Read dyu Zɔbu ka kitabu 39 Bible Online

Zɔbu ka kitabu 39 - dyu bible

Zɔbu ka kitabu 39

¹Mankalaninw be wolo tuma min na, e b'o lɔn wa? A b'a deenw wolo tuma min na, e be yen wa?

²U be ni kɔnɔ ye kaloda min kɔnɔ, i b'o lɔn wa? U be wolo tuma min na, i b'o lɔn wa?

³U be sɔnsori, k'u deenw wolo, u ka dimi be ban.

⁴U deenw be boɲa, ka kɔrɔbaya kongo kɔnɔ, deen nunu be wili ka taga, u te segi ka na u baa fɛ tugu.

⁵Jɔn le ye kongofali labila? Jɔn le y'a foni k'a bila?

⁶Ne ye kongokolon kɛ a toyɔrɔ ye. Foyi te falen yɔrɔ min na, ne y'o le kɛ a ta ye.

⁷A mako te dugu kɔnɔ mankan na, a te kuntigi ka kuma mɛn.

⁸A be yaalayaala kuluw kan k'a ka dumuni ɲini. A be binkɛnɛ le fɛ.

⁹Kongomisi be sɔn ka baara kɛ i ye wa? A be sɔn ka si i ka wɛɛrɛ kɔnɔ wa?

¹⁰E b'a siri ni juru ye ka sɛnɛ kɛ wa? A be sɔn ka tugu i kɔ ka sɛnɛyɔrɔ dakɛɲɛ wa?

¹¹E b'i jigi l'a kan bari barika b'a la kosɔbɛ wa? E b'i ka baara bɛɛ to a ye wa?

¹²E jigi b'a kan i ka suman donko la soo wa? E jigi b'a kan i ka sɛnɛfɛnw donko la soo wa?

¹³Kɔnɔsogolon gaman mankan ka di, u be i ko balakɔnɔ gaman.

¹⁴Nga kɔnɔsogolon b'a faan la duguma k'a to cɛncɛn b'u gwan.

¹⁵A be ɲinɛ ko dɔ seen be se k'a ci, ko kongosogo dɔ be se k'a dɔn.

¹⁶A ka fari a deenw ma, i ko a yɛrɛ deenw tɛ. A te deen sɔrɔ sigɛn jati.

¹⁷Bari ne Ala ma hakili d'a ma, n ma lɔnniya d'a ma fana.

¹⁸N'a wilila boli la tuma min na, ka boli ka sotigi tɛmɛ, o ye tolon ye a fɛ.

¹⁹Ele le be fanga di soo ma wa? Ele le ye kansi d'a ma wa?

²⁰Ele le y'a kɛ n'a be se ka pan i ko tɔɔn wa? A kasikan be siranya bila juguw la.

²¹Fanga min b'a la, o nisɔndiya kosɔn, a be kɔkɛnɛ dɔn kosɔbɛ, a be taga juguw ka kɛlɛdenw kunbɛn.

²²A mako te siranya la, a te siran foyi ɲa, a te murujan ye ka lɔ ka kɔsegi.

²³Toonw mankan be bɔra ale lo kan, tamanw ni berew be manamana a kan.

²⁴A te sera ka lɔ yɔrɔ kelen kɔrɔtɔ fɛ, fɔɔ a be dugukolo siɲɛna. Ni buru fiyɛra, a te lɔ tugu.

²⁵N'u ye buru fiyɛ, a be kasi k'u jaabi. A be kɛlɛ kasa mɛn k'a to yɔrɔjan na. A be kɛlɛɲamɔgɔw pɛrɛnkan lɔn, a be kɛlɛdenw pɛrɛnkan lɔn.

²⁶Ele le ye hakili di sɛgɛn ma a gamansi faliko la wa? Ele le ye hakili d'a ma a ka to k'u yɛrɛkɛ ka taga worodugu ɲafan fɛ wa?

²⁷Ele le b'a to sɛgɛn be wili sanfɛ wa? Ele le b'a to a be ta'a ka ɲaga la fɔɔ sanfɛ kulu kan wa?

²⁸A be ta'a ka layɔrɔ labɛn farawow kɔnɔ. A b'a ka ɲaga la kuluyɔrɔ dɔ la, mɔgɔ te se ka se min ma.

²⁹K'a to o yɔrɔ la, a b'a ka dumuni dɛndɛ. A be to o yɔrɔ la ka filɛli kɛ yɔrɔjan.

³⁰ A deenw kɔni be sogokɛnɛ le dumu sa. A te fɔn fɛnsu yɔrɔ la.»