Read dyu Zɔbu ka kitabu 32 Bible Online

Zɔbu ka kitabu 32 - dyu bible

Zɔbu ka kitabu 32

¹Mɔgɔ saba nunu jera, u ma sɔn ka foyi fɔ Zɔbu ye tugu, bari Zɔbu tun y'a fɔ ko ale tilennin lo.

²Nga o ye Aramu kɔmɔgɔ Buzi deen Barakɛli deen Eliyu dimi kosɔbɛ. A tun dimina Zɔbu kɔrɔ bari Zɔbu tun ye tiɲɛ d'a yɛrɛ ma Ala ɲakɔrɔ.

³A tun dimina Zɔbu teri mɔgɔ saba nunu kɔrɔ, ko bari olu tun dɛsɛra ka Zɔbu jaabi, ani ka sɔn ko tiɲɛ te Ala fɛ.

⁴A tun ye kuma to u bolo fɔɔ ka na se o waati ma, bari olu tun ka kɔrɔ n'a ye. O la, a tun ma kuma Zɔbu fɛ joona.

⁵Nga a nan'a ye tuma min na ko fɔta te mɔgɔ saba nunu daa la tugu, a dimina kosɔbɛ.

⁶O la, Buzi kɔmɔgɔ Barakɛli dencɛ Eliyu ye kuma ta ko: «Ne ye kanbelen ye, aw ye cɛkɔrɔbaw ye. O le y'a to ne siranna ka siga ka n ka lɔnta yira aw la.

⁷Ne tun be to k'a fɔ n yɛrɛ kɔnɔ ko mɔgɔ minw kɔrɔla, olu bena kuma fɔlɔ. Ko minw wolotuma mɛnna, olu bena lɔnniya yira.

⁸Jaa, ninakili dama le be adamaden na, Setigi le be hakili di adamaden ma.

⁹Sɔbɛ la, lɔnniyako te kɔrɔya la, mɔgɔkɔrɔbaya fana t'a kɛ mɔgɔ be se koo ɲanabɔli la.

¹⁰O la, ne fana ko aw ka mɛnni kɛ ne fɛ, ne fana bena n ka lɔnta fɔ.

¹¹Ne y'aw ka kuma lamɛn kosɔbɛ. Ne ye n tulo malɔ aw ka kuma na aw tun be minw fɔra Zɔbu kosɔn.

¹²Ne ye n tulo malɔ aw ka kuma na, aw si ma se ka Zɔbu jaabi a cogo la, mɔgɔ si ma se k'a ka kuma kɔɔ kari.

¹³Aw kana miiri ko ɲa sɔrɔla a koo la dɛ, Ala le bena se k'a ka kuma kɔɔ kari, adamaden tɛ.

¹⁴A tun te kumana ni ne ye do. N'o tɛ, ne tun bena dɔ fɔ a ye, o min be danna aw ta la.

¹⁵Zɔbu, a filɛ sa, u hakili ɲagamina. U t'a fɛ ka jaabili kɛ tugu. Foyi t'u daa la k'a fɔ tugu.

¹⁶Anhaan! Ne b'u kɔnɔ ka dɛsɛ. Foyi te bɔra u daa la, u jera tɛtɛ, fɔta te yen.

¹⁷Jaabi sera ne le ma sisan, n bena dɔ fɔ, ne fana bena n ka miiriya yira.

¹⁸Bari fɔta be ne fɛ kosɔbɛ, n ka lɔnko be n ɲɔtira ka kuma.

¹⁹Kuma be wiliwilila n kɔnɔ i ko duvɛn kɔgɔnin min be bɔyɔrɔ ɲinina. A be forokokura minw kɔnɔ, olu be ɲini ka faran.

²⁰Ne bena kuma janko n be n yɛrɛ sɔrɔ, ne bena n ka jaabili di.

²¹Ne tena mɔgɔ si jati minɛ, n fana tena mɔgɔ si nigɛ.

²²Bari ne te se ka mɔgɔ nigɛ, n'o tɛ, n Danbaga ka weleli tun tena mɛn ka se n ma.