Read dyu Isirayɛlidenw ka bɔko jɔnya la kitabu 7 Bible Online

Isirayɛlidenw ka bɔko jɔnya la kitabu 7 - dyu bible

Isirayɛlidenw ka bɔko jɔnya la kitabu 7

¹Masaba y'a fɔ Musa ye ko: «A filɛ, ne b'i kɛ i n'a fɔ Ala, Ezipiti masacɛ ɲana. I kɔrɔcɛ Arɔn bena kɛ i ka kira ye.

²Ne bena fɛɛn o fɛɛn fɔ i ye, i kɔrɔcɛ Arɔn bena o fɔ masacɛ ye, ko a k'a to Isirayɛlidenw ka bɔ a ka jamana na ka taga.

³ Nga ne bena masacɛ dusu gwɛlɛya. Ne bena taamasiɲɛ ni kabako caaman kɛ Ezipiti jamana na,

⁴nga masacɛ tena sɔn k'aw lamɛn fewu. Ne bena n bolo la Ezipiti kan. Ne bena bɔ ni n ka jama ye, n ka mɔgɔw, Isirayɛlidenw fanga na, u be bɔ Ezipiti jamana na.

⁵Ni ne ye ne bolo la Ezipiti kan loon min na ka Isirayɛlidenw bɔ u cɛma, o tuma na, Ezipitikaw ben'a lɔn ko ne le ye Masaba ye.»

⁶Masaba tun y'a fɔ Musa ni Arɔn ye ko u ka min kɛ, u y'o kɛ a cogo la.

⁷Musa ni Arɔn kumana masacɛ fɛ waati min na, Musa sii tun ye saan bi seegi ye, Arɔn sii tun ye saan bi seegi ni saba ye.

⁸Masaba y'a fɔ Musa ni Arɔn ye ko:

⁹«Ni Ezipiti masacɛ y'a fɔ aw ye ko aw ka kabako dɔ kɛ, i k'a fɔ Arɔn ye ko a k'a ka bere fili duguma masacɛ ɲakɔrɔ, k'o bena yɛlɛma ka kɛ saa ye.»

¹⁰O la, Musa ni Arɔn tagara masacɛ fɛ. Masaba tun ye min fɔ, u y'o kɛ. Arɔn y'a ka bere fili duguma masacɛ n'a ka mɔgɔbabaw ɲana, bere nin yɛlɛmana ka kɛ saa ye.

¹¹Masacɛ fana y'a ka lɔnnikɛlaw ni subagaw wele. Ezipiti lɔnnikɛla nunu y'o ɲɔgɔn kɛ n'u ka lɔnniya ye.

¹²U kelen kelen bɛɛ y'u ka berew fili duguma, u yɛlɛmana ka kɛ saaw ye. Nga Arɔn ka bere ye olu taw kunun.

¹³O bɛɛ n'a ta, ka kɛɲɛ ni Masaba ka kuma fɔnin ye, masacɛ dusu gwɛlɛyara, a ma sɔn ka mɛnni kɛ Musa ni Arɔn fɛ.

¹⁴Masaba y'a fɔ Musa ye ko: «Masacɛ dusu gwɛlɛyara, a ma sɔn k'a to jama ka taga.

¹⁵Sini sɔgɔma joona, masacɛ be taga bada la tuma min na, i ka ta'a kunbɛn jii daa la. Bere min tun yɛlɛmana ka kɛ saa ye, i ka taga n'o ye i bolo.

¹⁶I k'a fɔ a ye ko: ‹Masaba, eburuw ka Ala tun ye ne ci k'a fɔ i ye ko i k'a to a ka jama ka ta'a bato kongokolon kɔnɔ. Halibi i ma sɔn ka mɛnni kɛ.

¹⁷ O la, ko i ben'a lɔn ko ale ye Masaba ye cogo min na, o filɛ: bere min be ne bolo, ne bena Nili baji gosi n'o ye, jii bena yɛlɛma ka kɛ joli ye.

¹⁸Jigɛ minw be baji la, olu bena sa, baji kasa bena bɔ kosɔbɛ, Ezipitikaw tena se k'a jii min.› »

¹⁹Masaba y'a fɔ Musa ye fana ko: «A fɔ Arɔn ye ko a k'a ka bere ta k'a bolo wili Ezipiti jiyɔrɔw sanfɛ, u ka bajiw n'u ka kɔɔw n'u ka wolonkotow n'u ka jii lɔyɔrɔ bɛɛ. U bena kɛ joli ye. Joli bena kɛ Ezipiti faan bɛɛ la, hali minan yirilamanw ni kabakurulamanw kɔnɔ.»

²⁰Masaba ye min fɔ, Musa ni Arɔn y'o kɛ. A y'a ka bere kɔrɔta ka baji gosi n'a ye Ezipiti masacɛ n'a ka mɔgɔbabaw ɲana. Baji bɛɛ yɛlɛmana ka kɛ joli ye.

²¹Jigɛ minw tun be baji la, olu sara, baji kasa tora ka bɔ fɔɔ Ezipitikaw tun te sera k'o jii min tugu. Joli tun be Ezipiti faan bɛɛ la.

²²Nga Ezipiti lɔnnikɛlaw fana y'o koow ɲɔgɔn kɛ n'u ka lɔnniya ye. Ka kɛɲɛ ni Masaba ka kuma fɔnin ye, masacɛ dusu gwɛlɛyara, a ma sɔn ka mɛnni kɛ Musa ni Arɔn fɛ.

²³A kɔsegira ka ta'a ka soo i n'a fɔ foyi ma kɛ.

²⁴Ezipitikaw bɛɛ ye dingɛw sogi bada la ka jii minta ɲini, bari u tun te sera ka baa jii min.

²⁵Masaba y'a bolo la baji kan, tile wolonwula kɔnɔ.

²⁶O kɔ, Masaba y'a fɔ Musa ye ko: «Taga Ezipiti masacɛ fɛ k'a fɔ a ye ko Masaba ko a k'a to ne ka jama ka taga ne bato.

²⁷Ko n'a ma sɔn k'u to u be taga, ne ben'a ka jamana faan bɛɛ kɛ tɔrisenjanw ye k'u tɔɔrɔ.

²⁸Tɔrisenjanw bena caya Nili baji kɔnɔ fɔɔ ka dama tɛmɛ. Ko u bena bɔ ka don aw ka soo kɔnɔ ka don aw ka sibon na ka yɛlɛ aw ka dilan kan. U bena don aw ka mɔgɔbabaw ka soow kɔnɔ ka yɛlɛ aw ka mɔgɔw kan, ani ka don aw ka burudilanyɔrɔw la ani u nɔɔniyɔrɔw la.

²⁹Ko tɔrisenjanw bena yɛlɛ ale, n'a ka mɔgɔw kan, n'a ka mɔgɔbabaw bɛɛ kan.»