Read dyu Zɔbu ka kitabu 19 Bible Online

Zɔbu ka kitabu 19 - dyu bible

Zɔbu ka kitabu 19

¹Zɔbu y'a fɔ Bilidadi ye ko:

²«Aw bena to ka ne nii tɔɔrɔ fɔɔ tuma jumɛn? Aw bena to ka ne halaki n'aw ka kuma ye fɔɔ tuma jumɛn?

³Aw ye ne nɛni siɲɛ caaman, aw te maloya ka ne tɔɔrɔ wa?

⁴Hali ni ne tun filila tiɲɛ na, o fili nin kunko ye ne kelen ta ye.

⁵N'aw b'aw yɛrɛ fisayara ni ne ye, ka to ka ne dɔgɔyako fɔ n ye dɔrɔn,

⁶aw ka l'a la ko Ala le y'o kɛ ne la, ale lo ye n datugu n'a ka jɔɔ ye.

⁷Ni ne pɛrɛnna ko u be ne tɔɔrɔla, mɔgɔ te yen ka n jaabi. Ni ne kulera ka dɛmɛbaga ɲini, mɔgɔ te sɔrɔ min be n ka tiɲɛ di n ma.

⁸A ye sira tugu ne ɲa janko n kana tɛmɛ, a ye dibi kɛ ne ka tɛmɛyɔrɔw la.

⁹A ye n ka boɲa bɔ n kan, a ye n ka kunkɔrɔtafɛnw bɔ n kan.

¹⁰A ye n halaki pewu ka n ta ban. Ne jigi tun be fɛɛn min kan, a y'o bɔsi i ko mɔgɔ be yiri bɔn cogo min na.

¹¹A dusu gwanna ne kɔrɔ kosɔbɛ, a ye n jati a jugu dɔ ye.

¹²A ka kɛlɛdenw ye ɲɔgɔn lajɛn, u ye tɛmɛyɔrɔ bɔ fɔɔ ka na se ne ma, u nana n datugu n ka sigiyɔrɔ la.

¹³A y'a kɛ ne balimaw yɔrɔ jaɲana n na, n lɔnbagaw b'u yɛrɛ kɛ i ko lonaw n fana fɛ.

¹⁴Mɔgɔ te n fɛ tugu, n terisɔbɛw ɲinɛna n kɔ.

¹⁵N ka soo kɔnɔ lonanw ni n ka baaraden musomanw ye n kɛ lonan ye, bari ne kɛra i ko mɔgɔ wɛrɛ u ɲana.

¹⁶Ne be n ka baaraden wele, a te n jaabi, hali ni n y'a daali.

¹⁷Ne ka muso t'a fɛ ka n kasa mɛn tugu, n koo goyara n badenw yɛrɛ ye.

¹⁸Hali denmisɛnw b'u ɲaa don ne la, ni n ko n be kuma, u be n lɔgɔbɔ.

¹⁹Ne koo goyara n terisɔbɛw yɛrɛ ye. Minw koo ka di ne ye, olu wilila n kama.

²⁰Ne tɔɔ tora kolo ni golo dɔrɔn, dɔɔni ne tun be sa.

²¹Aw ka makari ne la n teriw, bari Ala ye ne tɔɔrɔ.

²²Mun na aw fana be n gwɛnna i ko Ala b'a kɛra cogo min na? Aw ma wasa ne tɔɔrɔ la ten wa?

²³A tun ka di ne ye, ne ka kuma nunu ka sɛbɛn, u tun k'a sɛbɛn yɔrɔ dɔ la.

²⁴Ne tun b'a fɛ u ka ɲɛgɛn, u ka ɲɛgɛn ni birɛn ye ani gween, u ɲɛgɛnni ka to fara kan kudayi.

²⁵Ne kɔni y'a lɔn ko ne kunmabɔbaga be yen, a bena wili waati laban na.

²⁶Ni ne farikolo halakira ka ban tuma min na, ne yɛrɛ bena Ala ye.

²⁷Ne ben'a ye, ne yɛrɛ ɲaa bena la a kan, mɔgɔ wɛrɛ tɛ. Ne kɔrɔtɔnin b'a kɔnɔna.

²⁸Aw ben'a fɔ ko: ‹An bena tugu a kɔ cogo di? An bena sababu jumɛn sɔrɔ ka se k'a kiti?›

²⁹Aw ka siran murujan nin kana se aw yɛrɛw ma. Bari, dusugwan be na ni saya ye, aw k'a lɔn ko kiti b'aw ɲa.»