nunu kan ka na n'u ye.

⁴«O kɔ, i be na ni Arɔn n'a dencɛw ye Ɲɔgɔnkunbɛn fanibugu daa la ka jii kɛ k'u ko,

⁵ka fani nunu ta k'u don Arɔn kaan na: forocaba, ni sarakalasebagaw kuntigi ka fani n'a forocadennin, n'a ka fani yɛrɛ, ani disilafani, ka sarakalasebagaw kuntigi ka fani ka cɛsirilan kɛ k'a siri,

⁶ka fani meleke a kuun na, ka kuntigiya taamasiɲɛn nɔrɔ a la,

⁷ka tulu mɔnta ta k'a bɔn a kuun na.

⁸I k'a dencɛw wele ka forocabaw don olu fana kaan na,

⁹ka fani siri u kuun na. O kɔ, i ka Arɔn n'a dencɛw cɛ siri ni cɛsirilanw ye. Sarakalasebaara ka kɛ u ka baara ye, o ka kɛ landa ye min te dabila. I bena Arɔn n'a dencɛw bila ne ka baara la ten.

¹⁰«I bena na ni tura nin ye Ɲɔgɔnkunbɛn fanibugu daa la. Arɔn n'a dencɛw k'u bolo la a kuun na.

¹¹I ben'a kaan tigɛ ne Masaba ɲakɔrɔ Ɲɔgɔnkunbɛn fanibugu daa la,

¹²k'a joli dɔ ta k'o mɔn sarakabɔyɔrɔ nɔnkɔnw na n'i bolokunnaden ye, k'a tɔɔ bɛɛ bɔn sarakabɔyɔrɔ jukɔrɔ.

¹³Tulu min b'a nugu kan, i b'o bɛɛ bɔ, n'a biɲɛ yɔrɔ ɲanaman, n'a kɔkili fila n'u gɛrɛfɛtulu bɔ k'u jɛni sarakabɔyɔrɔ kan.

¹⁴Nga i ka tura nin sogo, n'a golo n'a boo jɛni jama ka sigiyɔrɔ kɔfɛ. Hakɛ yafa saraka lo.

¹⁵«I bena sagajigi nunu kelen minɛ fana. Arɔn n'a dencɛw k'u bolo la a kuun na.

¹⁶I ben'a kaan tigɛ k'a joli ta k'a seriseri sarakabɔyɔrɔ faan bɛɛ kan,

¹⁷ka sagajigi nin sogo tigɛtigɛ k'a nugu n'a seenw ko, k'u la a sogo tigɛtigɛninw n'a kungolo kan,

¹⁸ k'a bɛɛ jɛni sarakabɔyɔrɔ kan. Saraka jɛnita lo, min be bɔ ne Masaba ye ka jɛni pewu. A kasa ka di n ye.

¹⁹«I bena sagajigi filanan minɛ. Arɔn n'a dencɛw k'u bolow la a kuun na.

²⁰I ben'a kaan tigɛ k'a joli dɔ ta k'a mɔn Arɔn n'a dencɛw kinibolo tulo dakun na, ani u kinibolo bolokunnadenba, n'u kinibolo senkunnadenba la, ka dɔ seriseri sarakabɔyɔrɔ faan bɛɛ kan.

²¹Joli min be sarakabɔyɔrɔ kan, i k'o dɔ ta, ani tulu mɔnta, k'u seriseri Arɔn n'a ka faniw kan, n'a dencɛw n'u ka faniw kan. O la, Arɔn n'a dencɛw, n'u ka faniw be kɛ ne Masaba taw ye.

²²«I ka sagajigi nin tulu ta, n'a kukala, [1] n'a kɔnɔnatulu, n'a biɲɛ yɔrɔ ɲanaman, n'a kɔkili fila n'u gɛrɛfɛtulu, n'a kinibolo woto. O saraka nin ye sarakalasebagaw ka baara daminɛ ta ye.

²³Fununan te buru minw na n'u bilanin be ne Masaba ɲakɔrɔ, i ka olu kelen ta sinsin kɔnɔ, ani ŋɔmi kuun kelen, min dilanna ni tulu ye, ani furufuru kelen.

²⁴I b'o bɛɛ don Arɔn n'a deenw bolo k'u fifa ne Masaba ɲakɔrɔ k'o bɔ saraka ye.

²⁵O kɔ, i b'o minɛ u bolo, k'u ni saraka jɛnita jɛni sarakabɔyɔrɔ kan. A kasa ka di n ye. Saraka lo, min ka kan ka jɛni pewu ne Masaba ye.

²⁶Sagajigi min bɔra saraka ye Arɔn nunu donwaati la u ka baara la, i k'o disi ta k'a fifa ne Masaba ɲakɔrɔ, o bena kɛ i niyɔrɔ ye.

²⁷Sagajigi nin disi n'a woto, minw tun fifara ne ɲakɔrɔ, i k'a fɔ k'olu ye ne Masaba ta ye.

²⁸O bena kɛ u niyɔrɔ ye tuma bɛɛ ka bɔ Isirayɛlidenw fɛ. Isirayɛlidenw bena to k'o bɔ u ka jɛnɲɔgɔnya sarakaw la, k'a di ne, Masaba ma.

²⁹«Arɔn ka sarakalasefaniw bena kɛ a kɔmɔgɔw ta ye, olu mɔnlon ni tulu ye ka don baara nin na, u k'o don.

³⁰Arɔn dencɛ min ben'a nɔɔ ta o baara la, n'a bena don Ɲɔgɔnkunbɛn fanibugu kɔnɔ ka baara kɛ Yɔrɔ Senuman na, a k'o faniw don tile wolonwula kɔnɔ.

³¹«Sagajigi min bɔra sarakalasebagaw donwaati la u ka baara la, i k'o sogo ta k'a tobi yɔrɔ saniyanin na.

³²Arɔn n'a dencɛw k'o sagasogo nin ɲimi Ɲɔgɔnkunbɛn fanibugu daa la, ani buru minw be sinsin kɔnɔ.

³³Fɛɛn minw kɛra saraka ye kojuguw yafa kama, u donwaati la ka kɛ ne Masaba ka sarakalasebagaw ye, u k'o dumu. Nga mɔgɔ wɛrɛ man kan k'u dumu, bari ne Masaba ta lo.

³⁴N'o saraka sogo, walima n'o buru tɔɔ sira, i k'a jɛni. A man kan ka dumu, bari ne Masaba ta lo.

³⁵«Ne ye min bɛɛ fɔ i ye, i k'o bɛɛ kɛ Arɔn n'a dencɛw ye. K'u don o baara la, i k'o koo kɛ tile wolonwula kɔnɔ.

³⁶I bena tura kelen faga loon o loon k'o kɛ hakɛ yafa saraka ye janko hakɛ ka se ka yafa, ka sarakabɔyɔrɔ saniya k'a mɔn ni tulu ye k'a kɛ ne ta ye.

³⁷I bena to k'a saniya loon o loon fɔɔ tile wolonwula, a be kɛ ne ta ye. Sarakabɔyɔrɔ bena kɛ fɛɛn ye min saniyanin be kosɔbɛ. Fɛɛn o fɛɛn mana maga a la, o bena sa.

³⁸«I ka kan ka sankelensaga fila bɔ saraka ye ne ye sarakabɔyɔrɔ kan loon o loon, o kana dabila fewu.

³⁹I bena kelen bɔ sɔgɔma, ka kelen bɔ wulafɛ, tilekun dontuma na.

⁴⁰I ka mugu tɛntɛnnin kilo saba, ni olivutulu litiri kelen ni tilan ta, k'u ɲagami ɲɔgɔn na, k'o ni sagaden fɔlɔ bɔ ɲɔgɔn fɛ, ani duvɛn litiri kelen ni tilan.

⁴¹I ka sagaden dɔ nin fana bɔ ten wulafɛ, tilekun dontuma na, ka mugu, ni olivutulu, ani duvɛn fara a kan i n'a fɔ sɔgɔma ta. Saraka jɛnita lo ne Masaba ye, a kasa ka di.

⁴²Aw kɔmɔgɔw bɛɛ ka kan k'o saraka jɛnita bɔ loon o loon Ɲɔgɔnkunbɛn fanibugu daa la ne Masaba ɲakɔrɔ. Ne bena i kunbɛn o yɔrɔ la le ka kuma i fɛ.

⁴³Ne bena Isirayɛlidenw fana kunbɛn o yɔrɔ la le, o yɔrɔ bena kɛ ne ta ye ne ka nɔɔrɔ barika la.

⁴⁴Ne bena sɔn Ɲɔgɔnkunbɛn fanibugu ni sarakabɔyɔrɔ ma k'o kɛ n ta ye, ka Arɔn n'a deenw fana kɛ ne taw ye, janko u ka sarakalasebaara kɛ ne ye.

⁴⁵O tuma na, ne bena sigi Isirayɛlidenw cɛma ka kɛ u ka Ala ye.

⁴⁶U ben'a lɔn ko ne ye Masaba u ka Ala ye, min y'u bɔ Ezipiti jamana na, janko n ka se ka sigi u cɛma. Ne ye Masaba le ye, u ka Ala.