Read dyu Isirayɛlidenw ka bɔko jɔnya la kitabu 9 Bible Online

Isirayɛlidenw ka bɔko jɔnya la kitabu 9 - dyu bible

Isirayɛlidenw ka bɔko jɔnya la kitabu 9

¹Masaba y'a fɔ Musa ye ko: «Taga Ezipiti masacɛ fɛ, k'a fɔ a ye ko ne, Masaba, eburuw ka Ala ko a k'a to ne ka jama ka taga ne bato.

²Ko n'a ma sɔn k'a to u ka taga, ko n'a y'u minɛ k'u to yan,

³ko a ka begɛn minw be kongo la, ne, Masaba bena banajugu bila olu la, a ka soow n'a ka faliw ani a ka ɲɔgɔmɛw n'a ka misiw, ani a ka begɛnmisɛnw.

⁴Ne, Masaba bena faranfasili kɛ Isirayɛlidenw ka begɛnw ni Ezipitikaw taw cɛ. Isirayɛlidenw ka begɛn si tena sa.»

⁵Masaba ye waati latigɛ k'a fɔ ko: «Sini, ne Masaba bena o kɛ jamana kɔnɔ.»

⁶O dugusagwɛ, a y'o kɛ. Ezipitikaw ka begɛnw bɛɛ sara, nga Isirayɛlidenw taw si ma sa.

⁷Masacɛ ye mɔgɔw ci ka taga filɛli kɛ. U tagar'a sɔrɔ ko Isirayɛlidenw ka begɛnw si ma sa, hali deen kelen. Nga masacɛ dusu gwɛlɛyara halibi, a ma sɔn k'a to jama ka taga.

⁸Masaba y'a fɔ Musa ni Arɔn ye ko: «Aw k'aw tigɛ fa dibi kɔnɔ bugurigwɛ la, Musa bena o seri sanfɛ Ezipiti masacɛ ɲana.

⁹O bena kɛ gwangwan ye Ezipiti jamana faan bɛɛ la. O bena kɛ sababu ye sumuninw be bɔ mɔgɔw ni begɛnw na ka nɛɛn don ka kɛ joliw ye yɔrɔ bɛɛ jamana kɔnɔ.»

¹⁰ O la, Musa ni Arɔn ye bugurigwɛ cɛ dibi kɔnɔ ka taga lɔ masacɛ ɲafɛ. Musa y'o seri sanfɛ, sumuninw bɔra mɔgɔw ni begɛnw na, ka nɛɛn don ka kɛ joli ye.

¹¹Lɔnnikɛlaw ma se ka lɔ Musa ɲa sumuninw kosɔn, bari u bɔra lɔnnikɛlaw ni Ezipitika tɔw bɛɛ la.

¹²Masaba ye masacɛ dusu gwɛlɛya. A ma sɔn ka mɛnni kɛ Musa ni Arɔn fɛ, i n'a fɔ Masaba tun y'a fɔ Musa ye cogo min na.

¹³O kɔ, Masaba y'a fɔ Musa ye ko: «Wili sɔgɔma joona ka taga Ezipiti masacɛ kunbɛn k'a fɔ a ye ko ne Masaba, eburuw ka Ala ko a k'a to ne ka jama ka taga ne bato.

¹⁴Ko n'o tɛ, sisan kɔni, ne bena tɔɔrɔbaw la a kan, n'a ka mɔgɔbabaw, n'a ka mɔgɔw kan, waasa a k'a lɔn ko ne ɲɔgɔn te dugukolo kan.

¹⁵Ko ni ne tun ye n bolo kɔrɔta k'ale n'a ka mɔgɔw gosi ni fɔɲɔbana ye, u tun bena halaki ka tunu ka bɔ dugukolo kan pewu.

¹⁶ Nga ne y'a to yen waasa ka n ka sebagaya yira a la, ani ne tɔgɔ ka fɔ diɲɛ faan bɛɛ la.

¹⁷Ko halibi a b'a jaa gwɛlɛyara ka ne ka jama bali, a te sɔnna k'u to u be taga.

¹⁸K'o le kosɔn, sini nin waati nin ɲɔgɔn na, ne ben'a kɛ sanbɛrɛ be ben ka juguya kosɔbɛ, min ɲɔgɔn ma deli ka kɛ Ezipiti jamana kɔnɔ kabini a sigira fɔɔ ka na se bii ma.

¹⁹Ayiwa, sisan ko a ka cii bila ko a ka begɛnw n'a ka fɛɛn minw bɛɛ be kongo kɔnɔ, k'u ka na ni olu bɛɛ ye soo kɔnɔ k'u mara, bari ni mɔgɔ, walima begɛnw fɛɛn o fɛɛn mana sɔrɔ kongo la, n'u ma na soo, sanbɛrɛ bena ben olu bɛɛ kan k'u faga.»

²⁰Masaba ka kuma ye siranya bila Ezipiti masacɛ ka mɔgɔbaba minw na, olu teliyara k'u ka jɔɔnw n'u ka begɛnw ladon soo kɔnɔ.

²¹Nga minw m'a ka kuma jati, olu y'u ka jɔɔnw n'u ka begɛnw to kongo la.

²²O kɔ, Masaba y'a fɔ Musa ye ko: «E k'i bolo wili sanfɛ, waasa sanbɛrɛ ka ben mɔgɔw kan, ni begɛnw, ani suman sifaw bɛɛ kan forow kɔnɔ, Ezipiti jamana faan bɛɛ la.»

²³Musa y'a ka bere kɔrɔta sanfɛ tuma min na, Masaba ye sanpɛrɛn ni sanbɛrɛ bila ka jigi. Sanpɛrɛn jigira dugukolo kan. Masaba y'a kɛ sanbɛrɛ benna Ezipiti jamana kɔnɔ.

²⁴ Sanbɛrɛ benna, saan tun be manamana. A juguyara fɔɔ o ɲɔgɔn tun ma deli ka kɛ Ezipiti jamana na kabini a kɛra jamana ye.

²⁵Fɛɛn o fɛɛn tun be kongo kɔnɔ, mɔgɔ fara begɛnw kan, sanbɛrɛ y'o bɛɛ gosi, ka kongo kɔnɔ suman ni yiriw bɛɛ gosi k'u karikari Ezipiti jamana yɔrɔ bɛɛ la.

²⁶Sanbɛrɛ ma se jamana nin yɔrɔ min na, o kɛra Gosɛn mara ye, Isirayɛlidenw tun siginin be yɔrɔ min na.

²⁷Ezipiti masacɛ ye Musa ni Arɔn wele k'a fɔ u ye ko: «Sisan, ne ye hakɛ kɛ. Tiɲɛ be Masaba fɛ, ne ni n ka mɔgɔw le filila.

²⁸Aw ka Masaba daali, janko saan kana pɛrɛn, sanbɛrɛ kana ben tugu. Ne ben'a to aw be taga, ne tena aw bali tugu.»

²⁹Musa y'a fɔ a ye ko: «Ni ne bɔra dugu kɔnɔ tuma min na, ne bena n bolow wili Masaba faan fɛ. Saan tena pɛrɛn tugu, sanbɛrɛ fana tena ben tugu, waasa i k'a lɔn ko dugukolo ye Masaba ta ye.

³⁰Nga, ne y'a lɔn ko halibi, e n'i ka mɔgɔbabaw, aw te siran Masa Ala ɲa.»

³¹O y'a sɔrɔ suman gwanninmanw tun wolola ka ban, lɛnsun tun feerenna, o bɛɛ cɛnna.

³²Nga suman minw ka suma, olu ma cɛn, bari olu mɔwaati tun ma se.

³³Musa bɔra masacɛ fɛ ka se dugu kɔfɛ tuma min na, a y'a bolow wili Masaba faan fɛ. Sanpɛrɛn ni sanbɛrɛ lɔra, sanji lɔra.

³⁴Masacɛ y'a ye ko sanji ni sanpɛrɛn ani sanbɛrɛ lɔra minkɛ, a ye hakɛ kɛ tugu. Ale n'a ka mɔgɔbabaw y'u dusu gwɛlɛya.

³⁵Masacɛ dusu gwɛlɛyara. A ma sɔn k'a to Isirayɛlidenw ka taga, i ko Masaba tun y'a fɔ Musa barika la cogo min na.