Read dyu Isirayɛlidenw ka bɔko jɔnya la kitabu 38 Bible Online

Isirayɛlidenw ka bɔko jɔnya la kitabu 38 - dyu bible

Isirayɛlidenw ka bɔko jɔnya la kitabu 38

¹U ye saraka jɛnita bɔyɔrɔ dilan ni akasiyayiri ye. A faan naani bɛɛ tun ye kelen ye, a jaɲa n'a boɲa bɛɛ tun ye mɛtɛrɛ fila ni tilan ye. A jaɲa sanfɛ tun ye mɛtɛrɛ kelen ni tilan ye.

²U ye gɔɔn bisigi kɛ a nɔnkɔn naani la k'u ni sarakabɔyɔrɔ nin nɔrɔ ɲɔgɔn na, k'a mɔn ni zira ye.

³U ye sarakabɔyɔrɔ minan nunu bɛɛ dilan ni zira ye: bugurigwɛ cɛminanw, ni pɛluw, ni jifilenw, ni kuruw ɲiin caaman, ani takami bɔfɛnw.

⁴U ye fɛɛn dɔ dilan ni zira ye k'a kɛ i n'a fɔ tɛmɛ, min be don sarakabɔyɔrɔ nin kɔnɔ a cɛmancɛ la, a dagolo jukɔrɔ.

⁵U ye bololanigɛ bisigi naani dilan ni zira ye k'u don o tɛmɛ ziralaman nin nɔnkɔn naani na, olu ka kɛ lɔgɔw donyɔrɔ ye.

⁶U ye akasiyayiri dɔw lɛsɛ k'o mɔn ni zira ye,

⁷ka lɔgɔ nunu don bololanigɛ bisigi nunu na, u ka to sarakabɔyɔrɔ faan fila la, ka kɛ a talɔgɔw ye. U y'a kɛ ni yiri ye, a kɔnɔ ye woo ye.

⁸U ye dagaba n'a jusigilan dilan ni zira ye. Muso minw tun be baara kɛ Ɲɔgɔnkunbɛn fanibugu daa la, u ye daga nin n'a jusigilan dilan ni olu ka dubalenw ye.

⁹O kɔ, u ye fanibugu luu lɔ. A worodugu ɲafan laminifaniw danna ni jese ɲanaman ye. Worodugu ɲafan fɛ, a jaɲa tun ye mɛtɛrɛ bi duuru ye.

¹⁰A tutunanw tun ye mugan ye, ni olu ka jusigilan ziralaman mugan. U ye fani dulonfɛn warigwɛlamanw kɛ u la, ka warigwɛ dilan i n'a fɔ bere, k'o kɛ fani nunu dulonta ye.

¹¹Fanibugu kɔgɔdugu ɲafan fɛ ta kɛra ten fana.

¹²Luu nin kɔnɔ boɲa, tileben faan fɛ, o yɔrɔ fani jaɲa kɛra mɛtɛrɛ mugan ni duuru ye, tutunan tan n'u jusigilan deen tan tun be yen.

¹³Luu nin kɔrɔnfɛla kɔnɔ boɲa fana tun ye mɛtɛrɛ mugan ni duuru ye.

¹⁴K'a ta luu nin donda la ka taga nɔnkɔn dɔ la, o tun ye mɛtɛrɛ wolonwula ni tilan fani ye, ani tutunan saba n'u ka jusigilan deen saba.

¹⁵Faan dɔ nin fana tun be ten.

¹⁶Luu laminifaniw bɛɛ danna ni jese ɲanaman ye.

¹⁷Tutunanw jusigilanw dilanna ni zira ye. Tutunanw fanidulonfɛnw ni fanidulonberew dilanna ni warigwɛ ye. Warigwɛ mɔnna tutunanw kuun na. Luu tutunanw tun nɔrɔnin be ɲɔgɔn na ni warigwɛ fanidulonberew ye.

¹⁸Luu nin donda fani danna ni jese kɔlɔbolaman, ni jese wulenman, ni jesewulen cɔncɔn, ani jese ɲanaman ye. A jaɲa tun ye mɛtɛrɛ tan ye. A jaɲa sanfɛ tun ye mɛtɛrɛ fila ni tilan ye, i n'a fɔ laminifani nunu.

¹⁹A tun dulonna tutunan naani na, u jusigilan naani tun dilanna ni zira ye. Tutunan nunu berew n'u fanidulonfɛnw dilanna ni warigwɛ ye. U ye warigwɛ kɛ tutunanw kuun na.

²⁰Fanibugu nin gweenw ni luu taw bɛɛ dilanna ni zira ye.

²¹U ye fɛɛn minw kɛ ka fanibugu dilan, walakaw bilanin be min kɔnɔ, Masaba ka sariyaw be minw kan, olu daa filɛ nin ye. Levi kɔmɔgɔw y'u jati ka kɛɲɛ ni Musa ka cii ye. Sarakalasebaga Arɔn dencɛ Itamari bilara u ɲa o baara la.

²²Masaba ye min fɔ Musa ye, Zuda kɔmɔgɔ Huri dencɛ Uri deen Bɛtisalɛli y'o bɛɛ dilan.

²³Bɛtisalɛli dɛmɛbaga tun ye Dan kɔmɔgɔ Ayisamaki dencɛ Ooliyabu ye. A tun be se fɛɛn ɲɛgɛnko la, ani fanisɔgɔ la ni jese kɔlɔbolaman, ni jese wulenman, ani jesewulen cɔncɔn, ani jese ɲanaman ye, ani ka baarakura dabɔ.

²⁴Sanu min dira ka kɛ saraka fifata ye, ka don Yɔrɔ Senuman baaraw bɛɛ la, o bɛɛ lajɛnnin tun ye kilo kɛmɛ seegi ni bi wolonwula ni wolonwula ani kɔ, ka kɛɲɛ ni Masaba ka sigiyɔrɔ warigwɛ jaticogo ye.

²⁵ Mɔgɔ minw jatira jama jatiwaati la, warigwɛ min sɔrɔla olu fɛ, o tun ye kilo waa saba ni tan ni wolonwula ani kɔ, ka kɛɲɛ ni Masaba ka sigiyɔrɔ warigwɛ jaticogo ye.

²⁶ Minw jatira, n'u sanda ye mugan ye, walima ka tɛmɛ o kan, u kelen kelen bɛɛ ta ye warigwɛ garamu duuru ye. O tun bɛnna cɛɛ waa kɛmɛ wɔɔrɔ ni saba ani kɛmɛ duuru ni bi duuru (603 550) ma.

²⁷O warigwɛ la, kilo waa saba tun kɛra ka Masaba ka yɔrɔ tutunanw jusigilanw kɛmɛ dilan, ani fanibugu cɛtigɛfani tutunanw taw. Jusigilan kelen ye kilo bi saba ye.

²⁸Warigwɛ kilo tan ni wolonwula ni kɔ min tora, u y'o kɛ ka lamini tutunanw fanidulonfɛnw n'u fanidulonberew dilan, ani k'u kuun mɔn.

²⁹Zira min dira saraka fifata ye, o tun ye kilo waa fila ni kɛmɛ ni mugan ni naani ye.

³⁰U y'o kɛ ka Ɲɔgɔnkunbɛn fanibugu daa la tutunanw jusigilanw dilan, ani sarakabɔyɔrɔ ziralaman, n'a kɔnɔna tɛmɛ, ani sarakabɔyɔrɔ minanw bɛɛ,

³¹ni luu lamini tutunanw jusigilanw, ani luda la taw, ni fanibugu gweenw ani luu taw bɛɛ.