Read dyu Zɔbu ka kitabu 24 Bible Online

Zɔbu ka kitabu 24 - dyu bible

Zɔbu ka kitabu 24

¹«Mun na Setigi Ala ma loon dɔ sigi, min y'a ka kiti loon ye? O la, a ɲasiranbagaw tun bena o ye.

²Mɔgɔw b'u ka forow daan yɛlɛma ka don u tɔɲɔgɔn ta la, u be begɛn soɲa ka taga o dɛndɛ.

³U be falatɔ ka fali minɛ ka taga n'a ye, u be firiyamuso ka misi minɛ ka sɔrɔ ka juru don a la.

⁴U b'a kɛ dɛsɛbagatɔw be sira bila, u be jamana sigɛnbagatɔw karaba fɔɔ u b'u yɛrɛ dogo.

⁵U be i ko kongofaliw, kongokolon kɔnɔ. U be taga u ka baara la yɔrɔ jalan na ka dumuni ɲini u deenw ye.

⁶U be biin kan kongo kɔnɔ, u fana be mɔgɔjugu ka *ɛrɛzɛn tigɛ.

⁷Sufɛ, fani yɛrɛ t'u fɛ k'a biri, foyi te yen k'u yɛrɛ tanga nɛnɛ ma.

⁸Sanji b'u bugɔra kuluw kan. Donyɔrɔ te yen minkɛ, u be nɔrɔ kabakuruw la.

⁹U be falatɔ minɛ fanga na, u be fɛɛn minɛ sigɛnbagatɔ fɛ ka sɔrɔ ka juru don a la.

¹⁰O la, olu be taama farilakolon, u be kɔngɔtɔ bila suman ɲun na.

¹¹U b'a to u be tulu bɔ u ka jataw kɔnɔ, u b'a to u be ɛrɛzɛn nɔɔni fana, k'a sɔrɔ u t'a nɛnɛ yɛrɛ.

¹²Mɔgɔw be kasira dugu kɔnɔ. Minw mandimina, olu be kulera. Ala fana te foyi kɛra o la.

¹³Tilefɛ man di mɔgɔjuguw le ye, yeelen be sira min kan, u t'o ta, u te sɔn ka to o sira nin kan.

¹⁴Mɔgɔfagala be wili sɔgɔmada joona, a be sigɛnbagatɔ ni dɛsɛbagatɔ faga. Ni suu kora, a be kɛ i ko soon.

¹⁵Kakala be muso dɛndɛ sufɛ, a be miiri ko mɔgɔ ɲaa t'a la, a b'a yɛrɛ dogo.

¹⁶Sufɛ lo soon be daaw kari, tilefɛ, a b'a yɛrɛ datugu a ka soo kɔnɔ, a te yeelen lɔn.

¹⁷Olu bɛɛ fɛ, sɔgɔma kɛra dibijugu waati ye, u delila sufɛ siranyako la.

¹⁸Nga aw fɛ, jii be taga ni mɔgɔjugu le ye joona joona, u ka sigiyɔrɔ be kɛ yɔrɔ danganin ye, o la, u tena taga ɛrɛzɛnforo la tugu.

¹⁹Sanbɛrɛ be tunu tile funteni bolo cogo min na, kojugukɛla be tunu ka taga lahara ten.

²⁰U wolobagaw be ɲinɛ u kɔ, u be kɛ bagabaga ka dumuni diman ye, mɔgɔ be ɲinɛ u kɔ, juguya bena ban.

²¹«O mɔgɔ nunu tun be to ka muso wolobali tɔɔrɔ, u tun te firiyamusow minɛ cogoɲuman na.

²²See be Ala ye ka mɔgɔjugu bɔ yen do! A mana wili ka lɔ, mɔgɔjugu jigi be tigɛ kisiko la.

²³A b'u hakili sigi tuma dɔ, n'o tɛ, a ɲaa b'u ka kɛtaw la!

²⁴U ka koo be sabati waati dɔɔni kɔnɔ, o kɔ, foyi te yen tugu. U be ben, u ka waati be laban i ko adamaden tɔw. U be ja i ko suman tigɛnin.

²⁵Ne be min fɔra, n'o te tiɲɛ ye, mɔgɔ dɔ ka n sɔsɔ. Jɔn bena se ka ne ka kuma kɔɔ kari sa?»