Read dyu Isirayɛlidenw ka bɔko jɔnya la kitabu 40 Bible Online

Isirayɛlidenw ka bɔko jɔnya la kitabu 40 - dyu bible

Isirayɛlidenw ka bɔko jɔnya la kitabu 40

¹Masaba y'a fɔ Musa ye ko:

²«Ɲɔgɔnkunbɛn fanibugu lɔ, i k'o kɛ saan kalo fɔlɔ tile fɔlɔ la.

³Ne ka sariyaw sɛbɛnnin be walaka minw kan, olu be kɛsu min kɔnɔ, i k'o kɛsu nin bila a kɔnɔ k'o datugu ni soo cɛtigɛfani ye,

⁴ka na ni tabali ye k'a minanw labɛn a kan. O kɔ, i be na ni fitinɛbilayɔrɔ ye ka fitinɛw mana,

⁵ka wusulan jɛniyɔrɔ sanulaman bila kɛsu nin ɲafɛ ka fanibugu dalafani dulon daa la.

⁶«Saraka jɛnita bɔyɔrɔ bila Ɲɔgɔnkunbɛn fanibugu daa ɲafɛ,

⁷ka dagaba bila fanibugu ni sarakabɔyɔrɔ cɛ ka jii kɛ a la,

⁸ka lukɛnɛ tutunanw lɔ k'a lamini ka luu dondalafani dulon daa la.

⁹«Tulu mɔnta ta ka bugu n'a kɔnɔnafɛnw bɛɛ mɔn, i bena o bɛɛ kɛ ne ta ye ten. O be kɛ fɛɛn saniyanin ye.

¹⁰I be saraka jɛnita bɔyɔrɔ n'a minanw bɛɛ mɔn ni tulu ye k'a kɛ ne ta ye. O la, sarakabɔyɔrɔ bena kɛ fɛɛn ye min saniyanin be kosɔbɛ.

¹¹I be dagaba n'a jusigilan mɔn k'o kɛ ne ta ye,

¹²ka gwɛrɛ ni Arɔn n'a dencɛw ye Ɲɔgɔnkunbɛn fanibugu daa la k'u ko,

¹³ka sarakalasefaniw don Arɔn kaan na ka tulu kɛ a la k'a kɛ ne ta ye janko a ka se ka sarakalasebaara kɛ ne ye,

¹⁴ka gwɛrɛ n'a dencɛw ye fana ka forocabaw don u la,

¹⁵k'u mɔn ni tulu ye i n'a fɔ i y'u facɛ mɔn cogo min na, janko u ka se ka sarakalasebaara kɛ ne ye. O bena u bila sarakalasebaara la, baara min bena to ka kɛ waati nataw bɛɛ la.»

¹⁶Masaba tun ye min fɔ Musa ye, a y'o bɛɛ kɛ ten.

¹⁷Saan filanan u bɔnin kɔ Ezipiti, o kalo fɔlɔ tile fɔlɔ loon, bugu nin lɔra.

¹⁸Musa y'a lɔ: a y'a jusigilanw sigi, k'a lɔgɔw lɔ, ka banabiriw don a la, k'a tutunanw lɔ,

¹⁹k'a kunbirifaniw biri a kan i ko Masaba tun y'a fɔ a ye cogo min na.

²⁰Masaba ka sariyaw be walaka minw kan, a y'u ta k'u don kɛsu nin kɔnɔ, k'o talɔgɔw don kɛsu nigɛw la k'a datugulan biri a kan.

²¹A ye kɛsu nin don bugu kɔnɔ ka soo cɛtigɛfani dulon, ka kɛsu datugu n'a ye, i ko Masaba tun y'a fɔ a ye cogo min na.

²²A ye tabali bila Ɲɔgɔnkunbɛn fanibugu kɔnɔ a kɔgɔdugu ɲafan fɛ, soo cɛtigɛfani ɲafɛ,

²³ka buruw labɛn o kan Masaba ɲakɔrɔ, i ko Masaba tun y'a fɔ a ye cogo min na.

²⁴A ye fitinɛbilayɔrɔ bila Ɲɔgɔnkunbɛn fanibugu kɔnɔ k'a ɲaa sin tabali ma bugu nin worodugu ɲafan fɛ,

²⁵ka fitinɛw mana Masaba ɲakɔrɔ, i ko Masaba tun y'a fɔ a ye cogo min na.

²⁶A ye sarakabɔyɔrɔ sanulaman bila Ɲɔgɔnkunbɛn fanibugu cɛtigɛfani ɲafɛ,

²⁷ka wusulan kasadiman jɛni a kan, i ko Masaba tun y'a fɔ a ye cogo min na.

²⁸O kɔ, a ye fanibugu dalafani dulon daa la.

²⁹A ye saraka jɛnita bɔyɔrɔ bila Ɲɔgɔnkunbɛn fanibugu daa la, ka saraka jɛnita ni suman saraka bɔ a kan, i ko Masaba tun y'a fɔ a ye cogo min na,

³⁰ka dagaba bila Ɲɔgɔnkunbɛn fanibugu ni sarakabɔyɔrɔ cɛ ka jii kota kɛ a la.

³¹Musa ni Arɔn n'a dencɛw y'u bolo n'u seenw ko o la.

³²N'u tun be don Ɲɔgɔnkunbɛn fanibugu kɔnɔ, walima ka gwɛrɛ sarakabɔyɔrɔ la tuma min na, u tun be ko ten, i ko Masaba tun y'a fɔ Musa ye cogo min na.

³³O kɔ, Musa ye lukɛnɛ tutunanw lɔ ka fanibugu ni sarakabɔyɔrɔ lamini ka dalafani dulon luda la. A kɛra ten, a tilara baara la.

³⁴ O kɔ, sankaba jigira Ɲɔgɔnkunbɛn fanibugu kunna, Masaba nɔɔrɔ y'a fa.

³⁵Musa ma se ka don a kɔnɔ, bari sankaba tor'a kunna, Masaba nɔɔrɔ y'a fa fana.

³⁶Isirayɛlidenw ka taama na, ni sankaba nin wilila ka bɔ fanibugu kunna tuma o tuma, u tun be wili ka sira minɛ.

³⁷Nga n'a ma wili, u tun te wili ka sira minɛ fana fɔɔ n'a wilila loon min na.

³⁸Masaba ka sankaba tun be fanibugu kunna tilefɛ. Sufɛ, a be kɛ tasuma ye Isirayɛlidenw bɛɛ ɲana u ka taamaw bɛɛ la.