Read dyu Zɔbu ka kitabu 7 Bible Online

Zɔbu ka kitabu 7 - dyu bible

Zɔbu ka kitabu 7

¹«Adamaden ta ye tɔɔrɔ le ye a sii kɔnɔ dugukolo kan, a ka loonw be i ko baaraden ta.

²Jɔɔn b'a fɛ ka suma dɔɔni sɔrɔ cogo min na, baaraden b'a ka sara kɔnɔna cogo min na,

³o cogo kelen la, ne niyɔrɔ kɛra kalo caaman sigɛn ye, ne ye min sɔrɔ, o ye tɔɔrɔ ye suu caaman kɔnɔ.

⁴N latɔ, n be n yɛrɛ ɲininga ko: ‹Ne bena wili tuma jumɛn?› Dugu te gwɛ joona. Ne be yɛlɛmayɛlɛma fɔɔ ka dugu gwɛ.

⁵Ne fari kɛra tumu ni kurukuru ye ne golo be furufurula ka nɛɛn don.

⁶Ne sii tilew ka teli ka tɛmɛ kwɛrɛ danbaga ka kurunnin kan. U banna, jigi te yen tugu.

⁷Ala, i hakili to a la ko ne ye niman le ye, ne ɲaa tena hɛrɛ ye tugu.

⁸E min be ne kɔlɔsira, e ɲaa tena n ye tugu. I bena filɛli kɛ, i tena ne ye.

⁹Sankaba be tunu ka taga cogo min na, lahara taabaga be ten, a te kɔsegi.

¹⁰A te segi ka n'a ka soo kɔnɔ, a ka sigiyɔrɔ mɔgɔw be ɲinɛ a kɔ.

¹¹O la ne te se ka je, ne dusu kasinin lo, fɔɔ n ka dɔ fɔ, ne bena n ka dusukasi fɔ.

¹²Ne ye kɔgɔji ye, walima a kɔnɔ kabakofɛn ye wa, n'i be ne kɔlɔsira ten?

¹³Ni ne y'a fɔ ko n bena lafiɲɛ dilan kan, ko ne ka sɛgɛn bena nɔgɔya layɔrɔ la,

¹⁴o tuma na, i be siranya bila ne la ni sikow ye, e be n jaa wili ni yelifɛnw ye.

¹⁵Ɔnhɔn, ni e tun ye ne kaan dɛrɛ, o le tun ka fisa. Saya ka fisa n ma n tɔ ka to kolo ye.

¹⁶Koo nigɛ bɔra! Ne tena to sii la kudayi do! Ne to n be lafiɲɛ, tɔnɔ te n ka ɲanamaya la tugu.

¹⁷ Adamaden ye mun ye n'i b'a jati ten? Mun na i b'a ka koo jati ten?

¹⁸Fɔɔ i be to ka na bɔ a ye sɔgɔma o sɔgɔma, ka to k'a kɔrɔbɔ tuma bɛɛ.

¹⁹E bena ne ye ka n to yen tuma jumɛn? E bena ne to n be n daji kunu tuma jumɛn?

²⁰Ni ne y'i hakɛ ta, ne ye mun le kɛ i la, adamaden ka koo sɛgɛsɛgɛbaga? Mun na i ka bolokuru be jigi ne kan? Ne kɛra kunko ye i ma wa?

²¹Mun na e te muɲu ne kɔrɔ, ka yafa ne ma? Ne be ɲini ka sa, n lanin be buguri la, i bena ne ɲini waati min na, ne tena kɛ yen tugu.»