Read dyu Zɔbu ka kitabu 2 Bible Online

Zɔbu ka kitabu 2 - dyu bible

Zɔbu ka kitabu 2

¹Loon dɔ tugu, mɛlɛkɛw nana Masaba ɲakɔrɔ. Sutana fana nana n'u ye Masaba fɛ.

²Masaba ye Sutana ɲininga ko: «E bɔra min?» Sutana y'a jaabi ko: «N bɔra diɲɛ yaalayɔrɔ, ne munumununa yen.»

³Masaba y'a fɔ a ye ko: «E ye ne ka baarakɛla Zɔbu cogo ye wa? A ɲɔgɔn te dugukolo kan. Mɔgɔɲuman lo, a tilennin be. A be siran ne Ala ɲa, a te sɔn kojugu ma. E ye ne wajibiya k'a mako sa gwansan. Nga a tor'a ka mɔgɔɲumanya kan.»

⁴Sutana y'a fɔ Masaba ye ko: «Farisogo kɔni ye farisogo ye. Adamaden b'a bololafɛn bɛɛ kɛ k'a nii kisi le.

⁵E bolo la a kan k'a tɔɔrɔ. Ne lanin b'a la ko a bena i nɛni.»

⁶Masaba y'a fɔ Sutana ye ko: «Ayiwa, a b'i bolo, nga i kan'a nii bɔ.»

⁷O la, Sutana bɔra Masaba kɔrɔ ka taga Zɔbu tɔɔrɔ ni jolijugu dɔ ye. A fari bɛɛ kɛra joli ye.

⁸Zɔbu tun be tɛgɛnɛkolon kɛ k'a yɛrɛ siɲɛ n'a ye, ani ka to ka sigi bugurigwɛ kɔnɔ.

⁹A ka muso y'a fɔ a ye ko: «Halibi e be jijara i ka mɔgɔɲumanya la wa? I te Ala nɛni ka sa wa?»

¹⁰Zɔbu y'a fɔ a ye ko: «E be kuma i ko naloman. Ala mana koɲuman kɛ an ye, an b'o fɛ. Mun na an be ban a juguman na?» O bɛɛ la, Zɔbu ma kumajugu fɔ.

¹¹Zɔbu teriw mɔgɔ saba y'a ka tɔɔrɔkow bɛɛ mɛn. U kelen kelen bɛɛ bɔra u ka jamanaw na ka na. Elifazi bɔra Teman, Bilidadi bɔra Suwa, Sofari bɔra Naama. U ye ɲɔgɔn ye k'u be taga Zɔbu fɛ k'a makari filɛ k'a ɲaji cɛ.

¹²K'u to yɔrɔjan, u ye filɛli kɛ k'a ye, u ma se k'a lɔn. U tora ka kasi. U y'u ka faniw faranfaran ka to ka buguri fili sanfɛ ka kɛ u kuun na.

¹³U tagara sigi a gɛrɛfɛ duguma tile wolonwula ni suu wolonwula, u ma se ka kuma a fɛ. Bari u tun y'a ye ko a ka sɛgɛn ka bon kojugu.