Read dyu Zɔbu ka kitabu 31 Bible Online

Zɔbu ka kitabu 31 - dyu bible

Zɔbu ka kitabu 31

¹«Ne tun y'a latigɛ sɔbɛ la ko n tena n ɲaa bɔ sunguru fɛ.

²Ala min be sankolo la, ale bena mun le bila ne ye? Setigi min be sanfɛ, ale bena niyɔrɔ jumɛn le bila ne ye?

³Mɔgɔjugu ta le te sigɛn ye wa? Kojugukɛla le te tɔɔrɔ wa?

⁴Ala te ne ka koo kala ma wa? A ɲaa te ne sennɔ bɛɛ la wa?

⁵Ne ye galontigɛla ye wa? Ne ye namaratɔ ye wa?

⁶Ala yɛrɛ ka ne sɛgɛsɛgɛ ni tilenninya ye, a bena n ka mɔgɔɲumanya ye.

⁷Ni ne ye siraɲuman bila, ni ne tugura n ɲaa nigɛ kɔ, ni ne ye n yɛrɛ nɔgɔ koo dɔ la,

⁸ne ka suman dannin ka kɛ mɔgɔ wɛrɛ ta ye, n ka suman wilitɔ ka bɔn.

⁹Ni ne ye n ɲaa bɔ muso wɛrɛ fɛ, ni ne tagara n sigiɲɔgɔn ka daa la k'a muso tigɛ,

¹⁰ne ka muso ka taga sinni kɛ mɔgɔ wɛrɛ ye, mɔgɔ wɛrɛ ka la n'a ye fana.

¹¹Bari o tun bena kɛ maloyako ye, kojugu lo min kɛbaga ka kan ka jalaki.

¹²O ye tasuma ye min be cɛnni kɛ fɔɔ lahara, a tun bena n bololafɛnw bɛɛ halaki.

¹³Ni sɔsɔli tun donna ne ni n ka baaraden cɛman, walima musoman cɛ, ni ne ye kotilenbali kɛ a la,

¹⁴ni Ala wilila, ne bena mun kɛ? N'a ye ne ɲininga, n bena mun le fɔ sa?

¹⁵Ala min ye ne kɛ deen ye n baa kɔnɔ, ale lo ma olu fana dan wa? O Ala kelen le ye an bɛɛ labɛn an baaw kɔnɔ.

¹⁶Ni dɛsɛbagatɔ ye n daali, n b'a sɔn, ne ma firiyamuso jigi tigɛ ka ye,

¹⁷ne ma n ka dumuni kɛ n kelen, ni n ma falatɔ sɔn.

¹⁸Ne tun ye falatɔ faa ye kabini n denmisɛn tuma, ne kɔrɔbayara firiyamuso dɛmɛ na.

¹⁹Ni ne tun ye dɛsɛbagatɔ ye ni fani t'a fɛ, ni ne tun ye fantan ye ni birifani t'a fɛ,

²⁰ne tun be to ka nɛnɛfani d'a ma k'a ka nɛnɛ bɔ a la, janko k'a ka duba sɔrɔ.

²¹Ni n ye falatɔ bagabaga kititigɛyɔrɔ la, bari n jigi b'a kan ko kititigɛlaw bena n dɛmɛ,

²²n bolo ka kari, n gaman ka tigɛ ka bɔ n na.

²³Bari n tun be siran ko Ala kana ne ɲaa gwan. O la, ne tun te se k'o koow ɲɔgɔn kɛ.

²⁴Ni ne tun ye n jigi la sanu kan, ni n y'a fɔ sanu ye ko ale lo ye ne jigi ye,

²⁵ni ne tun be nisɔndiya n ka nafolo buguyako dama na, ni ne tun be nisɔndiya n ka bololafɛnw cayako la,

²⁶n tun be tile yera kosɔbɛ tuma min na, n tun be kalo yera n'a be bɔ ka masa taama kɛ tuma min na,

²⁷n'o kɛra sababu ye ne dusu yɛlɛmana u faan fɛ dogo la, ni ne ye u kɛ batofɛn ye k'u bato,

²⁸o fana tun bena kɛ kojugu ye, kititigɛlaw ka kan ka min kiti kɛ. Bari, o ye Ala janfako le ye.

²⁹Ne ma nisɔndiya n jugu ka tɔɔrɔ kama, k'a to sigɛn na, ne m'o kɛ dusudiyako ye.

³⁰Ne ma sɔn k'a ɲini Ala fɛ ko a k'a faga, o ye kojugu ye n ma sɔn ka min kɛ.

³¹Mɔgɔ minw bɛɛ tun be ne ka soo, olu be se k'a fɔ ko u bɛɛ ye sogo sɔrɔ fɔɔ ka fa.

³²Lonan ma si ka ye kɛnɛma ne ka daa la, ne ka daa tun yɛlɛnin lo tɛmɛbagaw ye.

³³Ne ma n ka kojugu dogo i ko mɔgɔ tɔw, ne ma n ka fili mara n kɔnɔ.

³⁴K'a fɔ ko n be siran jama ɲa, o tɛ, walima ka siran mɔgɔw ka dɔgɔya ɲa, o fana tɛ, k'o la, n jera ka to n ka soo kɔnɔ.

³⁵Ɔnhɔn, ni mɔgɔ tun be sɔrɔ min bena ne lamɛn kɔni! Ne ka kuma laban filɛ. Setigi le ka kan ka ne jaabi. N kitiɲɔgɔn ye min sɛbɛn n kama,

³⁶ne be olu ta n gaman kan ni kunkɔrɔta ye. N b'o kɛ masafugulan ye k'a biri.

³⁷Ne be n taamacogo bɛɛ ɲafɔ Ala ye, ne bena gwɛrɛ a la i ko masaden.

³⁸Ne be yɔrɔ min sɛnɛna, ni ne y'o soɲa, ni ne y'o bɔsi a tigiw fɛ,

³⁹ni n tun be to ka suman sɔrɔ k'o dumu gwansan, ni n tun be n ka sɛnɛkɛlaw tɔɲɔ fɔɔ u be sa kɔngɔ bolo,

⁴⁰ŋɔni ka falen foro nin kɔnɔ! Sɛgɛn ka falen yen, suman foyi kana sɔrɔ yen.» Nin ye Zɔbu ka kuma labanyɔrɔ ye.