Read dyu Zɔbu ka kitabu 30 Bible Online

Zɔbu ka kitabu 30 - dyu bible

Zɔbu ka kitabu 30

¹«Nga sisan, ne kɛra n dɔgɔw ka tolonkɛfɛn ye, ne tun te minw faaw jati n ka wuluw ye yɛrɛ, wulu minw be n ka begɛnw cɛma.

²U tun bena mun le ɲa ne ye sa? Olu minw barika tun bannin lo.

³U tun jara kakaka dɛsɛ ni kɔngɔ bolo. U tun be to k'u daladumuni ɲini yɔrɔ janin na, yɔrɔ min ye kongokolon ye.

⁴U tun be to ka biin le ɲini tudenninw kɔrɔ, liliw le tun ye u ka dumuni ye.

⁵U tun be to k'u gwɛn ka yaala mɔgɔw cɛma, u tun be to ka sɔngɔ u kɔ i ko soon.

⁶U tun be to ka la kulu jigijigiw la, ani farawow ni dingɛw kɔnɔ.

⁷U mankan tun be to ka mɛn tudenninw kɔnɔ, u tun be to ka ton ɲɔgɔn kan ŋɔniyiriw kɔrɔ.

⁸U tun ye mɔgɔkolonw ye, mɔgɔlabilaninw. U y'u bugɔ ni berew ye, k'u gwɛn ka bɔ jamana kɔnɔ.

⁹Sisan, u deenw be ne lɔgɔbɔ dɔnkili la, u be ne koo fɔra yɔrɔ bɛɛ.

¹⁰U b'u kɔɔ sin ne ma, k'a yira ko n koo ka go u ye, u b'u daji yɛrɛ tu ne ɲaa na.

¹¹Ala ye ne ka cɛya ban ka n majigi, o la, u be ne dɔgɔya yɔrɔ bɛɛ.

¹²U wilila ne kama n kinibolo fɛ, u be n seen tara janko ka n ben, u be ne halakiyɔrɔ le ɲinina.

¹³U be ne tɛmɛyɔrɔw datugura, u be ne benbaara le kɛra. U mako te dɛmɛbaga la yɛrɛ.

¹⁴U be nana n kama i ko dugu kɛlɛbaga minw be don ni kogo sɔgɔyɔrɔ ye, u be girinna ka na ni kogo benyɔrɔ ye.

¹⁵Siranyako sifa bɛɛ le be kɛra ne la. N ka boɲa bɔra n kan i ko fɔɲɔ le y'a ta, n ka hɛrɛ tɛmɛna i ko sankaba.

¹⁶Sisan kɔni, ne be ɲini ka sa, sigɛn be ne kan loon bɛɛ.

¹⁷Sufɛ, n dimiyɔrɔw be n tɔɔrɔ fɔɔ n kolo kan, u be n tɔɔrɔ, lafiɲɛ te yen.

¹⁸Ala ye ne dɛrɛ ni fanga ye, a ye ne kaan minɛ i ko deleke min be degun mɔgɔ la.

¹⁹Ala ye ne fili bɔgɔ kɔnɔ, ne be i ko buguri, walima bugurigwɛ.

²⁰Ne ka Ala, ne b'i daali, e te ne jaabira, ne be lɔ e ɲakɔrɔ, nga e te ne filɛ ni ɲaɲuman ye.

²¹A filɛ, e juguyara ne ma dɛ! E be ne kɛlɛla n'i barika bɛɛ ye.

²²E y'a kɛ fɔɲɔ wilila ni ne ye sanfɛ ka taga ni n ye, gwɛlɛya be n yuguyugura i ko sanfɔɲɔba.

²³Ne y'a lɔn ko e be tagara ni n ye saya yɔrɔ la le, min latigɛra nimanfɛnw bɛɛ ye.

²⁴Mɔgɔ min ta cɛnna, o tigi t'i daali wa? Mɔgɔ min dusu kasira, o tigi te dɛmɛ ɲini i fɛ wa?

²⁵Ne tun te kasira tɔɔrɔbagaw kosɔn wa? Dɛsɛbagatɔw koo tun be ne dusu kasi tuma bɛɛ.

²⁶Ne tun be hɛrɛ fɛ nga sigɛn le nana. N jigi tun b'a kan ko yeelen le tun bena bɔ n ye, nga a kɛra dibi ye.

²⁷Kabini ne ye gwɛlɛya nin sɔrɔ, ne jaa be to ka tigɛ tuma bɛɛ.

²⁸Ne be taamana dusukasi la, n nisɔn man di. Ne be to ka wili ka kule jama cɛma,

²⁹ne kɛra kongowuluw dɔ ye, n kɛra kongosogow taamaɲɔgɔn ye.

³⁰Ne fari be fin kirikiri, farigwan be ne tɔɔrɔla kosɔbɛ.

³¹Ne ka gɔni kɛra dusukasidɔnkili fɔlikɛminan ye, n ka file kaan kɛra nisɔngoyadɔnkili lakan ye.