Read dyu Dɔnkiliw Ala ye kitabu 102 Bible Online

Dɔnkiliw Ala ye kitabu 102 - dyu bible

Dɔnkiliw Ala ye kitabu 102

¹Sigɛnbagatɔ ka daalili, a dɛsɛnin lo b'a ka hamiko fɔra Masaba ye.

²Masaba, ne ka daalili lamɛn. A to ne kasikan ka se i ma.

³Kana i yɛrɛ dogo ne la ne ka dusukasi waati la. Ne lamɛn n ka weleli loon na, ne jaabi joona joona,

⁴bari ne sii be tɛmɛna i ko sisi, ne barika be tununa i ko tasuma be fɛɛn kɛ cogo min na.

⁵Ne kɛra i ko biin janin, u ye min tigɛ ka ben. Ne be ɲinɛ ka dumuni kɛ.

⁶Ne ŋunanna kojugu, fɔɔ n fasara ka to kolo dama.

⁷Ne kɛra i ko kongokolon kɔnɔnin dɔ, ne be i ko gingin.

⁸Ne be si ɲana, ne be i ko kɔnɔnin min b'a kelen sanbon kan.

⁹Ne juguw be ne darabɔ loon bɛɛ. U be ne lɔgɔbɔ ka to ka ne cogo ta ka ɲɔgɔn danga.

¹⁰Ne be bugurigwɛ le dumu dumuni nɔɔ na. Ne ɲaji fana be ɲagami ne ka minji la.

¹¹O kɛra i ka dimikojugu kosɔn, bari i ye ne ta ka n fili yɔrɔjan.

¹²Ne sii be tɛmɛna i ko suma, ne be jara i ko biin.

¹³Nga Masaba, e ye kuntigi ye kudayi. Waati nata mɔgɔw bena to ka e koo fɔ tuma bɛɛ.

¹⁴I bena dɔ kɛ, *Siyɔn makari kama. Bari a dɛmɛwaati sera. Tiɲɛ na, waati sera.

¹⁵Siyɔn kabakuru koo ka d'i ka baarakɛlaw ye, a tomo makari b'u la.

¹⁶Siya wɛrɛw bena siran Masaba ɲa. Diɲɛ kɔnɔ masaw bena siran a ka sebagaya ɲa

¹⁷tuma min na Masaba bena Siyɔn lɔ tugu, a bena ye a ka nɔɔrɔ la.

¹⁸A bena ɲanibagatɔw daalili mɛn, a te ban u ka daalili la.

¹⁹U koo ka sɛbɛn ka mara waati nata mɔgɔw ye, janko jama min bena sɔrɔ, ale ka Masaba boɲa.

²⁰Ka Masaba to a ka yɔrɔ la, a ye filɛli kɛ. K'a to sankolo la, a ye yeli kɛ dugukolo kan.

²¹A y'o kɛ janko ka kasoden ŋunankan lamɛn, ka mɔgɔw bɔsi, minw be saya sira kan,

²²janko u ka Masaba tɔgɔ fɔ Siyɔn dugu kɔnɔ, k'a tanu Zeruzalɛmu kɔnɔ,

²³tuma min na siyaw bena ɲɔgɔn lajɛn janko ka Masaba bato.

²⁴A ye ne barika ban sira kan, a ye dɔ bɔ ne sii la.

²⁵Ne ko: «N ka Ala, e min be yen kudayi, kan'a to ne kanbelenman be sa.»

²⁶ Ele le ye dugukolo dan kabini fɔlɔfɔlɔ, sankolo ye i bulonɔ ye.

²⁷Olu bena ban, nga ele be to. U bena kɔrɔ i ko fani. I bena u yɛlɛma i ko fani donta, u bena yɛlɛma.

²⁸Nga e kɔni be to i cogo la, e sii te ban ka ye.

²⁹I ka baarakɛlaw deenw bena sigiyɔrɔ sɔrɔ. U kɔmɔgɔw bena to e ɲakɔrɔ.