Read dyu Zɔbu ka kitabu 20 Bible Online

Zɔbu ka kitabu 20 - dyu bible

Zɔbu ka kitabu 20

¹Sofari ka bɔ Naama y'a fɔ Zɔbu ye ko:

²«Ne ka miiriya be n wajibiya ka kuma, Ne kɔrɔtɔnin lo, n te se ka muɲu tugu.

³Ne ye kuma dɔ mɛn min be n dimi. Ne ye min sɔrɔ n ka miiriya la, ne bena o fɔ k'a jaabi.

⁴E m'a lɔn ko kabini fɔlɔfɔlɔ, kabini adamaden bilara dugukolo kan,

⁵mɔgɔjugu ka see sɔrɔ te taga ɲa wa? Mɔgɔkolon ka nisɔndiya, o ye waati dɔɔni koo le ye.

⁶Hali n'a jaɲa sera sankolo la, hali n'a kuun sera sankaba ma,

⁷a laban bena tunu i ko a yɛrɛ ka boo, a lɔnbagaw ben'a fɔ ko: ‹A tagara min?›

⁸A be tɛmɛ i ko siko, a nɔɔ te ye, a be tunu i ko sufɛ yelifɛn.

⁹Minw tun be to k'a ye, olu ten'a ye tugu, a ka sigiyɔrɔ mɔgɔw ten'a ye tugu.

¹⁰Wajibi a deenw bena fantanw ta ɲɔgɔn segi u ma, a yɛrɛ bolo le ben'a ka nafolo kɔsegi k'a di.

¹¹Kanbelen tun lo, fanga tun b'a la kosɔbɛ, o n'a ta bɛɛ, a bena jɛn n'o ye ka don kaburu kɔnɔ.

¹²Juguya tun ka d'a ye, o la, a y'o to a daa la.

¹³A y'a mara ka mɛn a m'a bɔ, a tora k'a magamaga k'a diya bɔ.

¹⁴Nga o bena kɛ sababu ye a ka dumuni be kunanya a kɔnɔ, o bena kɛ i ko saa ka baga a kɔnɔ.

¹⁵A tun ye nafolo min dumu, a bena o fɔɔnɔ. Ala ben'a kɛ a b'o bɔ.

¹⁶A tun be fɛɛn min minna, o ye saa ka baga ye, a ka jugu fɔnfɔnni ka baga ye.

¹⁷A kana miiri ko a bena lii ye a ɲana tugu min be woyo i ko baji. A tena nɔnɔ ye fana min be woyo i ko kɔɔ.

¹⁸A ye nafolo min sɔrɔ, a bena segi k'o di, a tena se k'a dumu. A ye tɔnɔ min sɔrɔ a ka jago la, a tena se k'o diya bɔ.

¹⁹Bari a tun ye dɛsɛbagatɔw halaki k'u to yen, a ye mɔgɔw ka soow bɔsi u la.

²⁰A te wasa ka ye minkɛ, a tena se k'a ka nafolo foyi sutara.

²¹A ka tigɛ gwɛlɛya kosɔn, mɔgɔ si tun te se k'a yɛrɛ bɔsi a la, o la, ale yɛrɛ ka hɛrɛ tena mɛn.

²²K'a to nafolotigiya la, dusukasi bena se a ma, bɔnɛ sifa bɛɛ ben'a sɔrɔ.

²³K'a to a yɛrɛ nugu fako la, Ala y'a ka dimi bɔ a la, o be jigi a kan dumuni nɔɔ na.

²⁴N'a ko a be boli murujan ɲa, biɲɛ ziralaman le ben'a sɔrɔ.

²⁵A be biɲɛ bɔ a kɔɔ la, min y'a biɲɛ sɔgɔ ka to a la. Saya siranya be cun a kan.

²⁶Dibi be kɛ a niyɔrɔ ye, tasuma bena mana a yɛrɛ ma k'a jɛni, a ben'a ka minanw bɛɛ jɛni fana.

²⁷A ka fili bena ye sankolo barika la, dugukolo bena wili a kama.

²⁸A ka sokɔnɔfɛnw bena woyo ka taga i ko jii, Ala ka dimi loon na.

²⁹Mɔgɔjugu niyɔrɔ le y'o ye Ala fɛ, Ala y'o le latigɛ a ye.»