Read dyu Zɔbu ka kitabu 42 Bible Online

Zɔbu ka kitabu 42 - dyu bible

Zɔbu ka kitabu 42

¹Zɔbu ye Masaba jaabi ko:

²«Ne y'a lɔn ko i be se koo bɛɛ la, i te dɛsɛ i ka kolatigɛnin si la.

³ I ko ne tun b'a fɛ k'i ka kolatigɛninw ɲagami, k'o ɲagami ni kumalakolon ye. ‹Tiɲɛ na, ne ye n daa don koo la ne ma min faamu. N tun te foyi lɔn o la, n tun te foyi faamuna fana.›

⁴ E tun ko ne ka n tulo malɔ, i be kuma, ko i bena ne ɲininga, ne k'i jaabi.

⁵Ne tulo tun ye i koo mɛn. Nga sisan, ne ɲaa lara i kan.

⁶O le kama ne be nimisa n ka fɔta la. N be lɔ n ka fili la ka nimisa ka sigi buguri ni bugurigwɛ kan dusukasi bolo.»

⁷Masaba kumana ka ban ni Zɔbu ye tuma min na, a y'a fɔ Elifazi ye ka bɔ Teman ko: «Ne diminin be aw kɔrɔ kosɔbɛ, e n'i teri mɔgɔ fila nunu. Bari, aw ma tiɲɛ fɔ ne ka koo la i ko ne ka baarakɛla Zɔbu.

⁸«Sisan, aw ka taga tura wolonwula ani sagajigi wolonwula ɲini ka na ne ka baarakɛla Zɔbu fɛ, k'o kɛ saraka jɛnita ye aw ka fili kosɔn. A bena ne daali aw ye. Ne bena sɔn a daalikan na, n tena kojugu kɛ aw la tugu ka kɛɲɛ n'aw ka nalomanya ye. Aw ma tiɲɛ fɔ ne ka koo la i ko ne ka baarakɛla Zɔbu y'a kɛ cogo min na.»

⁹Elifazi ka bɔ Teman, ni Bilidadi ka bɔ Suwa, ani Sofari ka bɔ Naama, wilila ka Masaba ka fɔta kɛ, Masaba sɔnna Zɔbu ka daalili la.

¹⁰ Zɔbu ye daalili kɛ a teriw ye ka ban tuma min na, Masaba ye Zɔbu ta ɲa tugu. Fɛɛn min tun b'a fɛ fɔlɔ la, a y'o ɲɔgɔn fila d'a ma.

¹¹O la, Zɔbu balimacɛw n'a balimamusow bɛɛ, ni mɔgɔ minw tun b'a lɔn fɔlɔ la, olu bɛɛ nan'a filɛ. Zɔbu ye dumuni kɛ n'u ye, u y'u ka mɔgɔya yira Zɔbu la, k'a jigi tugu a ka sɛgɛn bɛɛ la, a tun ye min sɔrɔ ka bɔ Masaba fɛ. O kɔ, u kelen kelen bɛɛ ye warigwɛ ni kɔnɔkisɛ sanulaman d'a ma.

¹²Saan minw tugura o kɔ, Masaba ye Zɔbu ta ɲa kosɔbɛ ka tɛmɛ fɔlɔ kan. A ye saga waa tan ni naani (14 000) d'a ma, ni ɲɔgɔmɛ waa wɔɔrɔ (6 000), ani sɛnɛkɛmisi waa fila (2 000), ni fali waa kelen (1 000).

¹³Zɔbu ye dencɛ wolonwula ni denmuso saba sɔrɔ fana.

¹⁴A ye denmusokɔrɔba tɔgɔ la ko Zemima, ka filanan tɔgɔ la ko Kesiya, ka sabanan tɔgɔ la ko Keranapuki. [1]

¹⁵Zɔbu denmusow ɲɔgɔn tun te yen cɛɲa na jamana nin kuturu kɔnɔ. U facɛ Zɔbu tun y'u niyɔrɔ nafolo d'u ma u balimacɛw cɛma.

¹⁶O tɛmɛnin kɔ, Zɔbu ye saan kɛmɛ ni bi naani sɔrɔ. A y'a deenw ye, n'a mamadenw, fɔɔ ka taga se a ka tulomasamaw ma, ani olu mamadenw.

¹⁷Zɔbu ye sijan sɔrɔ kosɔbɛ, a kɔrɔla ka sɔrɔ ka sa.