Read dyu Zɔbu ka kitabu 35 Bible Online

Zɔbu ka kitabu 35 - dyu bible

Zɔbu ka kitabu 35

¹Eliyu y'a fɔ Zɔbu ye tugu ko:

²«E be miiri ko tiɲɛ b'i fɛ kɛ? N'i b'a fɔ ko i gwɛnin lo Ala ɲakɔrɔ?

³E tun be to k'a fɔ tuma min na ko: ‹Ni ne ma kojugu kɛ, ne bena mun le sɔrɔ o la?›

⁴Ne bena ele n'i teriw jaabi.

⁵Sankolo filɛ ka ɲa, sankabaw filɛ u be cogo min na i sanfɛ.

⁶ N'i ye kojugu kɛ, o be mun le kɛ Ala la? Hali n'i tora ka dɔ fara i ka murutiliko kan, o te foyi kɛ a la.

⁷N'i fana ye tilenninya kɛ, o te fɛɛn ye n'i b'a dir'a ma fana. A be fɛɛn dɔ sɔrɔ i fɛ o kama wa?

⁸E ka juguya kɔni b'i mɔgɔɲɔgɔn dama le sɛgɛn, e ka tilenninya fana be adamaden dɔrɔn le dɛmɛ.

⁹U be kule ni mɔgɔtɔɔrɔbaga caaman tɔgɔ ye, u b'u kaan kɔrɔta ka dɛmɛ ɲini janko ka bɔ fangatigiw bolo.

¹⁰Nga mɔgɔ te yen min b'a fɔ ko: ‹Ne Danbaga Ala be min? Ale min b'a kɛ dɔnkili be la sufɛ.›

¹¹Ale min be lɔnniya di an ma ka tɛmɛ kongosogow kan, a be hakilitigiya di an ma ka tɛmɛ kɔnɔw kan.

¹²Mɔgɔ be kule kosɔbɛ, nga Ala te jaabili kɛ, mɔgɔjuguw ka yɛrɛboɲa kama lo.

¹³Ala t'a tulo malɔ kumafu la, o ɲɔgɔn le te don Setigi tulo la.

¹⁴Ele do ko e ɲaa t'a la, ko e ka koo b'a bolo la, ko i b'a kɔnɔna.

¹⁵E ka miiri la, Ala te mɔgɔ ɲaa gwan a ka dimi kɔnɔ kɛ? Ko a te adamaden ka muruti jati.

¹⁶O la, ele Zɔbu ka kuma ye fuu ye, e be kuma caaman fɔra, e be min fɔra, e t'o lɔn.»