Read dyu Dɔnkiliw Ala ye kitabu 109 Bible Online

Dɔnkiliw Ala ye kitabu 109 - dyu bible

Dɔnkiliw Ala ye kitabu 109

¹Dɔnkililabagaw kuntigi ka dɔnkili. Dawuda ka dɔnkili dɔ. Ala, ne be ele min tanura, kana je ten.

²Bari mɔgɔjuguw ni namaratɔw be kuma goman fɔra ne kama. U be galon tigɛra k'a la ne kan.

³U ka kumajuguw le kɛnin be ka ne lamini. U be ne kɛlɛla ni kuun t'a la.

⁴Ne b'u kanu, nga olu be ne jalakira, ne kɔni be to daalili la dɔrɔn.

⁵U be ne sara ni kojugu ye n ka koɲuman nɔɔ na. Ne ka kanuya nɔɔ na, o ye kɔniyali ye.

⁶U ko: «A ka don mɔgɔjugu bolo. Jalakibaga ka sɔrɔ a la a kinibolo fɛ.

⁷N'u y'a kiti, a ka jalaki. A ka daalili ka kɛ kumajugu ye i fɛ.

⁸ A kana sii sɔrɔ, mɔgɔ wɛrɛ k'a nɔɔ ta.

⁹A deenw ka kɛ falatɔw ye, a ka muso ka kɛ firiyamuso ye.

¹⁰A deenw ka kɛ yaalabagaw ye, ka kɛ daalikɛlaw ye. U ka gwɛn ka bɔ u ka sigiyɔrɔ tomo la.

¹¹Jurutigi k'a ka fɛɛn bɛɛ minɛ. A sigɛnna ka fɛɛn minw sɔrɔ, lonanw ka olu ta.

¹²Mɔgɔ si kana ɲumanya kɛ a ye, mɔgɔ si kana makari a ka falatɔw la.

¹³A buruju ka ban, u tɔgɔ kana wele waati nata mɔgɔw cɛma.

¹⁴Masaba hakili ka to a faaw ka fili la. A bamuso ka kojugu kana yafa.

¹⁵Masaba hakili ka to o la tuma bɛɛ. U ka koo kana to mɔgɔw hakili la dugukolo kan.»

¹⁶Bari a ma miiri koɲuman la, nga a tora ka dɛsɛbagatɔw ni sigɛnbagatɔw le tɔɔrɔ fɔɔ k'u faga.

¹⁷Danga tun ka d'a ye, danga k'a sɔrɔ. A tun te duba fɛ, duba yɔrɔ ka jaɲa a la.

¹⁸Danga le tun b'a daa la tuma bɛɛ. Danga ka bɔn a kan i ko jii, u k'a ɲigi i ko tulu.

¹⁹U ka kɛ i ko a kannafani. U ka kɛ i ko a ka cɛsirinan min b'a cɛɛ la tuma bɛɛ.

²⁰O ka kɛ ne jalakibaga, ani ne nɛnibagaw ka sara ye Masaba fɛ.

²¹Matigi, Masaba, e ka ne dɛmɛ e tɔgɔ kama, bari i ka ɲumanya ka bon, ne bɔsi.

²²Ne ye sigɛnbagatɔ ni dɛsɛbagatɔ ye, ne dusu cɛnnin be.

²³Ne taatɔ filɛ i ko suma. U be ne gwɛnna i ko tɔɔn.

²⁴Ne ye suun don fɔɔ n te se ka wili ka lɔ. Ne fasara.

²⁵ Ne kɛra lɔgɔbɔfɛn ye u fɛ. N'u ye ne ye, u b'u kuun firinfirin.

²⁶Masaba ne ka Ala, ne dɛmɛ. Ne kisi e ka ɲumanya kama.

²⁷U k'a lɔn ko ele Masaba ka setigiya le y'o kɛ, ko ele Masaba le y'o kɛ tigitigi.

²⁸Olu be dangali kɛ, ele kɔni bena ne dɛmɛ. N'u wilila n kama, u bena maloya, e ka baarakɛla bena nisɔndiya.

²⁹A to ne jalakibagaw hakili ka ɲagami. Maloya k'u minɛ, a ka kɛ i ko fani le birinin b'u kan.

³⁰Ne bena n kaan kɔrɔta ka Masaba bato. Ne ben'a tanu jama cɛma.

³¹Bari a be to dɛsɛbagatɔ gɛrɛfɛ, a b'a kisi a jalakibagaw ma.