Read dyu Isirayɛlidenw ka bɔko jɔnya la kitabu 39 Bible Online

Isirayɛlidenw ka bɔko jɔnya la kitabu 39 - dyu bible

Isirayɛlidenw ka bɔko jɔnya la kitabu 39

¹U ye Yɔrɔ Senuman baarakɛfaniw dilan ni jese kɔlɔbolaman ye, ni jese wulenman, ni jesewulen cɔncɔn. U ye Arɔn ka sarakalasefaniw dilan, i ko Masaba tun y'a fɔ Musa ye cogo min na.

²U ye sarakalasebagaw kuntigi ka fani dilan ni jese kɔlɔbolaman, ni jese wulenman, ni jesewulen cɔncɔn, ani jese ɲanaman ye, ka sanu kɛ a la,

³U ye sanu gosi k'a pɛnpɛrɛn k'a tigɛtigɛ k'a kɛ i n'a fɔ jese, k'o ni jese kɔlɔbolaman, ani jese wulenman, ni jesewulen cɔncɔn, ani jese ɲanaman don ɲɔgɔn na, baaralɔnbaga ɲanaman y'u dan.

⁴U ye fɛɛn fila dɔw kɛ minw be fani daa fila nunu tugu ɲɔgɔn na a gamanw sanfɛ.

⁵Sarakalasebagaw kuntigi ka fani n'a cɛsirilan dancogo tun ye kelen ye. A tun baarala ni sanujese le ye, ni jese kɔlɔbolaman, ni jese wulenman, ni jesewulen cɔncɔn, ani jese ɲanaman, i ko Masaba tun y'a fɔ Musa ye cogo min na.

⁶U ye kabakuru kɔlɔbolaman dɔw dilan k'u don sanu kɔnɔ, ka Isirayɛli dencɛw tɔgɔw ɲɛgɛn u kan, i n'a fɔ u be taamasiɲɛ lafɛn kɛ cogo min na,

⁷k'o nɔrɔ sarakalasebagaw kuntigi ka fani gaman kan, a ka kɛ hakilijigifɛn ye Isirayɛli kɔmɔgɔw koo la, i ko Masaba tun y'a fɔ Musa ye cogo min na.

⁸U ye disilafani dilan ka kɛɲɛ ni sarakalasebagaw kuntigi ka fani ye. Baaralɔnbaga ɲanaman dɔ le y'o dilan ni sanujese ye, ni jese kɔlɔbolaman, ni jese wulenman, ni jesewulen cɔncɔn, ani jese ɲanaman.

⁹A faan naani bɛɛ tun ye kelen ye. A jaɲa n'a kɔnɔ boɲa bɛɛ bɛnna santimɛtɛrɛ mugan ni duuru ma. A tun kurunin be ka la ɲɔgɔn kan.

¹⁰U ye kabakuru sɔngɔgwɛlɛnw nɔrɔnɔrɔ a la, fɔɔ sira naani. Kabakuru minw tun be sira fɔlɔ kan, o tun ye kabakuru wuleman cɔncɔn ni kabakuru nɛrɛmuguman ani kabakuru binkɛnɛman ye.

¹¹Sira filanan ta tun ye kabakuru bulaman sifa fila ani diyaman ye.

¹²Sira sabanan ta tun ye kabakuru bulaman ni kabakuru ɲɛgɛɲɛgɛnin ani ametisiti ye.

¹³Sira naaninan ta tun ye kabakuru binkɛnɛman, ni kɔlɔbolaman, ani kabakuru binkɛnɛman sifa wɛrɛ ye. U bɛɛ nɔrɔla sanu kɔnɔ.

¹⁴Kabakuru nunu tun ye tan ni fila ye ka kɛɲɛ ni Isirayɛli dencɛw daa ye. U ye Isirayɛli deen tan ni fila nunu kelen kelen bɛɛ tɔgɔ le sɛbɛn kabakuru nunu kelen kelen kan, i n'a fɔ taamasiɲɛ lafɛn be cogo min na.

¹⁵U ye jɔrɔkɔw dilan ni sanu yɛrɛ yɛrɛ ye i n'a fɔ juru, k'u kɛ disilafani na.

¹⁶U ye minɛfɛn fila dɔ kɛ ni sanu ye, ani ka bololanigɛ sifa dɔ dilan fila, o fana ye sanu ye, k'u siri disilafani dakun fila la.

¹⁷U ye sanujɔrɔkɔ fila nunu don bololanigɛ fila nunu na, disilafani dakunw na,

¹⁸ka jɔrɔkɔ dakun fila dɔ nunu don minɛfɛn fila nunu la, o minw be sarakalasebagaw kuntigi ka fani gaman kan a ɲafɛla la.

¹⁹U ye bololanigɛ sifa dɔ dilan deen fila ni sanu ye, k'u siri disilafani dakun fila dɔ nunu na kɔnɔna, sarakalasebagaw kuntigi ka fani kan,

²⁰k'o ɲɔgɔn fila kɛ tugu ni sanu ye, k'u don sarakalasebagaw kuntigi ka fani gaman kɔrɔ faan fila la ɲafɛla la, a kalansira gɛrɛfɛ, a cɛsirilan sanfɛ.

²¹U ye juru kɔlɔbolaman siri disilafani nigɛ nunu na ka taga siri sarakalasebagaw kuntigi ka fani taw la, janko disilafani ka to sarakalasebagaw kuntigi ka fani cɛsirilan sanfɛ, a kana foni ka bɔ a ka fani na. U y'o bɛɛ kɛ i ko Masaba tun y'a fɔ Musa ye cogo min na.

²²Forocadennin min be sarakalasebagaw kuntigi ka fani jukɔrɔ, u y'o bɛɛ dan ni jese kɔlɔbolaman ye.

²³U y'a kaan tigɛ cɛmancɛ la i n'a fɔ nigɛdeleke ta, k'a kaan nin sɔgɔ janko a kana faran.

²⁴U ye gerenadiyiriden bisigiw dilan ni jese kɔlɔbolaman, ni jese wulenman, ni jesewulen cɔncɔn, ani jese ɲanaman ye, k'u siri foroca nin dagolo la,

²⁵ka welenninw dilan ni sanu yɛrɛ yɛrɛ ye k'o don yiriden jaa nunu ni ɲɔgɔn cɛ foroca dagolo la k'a lamini.

²⁶N'u ye welennin kelen don, u be yiridenbisigi kelen don, k'a kɛ ten, fɔɔ ka foroca nin dagolo bɛɛ lamini, u bena to ka min don ka baara kɛ, i ko Masaba tun y'a fɔ Musa ye cogo min na.

²⁷U ye forocabaw dan Arɔn n'a dencɛw ye ni jese ɲanaman ye,

²⁸ka sarakalasebagaw kuntigi ka kunmelekefani n'a ka fugulan masirifɛn kɛ ni jese ɲanaman ye, ani kurusi min danna ni jese ɲanaman ye.

²⁹U ye cɛsirilan dan ni jese ɲanaman ye, ani jese kɔlɔbolaman, ni jese wulenman, ani jesewulen cɔncɔn, k'a ɲɛgɛn, i ko Masaba tun y'a fɔ Musa ye cogo min na.

³⁰U ye yirifeerenbisigi dilan ni sanu yɛrɛ yɛrɛ ye ka sɛbɛnni kɛ a kan, taamasiɲɛ lafɛn cogo la ko: «Nin ye Masaba ta ye,»

³¹k'a siri kunmelekefani ɲafɛ ni juru kɔlɔbolaman ye, a ka to yen i ko Masaba tun y'a fɔ Musa ye cogo min na.

³²A kɛra ten, u ye Ɲɔgɔnkunbɛn fanibugu baara bɛɛ kɛ ka ban. Masaba tun ye min fɔ Musa ye, Isirayɛlidenw y'o bɛɛ kɛ tigitigi.

³³O kɔ, u nana ni fanibugu n'a minanw bɛɛ ye Musa fɛ: a fani minɛfɛnw, n'a lɔgɔw, ani a banabiriw, n'a tutunanw, ani u jusigilanw,

³⁴n'a kuun birifɛnw, sagajigi golo, u ye min wulen, ni golo dɔ minw ka kɛnɛ, n'a cɛtigɛfani,

³⁵ani kɛsu, walakaw be min kɔnɔ, Masaba ka sariya sɛbɛnnin be minw kan, ani kɛsu talɔgɔw, n'a datugulan,

³⁶ani tabali n'a minanw bɛɛ, ni buru min dira Masaba ma,

³⁷ani fitinɛbilayɔrɔ sanu yɛrɛyɛrɛ, ni fitinɛdagaw, ni fitinɛ tulu, an'a minanw bɛɛ,

³⁸sarakabɔyɔrɔ sanulaman, ni tulu mɔnta, ni wusulan kasadiman, ni fanibugu dalafani,

³⁹ani sarakabɔyɔrɔ ziralaman n'a kɔnɔna ziratɛmɛ n'a talɔgɔw, an'a minanw bɛɛ, ni dagaba n'a jusigilan,

⁴⁰ani luu laminifaniw, n'a lamini tutunanw, ani u jusigilanw, ani fanibugu dalafani, ni jurukisɛw, n'a gweenw, ani Ɲɔgɔnkunbɛn fanibugu minanw bɛɛ ye,

⁴¹ni Yɔrɔ Senuman baarakɛfaniw ye: sarakalasebaga Arɔn taw, ni a dencɛw ka kan ka fani minw don k'u ka sarakalasebaara kɛ.

⁴²Masaba tun ye min fɔ Musa ye, Isirayɛlidenw y'o bɛɛ kɛ.

⁴³Musa y'o baara bɛɛ filɛ ka ɲa k'a ye ko Masaba tun y'a fɔ cogo min na, k'u y'o bɛɛ kɛ ten. O kɔ, a ye duba kɛ u ye.