Read dyu Zɔbu ka kitabu 9 Bible Online

Zɔbu ka kitabu 9 - dyu bible

Zɔbu ka kitabu 9

¹Zɔbu ye Bilidadi jaabi ko:

² «Ne y'a lɔn k'o be ten tiɲɛ na. Adamaden be se ka tiɲɛ sɔrɔ Ala ɲakɔrɔ cogo di?

³Ni adamaden ko ale ni Ala be ɲɔgɔn kiti, jaabili kelen tena sɔrɔ a fɛ ɲiningali waa kelen kɔnɔ.

⁴Lɔnniya ni sebagaya ye Ala ta ye. Jɔn le be se ka lɔ a ɲa ka tila ka kisi?

⁵A be kuluw wili ka bɔ u sigiyɔrɔw la, hali u te bɔ a kala ma. A diminin le b'o ci.

⁶A be dugukolo yɛrɛyɛrɛ, a juu sigilan be yuguyugu.

⁷N'a ko tile kana bɔ, a te bɔ, a be lolow bali ka bɔ.

⁸Ale kelen le ye sankolo yɛrɛkɛ ten, a fana be taama kɔgɔji kan.

⁹ A ye lolo sifa dɔw dan. Lolo deen mugan ni fila minw be ɲɔgɔn kan, ni Sulagwɛnbagaw ni Sisɛ n'a deenw, ani worodugu ɲafan fɛ lolow.

¹⁰A be kobabaw kɛ minw te se ka faamu, a be kabakow kɛ daan te minw na.

¹¹A be tɛmɛ ne gɛrɛfɛ, ne t'a ye. A be bɔ ne kɔrɔ, ne te bɔ a kala ma.

¹²N'a ye fɛɛn min minɛ fanga na, jɔn be se k'a bɔsi? Jɔn be se k'a ɲininga ko: ‹E be mun le kɛra?›

¹³Ni Ala dimina, jɔn be se k'a lɔ? Kɔgɔji kɔnɔ fɛnjugu n'a tɔɲɔgɔnw be kuru a ɲafɛ le.

¹⁴Ne bena se ka mun fɔ a ye? Ne bena kuma jumɛn le fɔ a ye?

¹⁵Hali ni tiɲɛ be ne fɛ, ne tena se ka foyi fɔ, fɔɔ n ka n kitibaga daali a ka makari n na.

¹⁶Ni ne yɛrɛ y'a wele, n'a ye n jaabi, n yɛrɛ tena se ka l'a la ko a ye n lamɛn.

¹⁷Ale min be ne halakira fɔɲɔba kɔnɔ, a be n tɔɔrɔra kosɔbɛ ni kuun t'a la.

¹⁸A te ne to n be lafiɲɛ, a be n dusu kasira yɛrɛ le.

¹⁹Ni ne ko n b'a kɛ fangako ye, ale lo do ye fangatigi ye. Ni ne ko kiti lo, jɔn le bena ne dɛmɛ o la?

²⁰Hali ni ne tilennin lo, ne daa yɛrɛ le bena n don jalaki la. Hali ni jalakiyɔrɔ te n na, n dalakuma bena kunko lase n ma.

²¹Ne ye jalakibali ye wa, ne t'o lɔn n yɛrɛ ma. Diɲɛ nigɛ yɛrɛ bɔra ne la.

²²Koo bɛɛ ye kelen ye ne fɛ, o la, ne b'a fɔ ko Ala be mɔgɔɲuman ni mɔgɔjugu halaki.

²³Balawuko mana cun mɔgɔ jalakibali kan k'a faga, a ka dusukasiko te foyi ye Ala ɲana.

²⁴Ni jamana dɔ donna mɔgɔjugu bolo, Ala b'a kɛ kititigɛlaw te yeli kɛ ka ɲa. Ni ale tɛ, jɔn b'o kɛ?

²⁵Ne sii tilew ka teli ka tɛmɛ bolibaga kan. U tɛmɛna, n ma hɛrɛ ye yɛrɛ.

²⁶U be ser'u laban na joona joona, u be tɛmɛna i ko sɛgɛn min be tagar'a ka dumuni tayɔrɔ.

²⁷Ni n ko n bena ɲinɛ n ka dusukasi kɔ, ka n ka hamiko ye k'a to yen ka nisɔndiya,

²⁸ne ka tɔɔrɔkow bɛɛ be siranya bila ne la, n y'a lɔn ko Ala tena ne filɛ jalakibali ye.

²⁹Ne le jalakinin be ka ban. Mun na ne ben'a yira tugu ko n jalakinin tɛ?

³⁰Hali ni ne tun kora ni safuna ye, ni ne tun ye n tigɛ ko ni sigɛn ye,

³¹a bena segi ka n don bɔgɔ la, ne ka fani be ɲugi ne la i ko mɔgɔ be ɲugi a tɔɲɔgɔn na cogo min na.

³²Ala te adamaden ye n'an bena dalakuma falen ɲɔgɔn fɛ, walima ka taga n'a ye kititigɛla fɛ.

³³Ni mɔgɔ dɔ tun be yen k'an bɔ ɲɔgɔn na, min ben'a bolo la an fila kan,

³⁴o tigi tun bena Ala ka bere bɔ ne kan, a siranya tun tena ne minɛ tugu.

³⁵Ne tun bena se ka kuma a fɛ ni jagwɛlɛya ye, nga o te yen, ne kelen dama lo.