Read dyu Zɔbu ka kitabu 14 Bible Online

Zɔbu ka kitabu 14 - dyu bible

Zɔbu ka kitabu 14

¹«Muso le be adamaden wolo, adamaden sii man ca, a fana b'a kɛ sɛgɛn na.

²A be i ko feeren, a be yɛrɛkɛ, dɔɔni a be ja. A be i ko suma, yanni dɔɔni a be tɛmɛ.

³E b'i ɲaa to o kan ten. I be taga ni ne ye kiti kama.

⁴Jɔn be se ka fɛnsaniyanin bɔ fɛnnɔgɔnin na? O tigi te yen.

⁵Adamaden sii daan lɔnin lo, ele Ala yɛrɛ le y'a sii kaloda latigɛ, a te se ka tɛmɛ min kan.

⁶E ɲaa bɔ a kan, k'a to a be lafiɲɛ, a ka se ka nisɔndiya, i ko baarakɛla, baara jigituma na.

⁷Jigi be yiri yɛrɛ fɛ do. U man'a tigɛ, a be tila ka nɛrɛ, a te fɔn bolomisɛn na,

⁸hali n'a liliw kɔrɔla dugukolo kɔnɔ cogo o cogo, a juu ka kɛ i ko a sara dugukolo la,

⁹jii mana se a ma dɔrɔn, a be falen i ko yirikura.

¹⁰Nga ni adamaden sara, a banna pepewu. Ni adamaden sara, a be kɛ mun ye?

¹¹Kɔgɔji be se ka ban, bajiw be se ka ban ka ja.

¹²Adamaden fana be jɛngɛ ka la, a te wili tugu, a tena kunun sanni sankolo ka tɛmɛ, a tena kunun o sinɔgɔ nin na.

¹³Ala, ni e tun sɔnna ka ne dogo lahara, ka n to yen fɔɔ i ka dimi ka ban, ka tila k'i hakili to ne la, waati dɔ latigɛnin kɔfɛ kɔni!

¹⁴Adamaden min sara, o be se ka kunun tugu wa? Ne tun bena muɲu ka kɔnɔni kɛ n ka baarawaati la, fɔɔ ne nɔtawaati ka se.

¹⁵O la, ni e ye ne wele, n be i jaabi. Ne yeko nigɛ bena i minɛ, ne min ye i ka danfɛn ye.

¹⁶Sisan i be ne tɛmɛyɔrɔ bɛɛ jati minɛna, nga i tena ne ka fili jati minɛ tugu.

¹⁷O la, ne ka fili dogonin bena to bɔɔrɔ kɔnɔ min daa sirila ka ɲa. E bena ne ka kojugu datugu ka ɲa kosɔbɛ.

¹⁸Kuluw be ben ka yɛrɛkɛ, kabakuru be bɔ a sigiyɔrɔ la,

¹⁹jii be kabakuru nɛmu k'a ban, jii woyotɔ be taga ni dugukolo dɔ ye, e fana be adamaden jigi tigɛ ten.

²⁰E b'a la duguma, a be tɛmɛ ka taga kudayi, e b'a kɛ a ɲada cogo be yɛlɛma, o kɔ i b'a gwɛn.

²¹A deenw be boɲa sɔrɔla wa? A t'o lɔn. U b'u dɔgɔyara wa? A te bɔ o kala ma.

²²A b'a yɛrɛ ka sɛgɛn le lɔn, tɔɔrɔ min b'a kan, o ye ale kelen ta ye.»