Read dyu Zɔbu ka kitabu 11 Bible Online

Zɔbu ka kitabu 11 - dyu bible

Zɔbu ka kitabu 11

¹Sofari ka bɔ Naama y'a fɔ Zɔbu ye ko:

²«Nin kuma caaman nin ɲɔgɔn be se ka fɔ ni mɔgɔ ma dɔ fɔ wa? Mɔgɔ min daa ka di, o t'a yira ko tiɲɛ b'a tigi fɛ!

³I ka kuma diman ben'a kɛ mɔgɔw be je kɛ? I bena e ɲaa don mɔgɔ la ten, ni dɔ ma fɔ i ye wa?

⁴I ko e ka fɔta ye tiɲɛ ye, ko Ala yɛrɛ y'a lɔn ko jalakiyɔrɔ t'i la.

⁵Uun! Ni Ala tun ko a be dɔ fɔ sisan, n'a tun ko a b'a daa don i ka koo la,

⁶n'a tun y'a ka lɔnniya dogonin yira i la, min be tɛmɛ an ta kan, i tun ben'a ye ko Ala b'i ka fili dɔw ye k'a to yen.

⁷I be se ka Ala ka kodogoninw lɔn wa? Walima i be se ka Setigi ka sekow lɔn wa?

⁸U tɛmɛna sankolo yɛrɛ kan, i be se ka mun kɛ? U ka dun ka tɛmɛ lahara kan, i bena mun le faamu o la?

⁹U boɲa tɛmɛna dugukolo ta kan, u boɲa tɛmɛna kɔgɔji kan.

¹⁰Ni Ala ye kojugukɛla dɔ minɛ, n'a ko a b'a tigilamɔgɔ kiti, jɔn be se ka ban?

¹¹Bari a be mɔgɔkolon lɔn, kuun t'a la ka sɛgɛsɛgɛli kɛ a ka kojugu la.

¹²Nga naloman tena kɛ hakilitigi ye fɔɔ loon min na kongofali ye soo kɔnɔ fali wolo.

¹³Ele kɔni, e ka kan k'i ɲaa sin Ala ma, k'a daali k'i bolo wili sanfɛ.

¹⁴Ni e te sɔn ka kojugu kɛ, ni e te sɔn ka to tilenbaliyako la,

¹⁵i bena se k'i kuun kɔrɔta ni kunko t'i kunna, o le ben'a kɛ i jaa be gwɛlɛya e te siran tugu.

¹⁶O la, e tena miiri i ka sɛgɛn la tugu, i bena u filɛ i ko jii le be woyora.

¹⁷I ka tile bena bɔ ka manamana i ko tilefɛla, dibi bena yɛlɛma ka kɛ i ko dugugwɛ kɛnɛ.

¹⁸I bena jigi sɔrɔ kosɔbɛ, e jigi bena fa. I bena filɛli kɛ i gɛrɛfɛ, i bena la hɛrɛ la.

¹⁹I bena la, mɔgɔ si tena i sigɛn tugu. Mɔgɔ caaman ben'a fɔ ko u b'i nigɛnigɛ.

²⁰Nga mɔgɔjugu kɔni bena dɛmɛ ɲini fɔɔ a ɲaa be ja, a tena dɛmɛbaga sɔrɔ, a jigi te foyi kan tugu ni saya tɛ.»