Read dyu Isirayɛlidenw ka bɔko jɔnya la kitabu 6 Bible Online

Isirayɛlidenw ka bɔko jɔnya la kitabu 6 - dyu bible

Isirayɛlidenw ka bɔko jɔnya la kitabu 6

¹Masaba y'a fɔ Musa ye ko: «Ne bena min kɛ Ezipiti masacɛ la, i bena o ye sisan. Ne bolo barikaman sababu la, a bena sɔn Isirayɛlidenw ka taga. Ne bolo barikaman sababu la, a yɛrɛ bena u gwɛn ka bɔ a ka jamana kɔnɔ.»

² Ala y'a fɔ Musa ye tugu ko: «Ne ye Masaba ye.

³Ne ye n yɛrɛ yira Ibrayima ni Isiyaka ni Yakuba la ka tɔgɔ min fɔ u ye, o ye Setigi Ala ye. Nga ne ma n yɛrɛ yira u la k'a fɔ ko ne tɔgɔ ko Masaba.

⁴Ne ye layidu ta u ye ko ne bena Kanaan jamana d'u ma, u tun siginin be lonanya la min kɔnɔ.

⁵Sisan, ne ye Isirayɛlidenw ŋunakan mɛn jɔnyabaara la, Ezipitikaw b'o bila min na. Ayiwa, ne ye n hakili jigi n ka layidu la.

⁶O la, i k'a fɔ Isirayɛlidenw ye ko ne le ye Masaba ye. Ne bena aw bɔ Ezipitikaw ka fanga kɔrɔ, ne bena aw bɔsi ka bɔ u ka jɔnya la. Ne bena u ɲaa gwan kosɔbɛ k'aw kisi ni sebagaya ye.

⁷Ne bena aw kɛ ne ka mɔgɔw ye, ne bena kɛ aw ka Ala ye. Aw ben'a lɔn ko ne ye Masaba ye, aw ka Ala, ko ne le ye aw bɔ Ezipitikaw ka fanga kɔrɔ.

⁸Ne ye layidu ta ko ne bena jamana min di Ibrayima ni Isiyaka ani Yakuba ma, ne bena taga n'aw ye o jamana nin kɔnɔ k'a di aw ma a ka kɛ aw ta ye. Ne ye Masaba le ye.»

⁹Musa y'o kuma fɔ Isirayɛlidenw ye, nga u ma mɛnni kɛ a fɛ bari u fari tun fagara u ka jɔnyabaara juguya kosɔn.

¹⁰Masaba y'a fɔ Musa ye ko:

¹¹«Ta'a fɔ Ezipiti masacɛ ye ko a k'a to Isirayɛlidenw ka bɔ a ka jamana na ka taga.»

¹²Nga Musa y'a fɔ Masaba ye ko: «Ni Isirayɛlidenw yɛrɛ ma sɔn ka mɛnni kɛ ne fɛ, Ezipiti masacɛ bena mɛnni kɛ ne fɛ cogo di? Ne fana do te se kuma na kosɔbɛ.»

¹³Masaba kumana Musa ni Arɔn fɛ tugu Isirayɛlidenw ni Ezipiti masacɛ ka koo la, k'a fɔ ko u ka bɔ ni Isirayɛlidenw ye Ezipiti jamana kɔnɔ.

¹⁴Isirayɛlidenw ka gwatigiw tɔgɔ filɛ nin ye: Isirayɛli dencɛ fɔlɔ Urubɛn dencɛw ye: Anɔki ni Palu ni Ɛsirɔn ani Karimi. Urubɛn ka fadenyabolow bɔra olu le la.

¹⁵Simeyɔn dencɛw ye: Yemuyɛli ni Yamɛn, ani Owadi ni Yakɛn, ni Sowari ani kanaanmuso dencɛ Sayuli. Simeyɔn ka fadenyabolow bɔra olu le la.

¹⁶ Levi dencɛw n'u kɔmɔgɔw tɔgɔw filɛ nin ye: Gɛrisɔn ni Keyati, ani Merari. Levi sii kɛra saan kɛmɛ ni bi saba ni wolonwula ye.

¹⁷Gɛrisɔn dencɛw ye Libini ni Simeyi ye. Fadenyabolow bɔra olu la fana.

¹⁸Keyati dencɛw ye Amuramu ni Yiseyari ni Eburɔn ani Uziyɛli ye. Keyati sii kɛra saan kɛmɛ ni bi saba ni saba ye.

¹⁹Merari dencɛw ye Maali ni Musi ye. Levi ka fadenyabolow bɔra olu le la ka kɛɲɛ n'u ka burujuw ye.

²⁰Amuramu y'a faa dɔgɔmuso Yokɛbɛdi furu, ale ye Arɔn ni Musa wolo. Amuramu sii kɛra saan kɛmɛ ni bi saba ni wolonwula ye.

²¹Yiseyari dencɛw ye: Kore ni Nɛfɛgi ani Zikiri ye.

²²Uziyɛli dencɛw ye: Misayɛli ni Elisafan ani Sitiri ye.

²³Arɔn ye Aminadabu denmuso Elizabɛti furu, Naasɔn balimamuso tun lo. Elizabɛti ye Nadabu ni Abiyu ni Eleyazari ani Itamari wolo Arɔn ye.

²⁴Kore dencɛw ye: Asiri ni Ɛlikana ani Abiyasafu ye. Kore ka fadenyabolow bɔra olu le la.

²⁵Arɔn dencɛ Eleyazari ye Putiyɛli denmuso dɔ furu, ale ye Pinasi wolo a ye. Levi ka fadenyabolow bɔra olu le la.

²⁶Masaba y'a fɔ Arɔn ni Musa le ye k'u ka bɔ ni Isirayɛlidenw ye Ezipiti jamana kɔnɔ, ka kɛɲɛ n'u ka gwatigiw ye.

²⁷Olu le kumana Ezipiti masacɛ fɛ, janko ka bɔ ni Isirayɛlidenw ye Ezipiti. O Musa ni Arɔn kelen kelen tun lo.

²⁸Masaba kumana Musa fɛ Ezipiti jamana na tuma min na,

²⁹a y'a fɔ a ye ko: «Ne ye Masaba ye. Ne be min fɔ i ye, i k'o bɛɛ fɔ Ezipiti masacɛ ye.»

³⁰Nga Musa y'a fɔ Masaba ye ko: «Ne te se kuma na, masacɛ bena mɛnni kɛ ne fɛ cogo di?»