Read dyu Zɔbu ka kitabu 36 Bible Online

Zɔbu ka kitabu 36 - dyu bible

Zɔbu ka kitabu 36

¹Eliyu y'a fɔ Zɔbu ye tugu ko:

²«Zɔbu, muɲu dɔɔni, n b'i ladi tugu. Ne b'a fɛ ka kuma dɔ fɔ i ye tugu min be Ala tiɲɛtigiya.

³Ne bena lɔnniya ta yɔrɔjan, ne b'a fɛ ka tiɲɛ di n Danbaga ma.

⁴E ka l'a la ko ne ka kuma te galon ye, ne ye mɔgɔ ye min be koo lɔn tigitigi.

⁵Ala ye Setigi ye, a te mɔgɔ dɔgɔya, kuntigi lo, a ka kolatigɛnin ye wilibali ye.

⁶A te mɔgɔjugu to a ka sii sɔrɔ. A be sigɛnbagatɔ minɛ ni tilenninya ye.

⁷A t'a ɲaa bɔ mɔgɔtilenninw kan fewu. Mɔgɔtilenninw be ni masaw ye u ka masasigilan kan wa? Ala b'u to u be mɛn min kan. Nga u be tila k'u yɛrɛ boɲa.

⁸N'u y'u minɛ k'u siri ni jɔrɔkɔ ye, ni sigɛn sera u ma,

⁹Ala b'u ka kɛwaliw yira u la, u tun murutira Ala ma yɛrɛboɲa kama.

¹⁰A b'a kɛ u be sɔn ka mɛnni kɛ lasɔmini na, a b'a fɔ u ye k'u ka kojugu dabila.

¹¹N'u ye mɛnni kɛ ka sɔn Ala ta ma, u bena laban hɛrɛ la kosɔbɛ.

¹²N'u ma sɔn ka mɛnni kɛ, u bena halaki ni muru ye, u bena sa u ka kolɔnbaliya la.

¹³Mɔgɔjugu be dimi Ala kɔrɔ, ni Ala b'a ɲaa gwanna tuma min na, a t'a daali.

¹⁴U kanbelen kɛnɛkɛnɛman be sa. U be sa i ko kakalaw be sa cogo min na.

¹⁵Nga Ala be sigɛnbagatɔ kisi sigɛn barika la, a b'a lasɔmi ni gwɛlɛya ye.

¹⁶A tun ye ele Zɔbu ta fana nɔgɔya ten. Yanni e tun ka tɔɔrɔ sɔrɔ, a ye hɛrɛ kɛ i ye kosɔbɛ, dumuni tun b'i fɛ tuma bɛɛ.

¹⁷Nga e ye jalaki sɔrɔ, fɛɛn min latigɛra e kama, o te se ka bɔ yen.

¹⁸Kan'a to ɲagwan siranya b'i bila murutili la dɛ! Kana i jigi la boɲafɛn kan k'i yɛrɛ ɲagami dɛ!

¹⁹E ka nafolo tena o ɲa, hali i ka sanu, e ka fanga bɛɛ lajɛnnin te se.

²⁰E kana miiri suu koli la, min na jama bena bɔ u nɔɔ na.

²¹E k'i yɛrɛ kɔlɔsi kojugu ma, bari, o le y'a to e be tɔɔrɔla.

²²Ala ye kuntigi ye, setigi lo fana, jɔn be se ka mɔgɔ kalan ka se a fɛ?

²³Mɔgɔ be yen min b'a ka koo kɔlɔsi wa? Min b'a fɔ a ye ko: ‹I be min na, o ma ɲi.›

²⁴E hakili to a ka kɛwali la k'a fo kosɔbɛ. Adamadenw b'o le kɛ k'a tanu.

²⁵Mɔgɔ bɛɛ b'o le filɛra, u bɛɛ ɲaa b'o la yɔrɔjan na.

²⁶Ala ka bon, an te se k'a ka boɲa daan lɔn, an te se k'a sanda lɔn.

²⁷A be jii sama ka yɛlɛ sanfɛ, o kɔ, a b'o kɛ sanji ye.

²⁸O sanji nin le be bɔ sankaba kɔnɔ ka jigi, n'a be ben adamadenw lajɛnnin ye.

²⁹Jɔn be se ka sankabaw tɛmɛcogo faamu, ani saan be pɛrɛn cogo min na sankolo kɔnɔ?

³⁰E k'a filɛ, Ala le be saan kɛ a be manamana sankaba la, a be taga se fɔɔ kɔgɔji jukɔrɔla la.

³¹A be siyaw kiti o seen fɛ, a fana be dumuni d'u ma kosɔbɛ.

³²Sanmanamana b'a bolo, a b'a ɲaa sin fɛɛn kelen ma.

³³A b'a yɛrɛ yira ni sanpɛrɛn ye, hali begɛnw yɛrɛ be kɔn k'a nako lɔn.