Read dyu Dɔnkiliw Ala ye kitabu 103 Bible Online

Dɔnkiliw Ala ye kitabu 103 - dyu bible

Dɔnkiliw Ala ye kitabu 103

¹Dawuda ka dɔnkili dɔ. Ne be barika la Masaba ye. Ne be Ala barika ni n dusu bɛɛ ye.

²Ne be barika la Masaba ye. Ne man kan ka ɲinɛ a ka koɲuman si kɔ.

³Ale lo be ne ka fili bɛɛ yafa ne ma, ale lo be n kɛnɛya ka bɔ n ka banaw bɛɛ la.

⁴A be ne bɔ dingɛ la. A be makari ne la ka koɲuman kɛ ne ye.

⁵A be ne wasa ni fɛnɲumanw ye janko ne ka fangakura sɔrɔ i ko sɛgɛn, ka to i ko kanbelen kɛnɛkɛnɛ.

⁶Masaba be kotilennin kɛ, a be tiɲɛ di mɔgɔtɔɲɔnin ma.

⁷A y'a ka kolatigɛninw yira Musa la. A y'a ka kabakow yira Isirayɛlidenw na.

⁸ Masaba be makari, a be hinɛ fana. A te dimi joona, a ka ɲumanya ka ca fana.

⁹A te jalakili kɛ tuma bɛɛ. A te dimi mara kudayi fana.

¹⁰A t'an minɛ ka kɛɲɛ n'an ka kojugu ye. A t'an sara ka kɛɲɛ n'an ka fili ye.

¹¹Sankolo ni dugukolo furancɛ ka bon cogo min na, o cogo kelen la fana, a ka ɲumanya ka bon a ɲasiranbagaw kan.

¹²Kɔrɔn fɛ ni tileben ka jan ɲɔgɔn na cogo min na, o cogo kelen na, a b'an ka filiw yɔrɔ jaɲa an na.

¹³Faa be hinɛ a deenw na cogo min na, o cogo kelen na, Masaba be hinɛ a ɲasiranbagaw la.

¹⁴Bari an danna ni fɛɛn min ye, a b'o lɔn. A hakili b'a la ko an ye buguri ye.

¹⁵Adamaden sii be i ko biin. A be boɲa ka kunkɔrɔta sɔrɔ i ko biin min ye feeren bɔ.

¹⁶Fɔɲɔ man'a fiyɛ dɔrɔn, a be ja ka ben. A tun be yɔrɔ min na, a koo te lɔn yen tugu.

¹⁷Nga Masaba ka ɲumanya b'a ɲasiranbagaw kan kudayi. A ka kotilennin be kɛ u deenw n'u mamadenw ye.

¹⁸A b'u kɛ a ka layidu batobagaw ye, ani minw b'u hakili to a ka fɔtaw la k'u bato.

¹⁹Masaba ka sigiyɔrɔ be sankolo kɔnɔ. A ka kuntigiya be fɛɛn bɛɛ kan.

²⁰Masaba ka mɛlɛkɛw, aw ka barika la a ye, aw minw b'a ka fɔta kɛ ni barika ye, aw minw b'a ka kuma bato tigitigi.

²¹Aw minw bɛɛ y'a ka kɛlɛdenw ye, aw minw be baara kɛr'a ye k'a sago kɛ, aw ka barika la Masaba ye.

²²Masaba ye aw fɛɛn o fɛɛn dan, k'aw to yɔrɔ o yɔrɔ a ka kuntigiya kɔrɔ, aw ka barika la a ye. Ne be barika la Masaba ye.