Read dyu Dɔnkiliw Ala ye kitabu 104 Bible Online

Dɔnkiliw Ala ye kitabu 104 - dyu bible

Dɔnkiliw Ala ye kitabu 104

¹Ne be barika la Matigi ye. Masa Ala, e ka bon kosɔbɛ, nɔɔrɔ ni dawula b'i kan.

²Yeelen be i yɔrɔ bɛɛ la i ko fani, i kaan na. I ye sankolo yɛrɛkɛ i ko faniso.

³I y'i ka sigiyɔrɔ labɛn jiba kan. Sankabaw le y'i ka kɛlɛkɛwotorow ye, i be taama fɔɲɔ le kɔnɔ.

⁴ I be fɔɲɔ le kɛ i ka cidenw ye, i be tasuma kɛ i ka baarakɛfɛn ye.

⁵I ye dugukolo sigi a jusigilan kan, a te se ka cɛn cogo si la.

⁶I tun ye jiba kɛ k'a datugu i ko birifani. A jii tun be yɛlɛ kuluw kan.

⁷A tun be bolila i ɲa. I ka sanpɛrɛn y'a kɛ a tɛmɛna pewu.

⁸A tun be yɛlɛ ka jigi tintinw kan, ka to ka taga i ka yɔrɔ latigɛnin na.

⁹I ye daan bɔ jii ye a man kan ka tɛmɛ min na, janko a kana segi ka dugukolo datugu.

¹⁰I y'a kɛ jii be bɔ dugukolo la ka kɛ kɔɔ ye, n'u be boli kuluw cɛma.

¹¹Kongosogow be minni kɛ olu le kɔnɔ. Kongofaliw b'u ka minnɔgɔ nɔgɔya o yɔrɔ la.

¹²Kɔnɔw be taga to u daa la. U be to k'u kaan bɔ yirifuraburuw kɔnɔ.

¹³Ka Masaba to a ka sigiyɔrɔ la sanfɛ, a b'a kɛ sanji be ben kuluw kan, dugukolo be fa a ka kɛtaw nɛɛma la.

¹⁴A b'a to biin be falen begɛnw ye, k'a kɛ suman be wili adamaden ka makoɲa kama.

¹⁵A b'a kɛ duvɛn be sɔrɔ, adamaden nisɔndiyafɛn, k'a kɛ tulu fana be sɔrɔ ka adamaden ɲada ɲa, dumuni ka sɔrɔ min be adamaden dɛmɛ.

¹⁶Masaba, i ka yiriw be jii sɔrɔ a ɲaa ma, hali Liban yiribabaw.

¹⁷Kɔnɔw b'u ka ɲagaw la o yɔrɔ la. Badalakɔnɔw b'u ka sigiyɔrɔ kɛ sipɛrɛyiriw kan.

¹⁸Kulujanjanw ye kongobaw ka yɔrɔ ye, farayɔrɔw ye farawonyinanw ta ye.

¹⁹Masaba, e ye kalo dan k'o kɛ waati dantigɛbaga ye saan kɔnɔ, tile b'a yɛrɛ ka benwaati kala ma.

²⁰E b'a kɛ dibi be na, suu be ko. Kongosogow bɛɛ be wili ka yaalayaala.

²¹Jaradenw be sɔngɔ u ka dumuni kɔ, u b'u niyɔrɔ daalila Ala fɛ.

²²Tile mana wili, u be kɔsegi ka taga don u ka layɔrɔw la.

²³Adamaden be to ka ta'a ka baara la, a be taga baara kɛ fɔɔ ka tile ban.

²⁴Masaba, e ka kɛtaw ka ca kosɔbɛ. E y'u bɛɛ kɛ ni hakilitigiya ye. Dugukolo fanin be i ka danfɛnw na.

²⁵Kɔgɔjiba filɛ sa. A kɔnɔnafɛnw daa te lɔn, a sogobabaw ni fitiniw.

²⁶ Kurunbabaw be boli o yɔrɔ la. I ye sogojugu Leviyatan fana dilan a ka tulon kɛ yen.

²⁷U bɛɛ be ele le filɛra janko e k'u ka dumuni d'u ma.

²⁸E b'o d'u ma, u b'a dumu. E b'i tigɛ yɛlɛ dɔrɔn, u be wasa.

²⁹N'i y'i yɛrɛ dogo, u be siran. N'i y'u nii minɛ, u be sa ka kɔsegi ka kɛ buguri ye.

³⁰E be nii don u la, u be kɛ nimanfɛnw ye, a kɛra ten, fɛɛn bɛɛ be kɛ kura ye dugukolo kan.

³¹Boɲa ka la Masaba kan tuma bɛɛ. A ka danfɛnw k'a koladiya.

³²Masaba mana dugukolo filɛ dama, a be yɛrɛyɛrɛ. A mana maga kuluw la dama, sisi be bɔ.

³³Ne bena dɔnkili la Masaba ye ne sii bɛɛ la. Ka ne to nii na, ne bena n ka Ala tanu.

³⁴Ne ka dɔnkili ka diy'a ye dɔrɔn. Ne b'a fɛ ka nisɔndiya Masaba kosɔn.

³⁵Kojugukɛlaw ka tunu ka bɔ dugukolo kan, mɔgɔjuguw kana ye tugu. Ne be barika la Masaba ye. Masaba ka tanu!