Read dyu Isirayɛlidenw ka bɔko jɔnya la kitabu 31 Bible Online

Isirayɛlidenw ka bɔko jɔnya la kitabu 31 - dyu bible

Isirayɛlidenw ka bɔko jɔnya la kitabu 31

¹Masaba y'a fɔ Musa ye ko:

²«A filɛ, ne ye Zuda kɔmɔgɔ Huri dencɛ Uri ka deen Besalɛli woloma

³ka n yɛrɛ Nii d'a ma, ka see d'a ma, ka hakili d'a ma, ani lɔnniya, janko a ka se ka bololabaara sifa bɛɛ kɛcogo lɔn,

⁴ka se ka sanu ni warigwɛ, ani zira baara kosɔbɛ,

⁵ka kabakuru sɔngɔgwɛlɛnw ɲɛgɛn k'u dondon fɛɛn dɔw kɔnɔ, ka yiri lɛsɛ, ani ka bololabaara sifa bɛɛ kɛ.

⁶Ne ye Dan kɔmɔgɔ Ayisamaki dencɛ Ooliyabu fara a kan ka kɛ a dɛmɛbaga ye, ka see di bololabaarakɛlaw bɛɛ ma fana, janko, ne ye fɛɛn min bɛɛ koo fɔ i ye, u ka se k'o bɛɛ dilan:

⁷Ɲɔgɔnkunbɛn fanibugu, ni layidu taamasiɲɛ kɛsu n'a datugunan, ani soo nin minan tɔw bɛɛ,

⁸tabali n'a minanw, fitinɛ sanulaman min ye sanu yɛrɛ yɛrɛ ye, n'a minanw bɛɛ, ni wusulan jɛniyɔrɔ,

⁹saraka jɛnita bɔyɔrɔ n'a minanw bɛɛ, ni dagaba n'a jusigilan,

¹⁰sarakalasefaniw, sarakalasebaga Arɔn ta n'a dencɛw fana ta, u bena minw don k'u ka sarakalasebaara kɛ,

¹¹ani tulu mɔnta, ni ne ka sigiyɔrɔ wusulan kasadiman. Ne ye min fɔ i ye, u k'o fɛɛn nunu dilan ka kɛɲɛ n'o ye tigitigi.»

¹²Masaba y'a fɔ Musa ye ko

¹³a k'a fɔ Isirayɛlidenw ye ko: «Aw ka ne ka lafiɲɛlonw bato, bari o ye taamasiɲɛ ye ne ni aw cɛ kudayi, janko mɔgɔw k'a lɔn ko ne ye Masaba ye, min y'aw woloma ka kɛ n ta ye.

¹⁴Aw ka lafiɲɛlon bato, bari o ye ne ka loon ye. Ni mɔgɔ o mɔgɔ ye lafiɲɛlon landa cɛn, o be faga. Ni mɔgɔ min ye baara kɛ o loon na, o tigi niin ka kan ka bɔ a ka mɔgɔw cɛma.

¹⁵ Aw ka baara kɛ tile wɔɔrɔ kɔnɔ, nga tile wolonwulanan ye lafiɲɛlon ye, min bilara ne Masaba ye. Ni mɔgɔ o mɔgɔ be baara kɛ lafiɲɛlon na, o bena faga.

¹⁶Isirayɛlidenw n'u kɔmɔgɔw bɛɛ ka lafiɲɛlon bato, bɛɛn taamasiɲɛ lo min ka kan ka to yen kudayi.

¹⁷ O bena kɛ taamasiɲɛ ye ne ni u cɛ kudayi. Bari ne Masaba ye sankolo ni dugukolo dan tile wɔɔrɔ kɔnɔ. Tile wolonwulanan loon, ne ma baara kɛ, n lafiɲɛna.»

¹⁸Masaba tilara kuma na ni Musa ye Sinayi kulu kan tuma min na, a ye walaka fila di Musa ma, a ka sariya tan sɛbɛnnin be minw kan. Ala yɛrɛ le tun ye sɛbɛnni nin kɛ walaka kabakurulaman nunu kan.