Read dyu Dɔnkiliw Ala ye kitabu 10 Bible Online

Dɔnkiliw Ala ye kitabu 10 - dyu bible

Dɔnkiliw Ala ye kitabu 10

¹Masaba, mun na e tora yɔrɔjan na? Mun na e y'i yɛrɛ dogo dusukasi waati la?

²Mɔgɔjuguw b'u yɛrɛ funu ka sigɛnbagatɔw tɔɔrɔ. O la, u ka baarajugu segira u yɛrɛ ma.

³Mɔgɔjugu b'a yɛrɛ tanu a ka miiriyajugu la. Wasabali be Masaba nɛni k'a dɔgɔya.

⁴Mɔgɔjugu be dabayakuma fɔ ko: «Ala te mɔgɔ ɲaa gwan! Ala te yen!» O dama le y'a ka miiriya ye.

⁵A ka koo be ɲa tuma bɛɛ, i ko i ka kitiw te se a ma. A juguw kɛlɛko te foyi ye a fɛ.

⁶A b'a fɔ ko: «Foyi tena kɛ ne la, bɔnɛ foyi tena se ne ma.»

⁷ Danga ni namarakuma le fanin b'a daa la. A ka kuma be na ni bɔnɛ ani tilenbaliyako ye.

⁸A be dɛn dugu dafɛ ka mɔgɔ jalakibali faga. A be sigɛnbagatɔ dɛndɛ.

⁹A be dogo yɔrɔjan i ko jara min b'a layɔrɔ la. A be dogo janko ka cun dɛsɛbagatɔ kan, a be cun a kan k'a minɛ a ka jaan kɔnɔ.

¹⁰A be biri a kan ka ben a kan n'a ka gwiliya bɛɛ ye. Sigɛnbagatɔ kɔni b'a ka fanga kɔrɔ.

¹¹Mɔgɔjuguw b'a fɔ ko: «Ala mako te an ka koo la, a y'a ɲaa tugu, a tena foyi ye.»

¹²Masaba, wili! Ala, i bolo kɔrɔta, kana ɲinɛ dɛsɛbagatɔw kɔ.

¹³Mun na mɔgɔjugu be yɛlɛ e Ala ma ka to ka miiri ko e tena foyi kɛ?

¹⁴E yɛrɛ ɲaa be dɛsɛbagatɔ ka tɔɔrɔ n'a ka sigɛn na, e b'u filɛra waasa k'a dɛmɛ. Dɛsɛbagatɔ jigi ye ele le ye, ele le ye falatɔ dɛmɛbaga ye.

¹⁵Mɔgɔjugu ka fanga cɛn, a ka baarajugu juru sara a la k'a halaki pewu.

¹⁶Masaba le ye masa ye kudayi. A ɲasiranbaliw bena tunu ka bɔ a ka jamana kɔnɔ.

¹⁷Masaba, e be dɛsɛbagatɔw ka daalili lamɛn. E b'u jigi tugu ani ka mɛnni k'u fɛ,

¹⁸ka tɔɔrɔbagatɔw ni falatɔw ka tiɲɛ fɔ. O la, adamaden tena mɔgɔ jaa tigɛ diɲɛ kɔnɔ tugu.