Read dyu Zɔbu ka kitabu 37 Bible Online

Zɔbu ka kitabu 37 - dyu bible

Zɔbu ka kitabu 37

¹«Ne dusukun be yɛrɛyɛrɛla sanfɔɲɔ kosɔn, a be panpanna ka bɔ a lɔyɔrɔ la.

²Mɛnni kɛ Ala pɛrɛnkan na sa! A be mankanba min kɛra.

³A b'a kɛ saan be manamana sankolo yɔrɔ bɛɛ la, a be manamana fɔɔ diɲɛ daan na.

⁴N'o tɛmɛna, Ala kaan be mɛn o tuma na, a kaan be bɔ ni kuntigiya ye, o waati la fana, a be sanmanamana labila.

⁵A b'a kaan bɔ kosɔbɛ, fɔɔ an be kabakoya. O ye kabako ye an te se ka minw faamu.

⁶A b'a fɔ *sanji siminin ye ko: ‹Ben dugukolo kan.› K'a fɔ sanji ye ko ale ka ben ka kɛ sanba ye.

⁷A be adamadenw bali ten u ka baaraw la, janko mɔgɔw bɛɛ k'a ka kɛta lɔn.

⁸Kongosogow be boli ka don u dogoyɔrɔw la, u be don u ka layɔrɔ la.

⁹Fɔɲɔba be bɔ worodugu fɛ ka na, nɛnɛ be bɔ kɔgɔdugu fɛ.

¹⁰Jii be simi Ala dafɔɲɔ fɛ, jii sanfɛ yɔrɔ bɛɛ be ja i ko kabakuru.

¹¹A b'a kɛ jii be sɔrɔ sankabaw kɔnɔ, a b'a kɛ u be tɛmɛ ni sanmanamana ye.

¹²A b'a kɛ u be tɛmɛtɛmɛ yɔrɔ bɛɛ janko u b'a ka fɔtaw bɛɛ bato. U b'o kɛ diɲɛ faan bɛɛ la.

¹³Ala b'a sago kɛ ten dugukolo kan, n'a b'a fɛ ka ɲagwanko kɛ, walima ka ɲumanya kɛ.

¹⁴Zɔbu, koo nunu mɛn ka ɲa dɛ! Ala ka kabakow jati minɛ ka ɲa dɛ!

¹⁵A be kuntigiya kɛ o fɛɛn nunu kan cogo min na, e b'o lɔn wa? Sanmanamana be bɔ cogo min na sankaba kɔnɔ, i b'o lɔn wa?

¹⁶I be sankaba nunu cogo lɔn sanfɛ wa? Mɔgɔ min be se k'o lɔn, dɛsɛyɔrɔ t'o tigi ka lɔnniya la.

¹⁷Worodugu ɲafan fɔɲɔ mana fiyɛ, funteni be kɛ i ka faniw kɔrɔ kosɔbɛ.

¹⁸E tun be se ka Ala dɛmɛ ka sankolo dan, walima sankaba min be funteni bali wa?

¹⁹An ka kan ka min fɔ Ala ye, i k'o yira an na. An ye kunfinw ye kojugu, an te se ka kuma n'a ye.

²⁰Yala, a mako b'a la u k'a lasɔmi ko ne be kumana wa? Walima k'a fɔ a ye ko mɔgɔ dɔ kumana.

²¹Waati dɔ, mɔgɔ si te se ka yeli kɛ ka ɲa, bari sankaba ye tile datugu. O kɔ, fɔɲɔ dɔ be bari ka na u furan ka bɔ yen.

²²Yeelen ɲanaman be bɔra kɔgɔdugu faan fɛ ka na. Yeelen min be Ala laminina, o ye kabako ta ye.

²³Ala ye Setigi ye, an te se ka se a ma. A fanga ka bon, tiɲɛtigi lo tigitigi, kantigi lo fana, a te mɔgɔ tɔɔrɔ.

²⁴O le y'a to an ka kan ka siran a ɲa. A mako te mɔgɔ la min b'a yɛrɛ jati kolɔnbaga ye.»