Read dyu Zɔbu ka kitabu 16 Bible Online

Zɔbu ka kitabu 16 - dyu bible

Zɔbu ka kitabu 16

¹Zɔbu y'a fɔ Elifazi ye ko:

²«Ne y'o kuma ɲɔgɔn caaman mɛn ka tɛmɛ, aw bɛɛ ye jigitugubaga mɔgɔsɛgɛnlaw le ye.

³Ne ko kumafu nunu bena ban tuma jumɛn? Walima mun lo y'a kɛ i ye nin jaabili nin kɛ,

⁴Ne be cogo min na, ni aw le tun be ten, ne tun bena se ka kuma aw fɛ fana, ne tun bena kuma labɛn k'a fɔ aw ye, n tun bena n kuun firinfirin fana.

⁵Ne tun bena aw jaa gwɛlɛya ni n ka kuma ye, n ka kumaɲuman tun bena aw jigi tugu.

⁶Ni ne kumana, ne ka sɛgɛn tena ban. Ni n jera, a bena bɔ ne kan wa?

⁷Ala ye ne barika ban sisan, a ye n lamini bɛɛ halaki.

⁸A y'a kɛ ne fari cɛnna ka ne ka jalaki yira, ne fasako fana be dɔ fɔra o la.

⁹A diminin ye ne faran i ko wara b'a ka sogo faranfaran cogo min na. A be tugu ne kɔ k'a ɲiin ɲimi ne kama. Ne jugu be ne filɛra kosɔbɛ.

¹⁰U b'u daa wagawagara ne kosɔn, u ye ne tulo ci ka n nɛni, u be ɲɔgɔn lajɛn n kama.

¹¹Ala ye ne don mɔgɔkolonw bolo, a ye ne ɲɔti ka don mɔgɔjuguw bolo.

¹²Ne tun be hɛrɛ la, a ye n ɲaa gwan. A ye n minɛ n kaan na ka n ben. O kɔ, a y'a ka biɲɛw sin ne ma.

¹³A ka biɲɛw be tugura ɲɔgɔn kɔ ka se ne ma faan bɛɛ, a be ne sɔgɔ hali makari t'a la, a ye ne kunakuna sɔgɔ k'a bɔn.

¹⁴A be girin ne kan i ko kɛlɛden, a be ne mandimina n yɔrɔ bɛɛ la.

¹⁵Dusukasifani le be ne kaan na kudayi, Ala ye ne ɲɔɲɔ.

¹⁶Ne ɲadenw wulenna kasikojugu fɛ, n ɲaa dibira,

¹⁷k'a sɔrɔ ne ma kojugu kɛ, n kɔnɔ fana gwɛnin lo Aladali la.

¹⁸Dugukolo, kana ne joli bɔnnin datugu fewu, n kasikan ka se ka mɛn yɔrɔ bɛɛ la.

¹⁹ Ne seere be sankolo la ka ban do. Dɛmɛbaga be ne fɛ sanfɛ.

²⁰Ne teriw be ne lɔgɔbɔra, ne be Ala le daalila ni ɲaji ye.

²¹Ne dɛmɛbaga nin le be se ka don ne ni Ala cɛ. I ko adamadenw b'a kɛ cogo min na, dɔ ka don mɔgɔ fila cɛ.

²²Bari ne sii be ser'a laban na. Ne be sira kan ne te taga ka segi ni min ye.