Read dyu Isirayɛlidenw ka bɔko jɔnya la kitabu 34 Bible Online

Isirayɛlidenw ka bɔko jɔnya la kitabu 34 - dyu bible

Isirayɛlidenw ka bɔko jɔnya la kitabu 34

¹Masaba y'a fɔ Musa ye ko: «Kabakuru fila lɛsɛ k'u kɛ walakaw ye i n'a fɔ walaka fɔlɔw, i y'o minw ci. Kuma minw tun be olu kan, ne bena o ɲɔgɔn sɛbɛn u kan.

²I yɛrɛ labɛn sanni dugu ka gwɛ. Ni dugu gwɛra, i ka yɛlɛ Sinayi kulu kan ka lɔ ne ɲakɔrɔ kulu kunna yen.

³Mɔgɔ si kana na n'i ye o yɔrɔ la, mɔgɔ si kana ye kulu kan yɔrɔ si la fana. Hali begɛnw, misi fara begɛn misɛnmanw kan, o si man kan ka ɲimini kɛ kulu gɛrɛfɛ.»

⁴O la, Musa ye walaka kabakurulaman fila lɛsɛ i n'a fɔ fɔlɔtaw. Sɔgɔma, a wilila joona ka taga Sinayi kulu kan, i ko Masaba y'a fɔ a ye cogo min na. O walaka nunu tun b'a bolo.

⁵Masaba jigira sankaba kɔnɔ ka lɔ ni Musa ye. A y'a tɔgɔ fɔ.

⁶ A tɛmɛtɔ Musa ɲafɛ, a pɛrɛnna k'a fɔ ko: «Masaba, Masaba, makaritigi, hinɛbaga Ala. A te dimi joona, a ka ɲumanya n'a ka kantigiya ka bon.

⁷A b'a ka ɲumanya yira adamadenw kɔmɔgɔw la fɔɔ *filankuru caaman. A be tilenbaliyako, ni murutili, ani hakɛ yafa. Nga a te tiɲɛ di mɔgɔ ma, ni tiɲɛ t'a fɛ. A be faaw ka tilenbaliya juru sara u deenw n'u mamadenw ani u tulomasamaw na.»

⁸O yɔrɔnin bɛɛ, Musa birila duguma ka Masaba bato.

⁹A ko: «Masaba, ni ne koo diyara i ye, ne b'a ɲini i fɛ ko i ka taga n'an ye. Jama nin tulo kɔni ka gwɛlɛ, o bɛɛ n'a ta, i k'an ka tilenbaliya n'an ka hakɛ yafa k'an minɛ ka kɛ i yɛrɛ ta ye.»

¹⁰ O kɔ, Masaba ko: «Ne bena bɛn n'aw ye. Ne bena kabakow kɛ i ka jama bɛɛ ɲana, minw ɲɔgɔn ma deli ka kɛ jamana si kɔnɔ, diɲɛ faan si la. Siya minw bɛɛ be i lamini na, olu bena ne Masaba ka kabako kɛwaliw ye, n bena minw kɛ i barika la.

¹¹Ne be min fɔ aw ye bii, aw k'o bato. Ne bena amoriw ni kanaanw, ni itiw ani periziw, ni iviw, ani zebuziw gwɛn ka bɔ aw ɲa.

¹²Aw bena don jamana min na, aw k'aw yɛrɛ minɛ, aw kana bɛn n'o jamana mɔgɔw ye, janko u kana na kɛ jaan ye aw cɛma.

¹³ Aw k'u ka sarakabɔyɔrɔw ci, k'u ka jokabakuruw ci, k'u ka *Asera jaaw tigɛ k'u ben.

¹⁴Aw kana batofɛn wɛrɛ si bato, bari ne Masaba tɔgɔ ye Keliya ye, ne ye Ala ye, ne te sɔn adamaden ka fɛɛn wɛrɛ bato.

¹⁵Aw k'aw yɛrɛ kɔlɔsi, aw kana bɛn n'o jamana mɔgɔw ye. N'o tɛ, n'u b'u ka kakalaya la k'u ka batofɛnw sɔn tuma min na, u bena aw wele, aw fana bena u ka sɔnnikɛfɛnw dumu.

¹⁶N'aw y'u denmusow ta k'u di aw dencɛw ma, u denmusow bena u ka joow sɔn. N'o kɛra, u bena kɛ sababu ye aw deenw b'o kɛ.

¹⁷ «Aw kana joo nigɛlaman dilan.

¹⁸ Aw ka *Buru funubali ɲanagwɛ bato. Aw ka buru dumu, fununan te min na, tile wolonwula kɔnɔ, waati latigɛnin na *Abibu kalo la, i ko ne y'a fɔ aw ye cogo min na, bari aw bɔra Ezipiti o kalo la.

¹⁹ «Deen fɔlɔw bɛɛ ye ne ta ye, hali aw ka begɛnw deen cɛman fɔlɔw, misi fara begɛnmisɛnw kan.

²⁰ Aw ka sagaden di ne ma fali deen fɔlɔ nɔɔ na. N'i ma se k'o kɛ, i k'a kaan kari. Aw ka begɛn di k'aw dencɛ fɔlɔw bɛɛ kunmabɔ. Mɔgɔ si bololakolon kana na ne ɲakɔrɔ.

²¹ «Aw ka baara kɛ tile wɔɔrɔ kɔnɔ, nga tile wolonwulanan na, aw ka lafiɲɛ, hali dannikɛtuma ni sumantigɛtuma na.

²² «Aw ka Sumankura ɲanagwɛ kɛ sumantigɛwaati daminɛ na, ka Sumanladon ɲanagwɛ kɛ sanyɛlɛmatuma na.

²³«Aw ka cɛdenw bɛɛ bena na ne Matigi, Masaba, Isirayɛli ka Ala ɲakɔrɔ, siɲɛ saba saan o saan.

²⁴Ne bena siya wɛrɛw gwɛn ka bɔ aw ɲa k'aw ka jamana boɲa. N'aw be na ne Masaba aw ka Ala ɲakɔrɔ siɲɛ saba saan o saan, mɔgɔ si tena sɔn k'aw ka jamana bɔsi aw la o waati la.

²⁵ «Aw kana begɛn faga saraka ye ne ma k'a kori ni buru ye, fununan be min na. *Hɔrɔnya ɲanagwɛ saraka tɔɔ kana si.

²⁶ «Aw ka na n'aw ka sɛnɛfɛn deen fɔlɔw ɲanaman ye ne Masaba aw ka Ala ka soo kɔnɔ. «Aw kana baden tobi a bamuso sinji la.»

²⁷Masaba y'a fɔ Musa ye tugu ko: «I ka kuma nunu sɛbɛn, bari o le ye n ka bɛɛn nin sindiyɔrɔ ye ni ele ani Isirayɛlidenw ye.»

²⁸Musa ye tile bi naani ni suu bi naani kɛ ni Masaba ye yen, a ma dumuni kɛ, a ma jii min. A ye bɛɛn kuma nunu sɛbɛn walakaw kan, n'o ye sariya tan ye.

²⁹ Tuma min na Musa jigira ka bɔ Sinayi kulu kan ni walaka fila ye a bolo, Masaba ka sariya be minw kan, a tun m'a lɔn ko a ɲada tun be manamanana a kumatuma na ni Masaba ye.

³⁰Arɔn ni Isirayɛlidenw bɛɛ ye Musa ye tuma min na, a ɲada tun be manamanana. U siranna, u ma se ka gwɛrɛ a la.

³¹Nga Musa y'u wele, o la, Arɔn ni jama ɲamɔgɔw bɛɛ segira ka na a fɛ, Musa sɔrɔla ka kuma u fɛ.

³²O kɔ, Isirayɛlidenw bɛɛ gwɛrɛl'a la. Masaba tun ye min fɔ a ye Sinayi kulu kan, a y'o bɛɛ fɔ u ye.

³³Musa tilar'a ka kuma na u fɛ tuma min na, a ye fani biri a ɲada kan.

³⁴N'a tun be don Masaba ɲakɔrɔ tuma o tuma, a tun be fani nin bɔ a ɲada kan, fɔɔ tuma min na a bɔra yen. N'a bɔra tuma min na, min fɔr'a ye, a tun b'o fɔ Isirayɛlidenw ye,

³⁵Isirayɛlidenw b'a ye ko a ɲada be manamana. O kɔ, a be to k'o fani biri a ɲada kan tugu, fɔɔ n'a be don ka kuma ni Masaba ye tugu.