Read dyu Zɔbu ka kitabu 41 Bible Online

Zɔbu ka kitabu 41 - dyu bible

Zɔbu ka kitabu 41

¹Aw b'a miiri ko aw be se o sogo nin kɔrɔ wa? A yetɔ yɛrɛ, aw bentɔ lo!

²Jɔn le b'a yɛrɛ nigɛ ko a b'a kɛlɛ? Ne Ala kɛlɛbaga ka fatɔya tɛmɛna o sogo nin kɛlɛbaga ta kan.

³Jɔn le ka juru be ne Ala la, ne ka kan ka min sara? Fɛɛn bɛɛ ye ne ta ye dugukolo kan.

⁴Ne bena sogo nin cogo yira i la, fanga min b'a la, a ka cɛɲa, n'a ka maramafɛnw.

⁵Jɔn le be se k'a golo bɔ? Jɔn be se ka don a ɲiiw cɛma?

⁶Jɔn be se k'a daa waga? A ɲiiw be siranya bila cogo min?

⁷A fara kɛr'a ka nigɛkunbɛnnanw ye, u nɔrɔnin be ɲɔgɔn na kosɔbɛ.

⁸U nɔrɔnin be ɲɔgɔn na kosɔbɛ yɛrɛ le, hali fɔɲɔ yɛrɛ te se ka don u ni ɲɔgɔn cɛ.

⁹U lalanin be ɲɔgɔn kɔrɔ, u te se ka bɔ ɲɔgɔn na.

¹⁰A mana tiso, yeelen le be bɔ. A ɲaden be manamana i ko dugugwɛda yeelen.

¹¹Tasuma le be bɔ a daa la, takami be yɛrɛkɛ ka bɔ a daa kɔnɔ.

¹²Sisi le be bɔ a nuun na, a be bɔ i ko daga min be wiliwilila tasuma kan.

¹³A dafiɲɛ gwannin lo papapa, fɔɔ a be se ka finfin mana, tasuma be bɔ a daa la.

¹⁴Fanga sifa dɔ b'a kankolo la, fɔɔ o be siranya bil'a yebagaw la.

¹⁵A fari ɲuguyɔrɔw ka gwɛlɛ kosɔbɛ hali n'u ye u digidigi, foyi te kɛ u la.

¹⁶A dusu ka gwɛlɛ i ko kabakuru, a ka gwɛlɛ i ko wugu yɛrɛ.

¹⁷N'a wilila, cɛfariw jaa be tigɛ. Siranya b'u bila boli la.

¹⁸Muru te don a la, taman te foyi ɲa, sɔgɔnan kuma tɛ, biɲɛ ta te fɔ.

¹⁹A be nigɛ filɛ i ko kala. A be zira fana filɛ i ko lɔgɔ tolinin.

²⁰Biɲɛw t'a bila boli la, bɛrɛbonnan ka kabakuru be i ko biin bentɔ a kan.

²¹Bere be i ko kala a fɛ. Ni sɔgɔnan mankan be bɔra ka na, a mako!

²²Tɛgɛnɛkolon dadimanw le b'a kɔnɔbara jukɔrɔ, o be i ko foro dakɛɲɛnan min nɔɔ be to bɔgɔ la.

²³A be se ka kɔgɔji wiliwili i ko tasuma, daga kɔrɔ. A b'a wiliwili i ko daga min fanin be tulu kasadiman na.

²⁴A tɛmɛyɔrɔ be kɛ kɛnɛ ye, jii sanfɛla be gwɛ parapara.

²⁵Kuntigi t'a fɛ dugukolo kan. A danna janko a kana siran foyi ɲa.

²⁶A te waraw jati. Kongosogo farimanw bɛɛ ka masa lo.»