Read dyu Zɔbu ka kitabu 38 Bible Online

Zɔbu ka kitabu 38 - dyu bible

Zɔbu ka kitabu 38

¹Ka Masaba to fɔɲɔba cɛma, a kumana Zɔbu fɛ ko:

²«E ye jɔn ye, e min b'a fɛ ka ne ka kolatigɛninw ɲagami, k'o ɲagami ni kumalakolon ye?

³I cɛɛ siri, k'i yɛrɛ kɛ cɛɛ ye, ne bena e ɲininga, e ka dɔ fɔ ne ye.

⁴Ne tun ye dugukolo juu sigi tuma min na, e tun be min? N'i be koo lɔn, e ka ne jaabi sa!

⁵Jɔn le y'a boɲa n'a waga latigɛ? I b'o tigi lɔn wa? Jɔn y'a sumajuru sama?

⁶A juu siginin be mun le kan? Jɔn le y'a nɔnkɔn kabakuruw sigi?

⁷O waati la, dugugwɛda lolow tun b'a la ka dɔnkili la, mɛlɛkɛw bɛɛ tun b'a la ka nisɔndiya, ka pɛrɛn.

⁸Kɔgɔji yɛrɛkɛtɔ ka bɔ a dingɛ kɔnɔ, jɔn le ye datugulan don a la?

⁹Ne ye sankaba kɛ ka jii datugu i ko fani, n ye dibiba kɛ a kunna.

¹⁰Ne ye daan bɔ a ye, ka datugulanw kɛ a la.

¹¹ Ne tun y'a fɔ a ye ko: ‹I be se ka na fɔɔ yan, i man kan ka tɛmɛ o kan. E ka jikuru barikaman nunu be lɔ yan.›

¹²Kabini e be yen, e y'a fɔ ka ye ko dugu ka gwɛ wa? E ye dugugwɛda kɛnɛ bɔwaati yira a la ka ye

¹³janko a ka se ka dugukolo bɛɛ gwɛ parapara, mɔgɔjugu k'a ka juguya dabila wa?

¹⁴Dugukolo be kɛ i ko bɔgɔ ɲɛgɛnni, a masirinin lo i ko fani le b'a kan.

¹⁵Mɔgɔjuguw ka yeelen te yen tugu, u ka fanga be ban.

¹⁶E tagara ka ye kɔgɔji bɔyɔrɔ la wa? E jigira ka ye dugukolo jukɔrɔ jii la wa?

¹⁷Saya ka yɔrɔ donda yirala i la ka ye wa? E ye saya ka yɔrɔ dibiman daa ye wa?

¹⁸I ye dugukolo boɲa cogo lɔn wa? Dɔ fɔ kɛ, n'i b'o koo bɛɛ lɔn.

¹⁹Sira min be taga yeelen ka yɔrɔ la, o be min? Dibi ka yɔrɔ be min?

²⁰I be se k'u yɔrɔ yaala fɔɔ u fɛ yen, n'i b'u ka yɔrɔ taako lɔn kɔni.

²¹I b'o lɔn, bari o y'a sɔrɔ i tun wolola! E sii tileda fana ka ca ka ban!

²²I tagara ka ye *sanji siminin marayɔrɔ la wa? I ye sanbɛrɛ ta ye ka ye wa?

²³Ne y'u mara lonjugu le kama. Ne y'u mara kɛlɛ le kama.

²⁴I be yeelen ka tɛmɛsira lɔn sanni a ka se an ma wa? I be kɔrɔn fɛ fɔɲɔ bɔyɔrɔ lɔn dugukolo kan wa?

²⁵Jɔn le ye bɔyɔrɔ di sanji ma? Jɔn le ye sira di sankaba ma n'a be pɛrɛn?

²⁶Mɔgɔ te yɔrɔ min na, jɔn y'a to sanji be ben o yɔrɔ la, k'a to a be ben kongokolon kɔnɔ adamaden te yɔrɔ min na?

²⁷A be yɔrɔ janin ɲigi, a be kɛ sababu ye biin be falen.

²⁸Facɛ be sanji fɛ wa? Jɔn le ye komiji dan?

²⁹Jii siminin baa ye jɔn ye? Jɔn le ye sanbɛrɛ dan?

³⁰Jii be kɛ i ko kabakuru, a sanfɛla be simi.

³¹ Lolo nunu filɛ kɛ. Sisɛ n'a deenw be ɲɔgɔn kan ele sababu la wa? E be se ka Sulagwɛnbagaw faran ka bɔ ɲɔgɔn na wa?

³²E be se k'a kɛ lolow be bɔ u bɔwaati la wa? Ele le b'a kɛ lolo deen mugan ni fila nunu be taama ɲɔgɔn fɛ wa?

³³I be sankolo kɔnɔ sariyaw lɔn wa? Ele le b'u ka kɛta yira u la dugukolo kan wa?

³⁴Ele le b'i kaan bɔ sankabaw fɛ, sanjiba be na i tunu wa?

³⁵Ele le be sanmanamana ci ka taga wa? U be to k'a fɔ i ye ko: ‹An taatɔ filɛ› wa?

³⁶Jɔn le ye lɔnniya di balakɔnɔ ma, a k'a lɔn ko baa bena fa? Jɔn le ye hakilitigiya di dondo ma, a k'a lɔn ko sanji tigɛwaati sera?

³⁷Jɔn ka lɔniya sera sankabaw daa lɔnni ma? Jɔn le be kɛ sababu ye sanji be ben dugukolo kan?

³⁸K'a sɔrɔ dugukolo janin lo kakaka, n'a be nɔrɔ ɲɔgɔn na ka kɛ kuru ye.

³⁹Ele le be jaramuso ka dumuni ɲini a ye wa? Ele le be jaradenw ka kɔngɔ ban wa,

⁴⁰tuma min na u lanin tora u ka layɔrɔ la, walima n'u tagara sogo minɛyɔrɔ la?

⁴¹Kɔngɔ mana kaankaan deenw tɔɔrɔ, u mana to ka kule Ala nɔfɛ dumuniko la, ele le be tobili kɛ u ye wa?