Read dyu Zɔbu ka kitabu 12 Bible Online

Zɔbu ka kitabu 12 - dyu bible

Zɔbu ka kitabu 12

¹Zɔbu y'a jaabi ko:

²«Tiɲɛ na, aw le kɛra adamadenw bɛɛ la lɔnnikɛlaw ye, lɔnniya fana bena dan aw le ma.

³Hakili be ne fɛ i ko aw fana, ne ma l'a la ko aw ka fisa ni ne ye dɛ. Aw ye fɛɛn min fɔ, mɔgɔ bɛɛ b'o lɔn.

⁴Ne le kɛra n teriw ka yɛlɛkofɛn ye, ne min be Ala daali, min tun be to ka n jaabi. Mɔgɔɲuman, mɔgɔtilennin le kɛra yɛlɛkofɛn ye.

⁵‹Sigɛnbagatɔ ka kan ni dɔgɔya ye kosɔbɛ.› O le ye mɔgɔ ɲasumaninw ka fɔta ye, u b'o le fɔ barikatanw ye.

⁶Benkannikɛlaw ka soow be hɛrɛ la. Mɔgɔ minw be don Ala gasi la, olu be ɲasuma na, u yɛrɛ ka fanga y'u jigi ye.

⁷I ka begɛnw ɲininga, u ben'a ɲafɔ i ye. I ka kɔnɔw fana ɲininga, u ben'a ɲaa yira i la.

⁸I ka miiri dugukolo la, o bena hakili d'i ma, kɔgɔji kɔnɔ jigɛw ben'a fɔ i ye.

⁹Dɔ be olu cɛma min t'a kala ma wa? N'a t'a lɔn ko Masaba le y'o bɛɛ kɛ wa?

¹⁰Nimanfɛnw bɛɛ nii b'a bolo, adamaden ka ninakiliko b'a bolo.

¹¹Tulo be kuma sɛgɛsɛgɛ, i ko nɛɛn be dumuni nɛnɛ cogo min na.

¹²Lɔnniya be sɔrɔ mɔgɔkɔrɔbaw fɛ, hakilitigiya be sɔrɔ sitigi fɛ.

¹³Lɔnniya ni fanga ye Ala ta ye, sebagaya ni hakilitigiya fana y'a ta ye.

¹⁴Ni Ala ye fɛɛn min cɛn, o te se ka lalaga tugu. N'a ye mɔgɔ min dɛrɛ, o bɔsibaga te yen.

¹⁵N'a ye sanji lɔ, o ye jaa ye. N'a y'a di, dugukolo yɔrɔ bɛɛ be fa.

¹⁶Fanga ni see y'a ta ye, mɔgɔ min filila, walima min y'a tɔɲɔgɔn fili, olu bɛɛ y'a ta ye.

¹⁷Ale lo be ɲamɔgɔw kɛ hakilitanw ye, ale lo be kititigɛlaw bila hakiliwili la.

¹⁸Ale lo be masacɛw ka fanga cɛn, a be tila k'o bila jɔnya la.

¹⁹Ale lo be sarakalasebagaw kɛ hakilitanw ye, fangatigi minw ka fanga sigira ka ɲa, ale lo be olu ka fanga ban yɔrɔnin kelen.

²⁰A be kuma cɛn kumalɔnbaga daa la, a be mɔgɔkɔrɔbaw kɛ u be dɛsɛ faamuli la.

²¹A be mɔgɔbaba dɔgɔya, a be mɔgɔfariman fanga bɔsi a la yɔrɔnin kelen.

²²A be yeelen bɔ dingɛw kɔnɔ, a be dibijugu koo yira yeelen na.

²³A be siya buguya, ka tila k'u ta cɛn. A be siya caya, ka tila k'u tunu.

²⁴A be hakilitigiya bɔsi jamana ɲamɔgɔw la, a b'u bila kunfɛyaala la kongokolon kɔnɔ!

²⁵A b'u bila mɔmɔni na dibi kɔnɔ sufɛ. A b'u bila talontalon na i ko dɔrɔtɔw.