Read dyu Isirayɛlidenw ka bɔko jɔnya la kitabu 3 Bible Online

Isirayɛlidenw ka bɔko jɔnya la kitabu 3 - dyu bible

Isirayɛlidenw ka bɔko jɔnya la kitabu 3

¹Ayiwa, Musa tun b'a birancɛ Zetoro ka sagaw mara, ale min ye Madiyan murutigi ye. A tagara n'u ye kongokolon faan dɔ la, fɔɔ ka taga se Ala ka kulu yɔrɔ la, o min be wele ko *Orɛbu.

² Masaba ka mɛlɛkɛ y'a yɛrɛ yira Musa la tasuma na yiritunin dɔ cɛma. Musa y'a filɛ, a y'a ye ko tasuma tun be manana tuu nin kan, nga a tun te jɛni.

³O la, a ko: «Ne bena taga kabako nin filɛ k'a lɔn mun kama tuu te jɛnina.»

⁴Masa Ala y'a ye ko Musa faranna ko a be na o filɛyɔrɔ la minkɛ, a tora tuu nin kɔnɔ, ka Musa wele ko: «Musa, Musa.» Musa ko: «Naamu.»

⁵A ko: «I kana gwɛrɛ yan yɔrɔ la. I ka sanbara bɔ. Bari i lɔnin be yɔrɔ min na, o ye yɔrɔ senuman ye.

⁶Ne y'i bɛma ka Ala ye, Ibrayima, ni Isiyaka, ani Yakuba ka Ala.» Musa y'a ɲada biri bari a tun be siran ka Ala filɛ.

⁷Masaba y'a fɔ tugu ko: «Ne ye n ka jama ka sɛgɛn ye Ezipiti jamana na, k'u kasikan mɛn u ka baarakuntigiw bolo. Ne b'u ka tɔɔrɔkow kala ma.

⁸O la, ne jigira waasa k'u bɔsi Ezipitikaw bolo k'u bɔ o jamana nin na ka taga n'u ye jamanaɲuman na, min ka bon haali, nɔnɔ ni lii ka ca yɔrɔ min na kosɔbɛ, jamana diman lo. Kanaanw ni itiw, ani amoriw ni periziw, ni iviw ani zebuziw ka jamana lo.

⁹Sisan Isirayɛlidenw kasikan donna ne tulo la, Ezipitikaw fana be sɛgɛn minw la u kan, n y'o ye.

¹⁰O la, ne b'i ci Ezipiti masacɛ fɛ sisan waasa i ka taga ne ka jama Isirayɛli bɔ Ezipiti.»

¹¹Musa y'a fɔ Ala ye ko: «Ne ye jɔn ye ni ne be taga masacɛ fɛ ani ka Isirayɛlidenw bɔ Ezipiti?»

¹²Ala ko: «Ne bena to n'i ye. Taamasiɲɛ min b'a yira ko ne le y'i ci, o ye nin ye: N'i ye jama bɔ Ezipiti tuma min na, aw bena ne bato kulu nin kan.»

¹³ Musa y'a fɔ Ala ye ko: «Ayiwa, ni ne tagara Isirayɛlidenw fɛ k'a fɔ u ye k'u bɛmaw ka Ala ye ne ci u ma, n'u ye ne ɲininga a tɔgɔ la, ne bena mun fɔ u ye?»

¹⁴ Ala y'a fɔ Musa ye ko: «Ne tɔgɔ ko ‹Ne ye min ye, n y'o ye.› I ben'a fɔ Isirayɛlidenw ye ko ‹Ne ye min ye› le y'i ci u fɛ.»

¹⁵A y'a fɔ Musa ye tugu ko: «I k'a fɔ Isirayɛlidenw ye ko Masaba, u bɛmaw ka Ala, Ibrayima, ni Isiyaka, ani Yakuba ka Ala le y'i ci u fɛ. O ye ne tɔgɔ ye kudayi, waati bɛɛ mɔgɔw bena ne wele o cogo kelen na.

¹⁶Taga Isirayɛli cɛkɔrɔbaw lajɛn k'a fɔ u ye ko ne Masaba, u bɛmaw ka Ala, Ibrayima, ni Isiyaka, ani Yakuba ka Ala, ko ne ye n yɛrɛ yira i la k'a fɔ ko ne y'a latigɛ k'u dɛmɛ. Koo min be kɛra u la Ezipiti, ne ɲaa b'o la.

¹⁷Ko ne ko n bena u bɔ Ezipiti jamana tɔɔrɔ la ka taga n'u ye kanaanw ni itiw, ani amoriw ni periziw ni iviw ani zebuziw ka jamana na, nɔnɔ ni lii ka ca o min kɔnɔ kosɔbɛ, jamana diman lo.

¹⁸Cɛkɔrɔbaw bena mɛnni kɛ i fɛ. O kɔ, e ni Isirayɛli cɛkɔrɔbaw bena taga Ezipiti masacɛ fɛ k'a fɔ a ye ko Masaba, eburuw ka Ala y'a yɛrɛ yira aw la. Ko a k'a to aw be taga tile saba taama kɛ kongokolon kɔnɔ, janko aw ka saraka bɔ Masaba aw ka Ala ye.

¹⁹Ne y'a lɔn ko a tena sɔn aw ka taga, fɔɔ a ka kɛ wajibiko ye a ma.

²⁰O la, n bolo bena se Ezipitikaw ma ka kabako sifa bɛɛ kɛ u cɛma k'u tɔɔrɔ. O kɔ, a ben'a to aw be taga.

²¹ Ne bena jama nin koo diya Ezipitikaw ye, o la, n'aw taatuma sera, aw bololakolon tena taga.

²²Musow kelen kelen bɛɛ bena minanw daali u sigiɲɔgɔnw fɛ ani musow fɛ minw b'u ka soo kɔnɔ, warigwɛtaw, ni sanutaw, ani faniw, aw bena minw don aw dencɛw n'aw denmusow kaan na. Aw bena Ezipitikaw bololafɛnw cɛ ten.»