Read dyu Zɔbu ka kitabu 8 Bible Online

Zɔbu ka kitabu 8 - dyu bible

Zɔbu ka kitabu 8

¹Bilidadi ka bɔ Suwa y'a fɔ Zɔbu ye ko:

²«I bena to nin kuma nin kan fɔɔ ka se waati jumɛn? I ka kuma kɛra i ko fɔɲɔba, o bena ban tuma jumɛn?

³O tuma na, Ala be kotilennin yɛlɛma wa? Setigi be fili tiɲɛ ma wa?

⁴N'a sɔrɔ i deenw donna Ala gasi la, a y'u jalaki u ka fili kosɔn.

⁵Nga ele kɔni, n'i ye Ala ɲini, n'i ye Setigi daali ko a ka makari,

⁶ni jalakiyɔrɔ te i la, n'i tilennin lo, a tena mɛn k'i dɛmɛ. A bena i ta ɲa i ka tilenninya kɔnɔ.

⁷E cogokɔrɔ tena jati foyi ye, i bena kɛ cogo min na, o bena fisaya kosɔbɛ.

⁸E ka fɔlɔmɔgɔw ɲininga ka ɲa, u bɛmaw sera ka min faamu, i k'i hakili to o la.

⁹An wolotuma ma mɛn, an te foyi lɔn, an sii be tɛmɛ i ko suma.

¹⁰Olu bena se k'i kalan, u bena dɔ fɔ i ye. Min b'u kɔnɔ, u bena o le fɔ i ye.

¹¹Nɔnfɔn te wili yɔrɔ si ni kɔda tɛ, buruku fana te falen ni lɛɛ kɔnɔ tɛ.

¹²Ni yɔrɔ jara, u be kɔn ka ja biin tɔw ɲa hali ni mɔgɔ m'u bɔn, k'a sɔrɔ u wilicogo ka ɲi.

¹³Mɔgɔ min be ɲinɛ Ala kɔ, ale laban be ten le, mɔgɔjugu jigi be kɛ fuu ye ten le.

¹⁴A jigi be tigɛ. A jigi be i ko taalen ka mana.

¹⁵N'a ko a be tintin a ka soo kan, soo be ci. N'a ko a be yɛlɛ a kan, a be yɛrɛkɛ.

¹⁶A be i ko yiri min fara jii la tilemana na, a b'a bolow yɛrɛkɛ nankɔ sanfɛ.

¹⁷A lili be don fɔɔ kabakuruw kɔnɔ, a be se farawo yɔrɔ bɛɛ la.

¹⁸N'u y'a bɔn ka bɔ yen, yanni dɔɔni, a be kɛ i ko ale tun te yan.

¹⁹O le be kɛ a laban ye. Dɔ wɛrɛ bena falen a nɔkɔrɔ la fana.

²⁰Ala tena mɔgɔ jalakibali bila fewu, a fana te mɔgɔjugu dɛmɛ abada.

²¹A ben'a kɛ e be yɛlɛko, a ben'a kɛ i be nisɔndiyapɛrɛnkan bɔ.

²²Mɔgɔ minw be wili i kama, olu bena maloya, mɔgɔjuguw ka boonw bena tunu.»