Read dyu Dɔnkiliw Ala ye kitabu 105 Bible Online

Dɔnkiliw Ala ye kitabu 105 - dyu bible

Dɔnkiliw Ala ye kitabu 105

¹ Aw ka Masaba tanu, aw k'a tɔgɔ boɲa. Aw k'a ka kabakow fɔ jama cɛma.

²Aw ka dɔnkili l'a tɔgɔ la k'a makiri. Aw k'a ka kɛtaw bɛɛ fɔ.

³Aw ka nisɔndiya a tɔgɔ kosɔn. Mɔgɔ minw be Masaba bato, olu dusu ka diya.

⁴Aw ka Masaba n'a ka sebagaya ɲini. Aw ka gwɛrɛ a ɲakɔrɔ tuma bɛɛ.

⁵A ye koba minw kɛ, aw k'aw hakili to o la, k'aw hakili to a ka kabakow n'a ka kitiw la,

⁶aw minw kɛr'a ka baarakɛla Ibrayima kɔmɔgɔw ye, aw, Yakuba deenw, a ka mɔgɔ wolomaninw.

⁷An ka Ala le ye Masaba ye. Ale lo be dugukolo bɛɛ mara.

⁸A hakili b'a ka layidu la tuma bɛɛ, a ye kuma min fɔ waati caaman nata mɔgɔw kosɔn,

⁹ a ye bɛɛn min kɛ ni Ibrayima ye, a y'a daa di Isiyaka ma min la.

¹⁰ A ye min kɛ landa ye Yakuba ye, a kɛra layidu cɛnbali ye a fɛ.

¹¹A tun y'a fɔ ko: «Ne bena Kanaan jamana d'aw ma, o ka kɛ aw niyɔrɔ ye.»

¹²O y'a sɔrɔ u tun man ca, u tun ye lonanw ye Kanaan jamana kɔnɔ.

¹³U tora ka yaala siyaw cɛma, ka to ka dondon jamanaw na.

¹⁴ Nga a ma sɔn mɔgɔ si ka maga u la k'u tɔɔrɔ. A ye masacɛ dɔw jalaki u kosɔn ko:

¹⁵«Aw kana maga ne ka mɔgɔ wolomaninw na, aw kana kojugu kɛ ne ka kiraw la.»

¹⁶ Waati dɔ, a y'a kɛ kɔngɔ donna jamana kɔnɔ, dumuni dɛsɛra pewu.

¹⁷ A tun ye mɔgɔ dɔ bila ka ta'a ka jama nin ɲa. A tɔgɔ tun ko Yusufu. Ale tun feerela ka kɛ jɔɔn ye o le kama.

¹⁸ U tun y'a seenw siri ni jɔrɔkɔ ye, k'a kaan don nigɛ la,

¹⁹fɔɔ a ka kuma dafara tuma min na, loon min na Masaba y'a cogo yira.

²⁰ O tuma na, masacɛ k'u k'a labila, jama ɲamɔgɔ y'a labila.

²¹ A y'a kɛ kuntigi ye a ka soo kɔnɔ k'a sigi a ka fɛɛn bɛɛ kunna,

²²janko ka ɲamɔgɔw ladi a sago la, a fana ka se ka lɔnniya di cɛkɔrɔbaw ma.

²³ O tuma na, Yakuba tagara Ezipiti, a tagara sigi Kamu ka mara la.

²⁴ Masaba y'a kɛ a ka jama jidira kosɔbɛ, a fana y'u barika boɲa ka tɛmɛ u juguw kan.

²⁵A nan'a kɛ Ezipitikaw dusu yɛlɛmana. U y'a ka jama kɔniya, u y'u tɔɔrɔ kosɔbɛ.

²⁶ O la, Masaba tun y'a ka baarakɛla Musa ci, ni Arɔn, a tun ye min woloma.

²⁷U ye kobabaw ni kabakow kɛ Ezipiti.

²⁸ A y'a kɛ dibi donna, nga u ma sɔn a ka kuma ma.

²⁹ A y'a kɛ jii kɛra joli ye, u ka jigɛw sara.

³⁰ Tɔrisenjanw yɛlɛla jamana yɔrɔ bɛɛ la. U donna fɔɔ u ka masaw ka sibonw kɔnɔ.

³¹ A y'a kɛ limɔgɔ farimanw ni sosow bɔra fɔɔ ka jamana yɔrɔ bɛɛ fa.

³² A y'a kɛ sanbɛrɛ benna sanji nɔɔ na. Sanpɛrɛn jigira ka tasuma wili jamana kɔnɔ.

³³A y'a kɛ u ka *ɛrɛzɛn n'u ka torow cɛnna. A y'u ka yiriw karikari jamana kɔnɔ.

³⁴ A y'a kɛ tɔɔnw ni kɛrɛniw bɔra caaman.

³⁵Olu y'u ka jamana biinw, n'u ka sumanw bɛɛ ɲimi.

³⁶ A y'u ka gwasow bɛɛ deen fɔlɔw faga.

³⁷ A y'a kɛ a ka jama bɔra ni sanu ani warigwɛ ye, mɔgɔ si ma dɛsɛ u cɛma.

³⁸Ezipitikaw nisɔndiyara u ka bɔ la, bari u tun be siranna u ɲa kosɔbɛ.

³⁹ A ye sankaba bɔ, ale ye suma kɛ u ye, ka tasuma kɛ o ka yeelen bɔ u ye sufɛ.

⁴⁰ U y'a daali tuma min na, a ye tukɔnɔwɔlɔnw d'u ma, ka dumuni jigi u ye ka bɔ sanfɛ. U y'o dumu ka fa.

⁴¹ A y'a kɛ fara cira, jii bɔra. O jii nin tun be woyora yɔrɔ janin na i ko baji.

⁴²Bari Masaba hakili b'a ka layidu la, a tun ye min ta a ka baarakɛla Ibrayima ye.

⁴³O la, a y'a kɛ a ka jama bɔra ni nisɔndiya ye. A y'a ka mɔgɔ wolomaninw bɔ ni boɲa ye.

⁴⁴ A ye siya wɛrɛw ka dugukolo le d'u ma. A ye jamana wɛrɛ mɔgɔw ka baara tɔnɔ d'u ma.

⁴⁵A daan ye u k'a ka fɔta bato k'a ka sariya sira taama. Masaba ka tanu!