Read dyu Dɔnkiliw Ala ye kitabu 115 Bible Online

Dɔnkiliw Ala ye kitabu 115 - dyu bible

Dɔnkiliw Ala ye kitabu 115

¹Boɲa kana la anw kan, Masaba, a kana la anw kan fewu. Boɲa ka la e tɔgɔ le kan i ka ɲumanya n'i ka kantigiya kosɔn.

²Mun na siyaw be ɲiningali kɛ ko: «U ka Ala be min?»

³An ka Ala be sankolo la. Min y'a diya, a be o le kɛ.

⁴ Siya wɛrɛ nunu ka joow ye sanu ni warigwɛ ye. Mɔgɔw le y'u dilan.

⁵Daa b'u fɛ, u te se ka kuma. Ɲadenw b'u fɛ, u te se ka yeli kɛ.

⁶Tulo b'u fɛ, u te mɛnni kɛ. Nuun b'u fɛ, u te kasa mɛn.

⁷Bolo b'u fɛ, u te se ka foyi kɛ n'o ye. Seenw b'u fɛ, u te se ka taama. Kumakan te se ka bɔ u gɔnɔ na.

⁸Mɔgɔ minw y'u dilan, ani minw b'u yɛrɛ kalifa u ma, olu ka kɛ i ko joo nunu.

⁹Isirayɛlidenw, aw k'aw jigi la Masaba kan. Ale lo ye aw tangabaga n'aw dɛmɛbaga ye.

¹⁰Arɔn ka somɔgɔw, aw k'aw jigi la Masaba kan. Ale lo ye aw tangabaga n'aw dɛmɛbaga ye.

¹¹Aw minw be siran Masaba ɲa, aw k'aw jigi la a kan. Ale lo ye aw tangabaga n'aw dɛmɛbaga ye.

¹²Masaba hakili be an na, a bena koɲuman kɛ an ye. A bena Isirayɛlidenw ta ɲa, a bena barika don Arɔn ka somɔgɔw la.

¹³ Mɔgɔ minw be siran Masaba ɲa, a bena olu ta ɲa, mɔgɔkɔrɔbaw fara denmisɛnw kan.

¹⁴Masaba k'aw ka denbaya caya, ani aw deenw taw.

¹⁵Masaba ka barika don aw la, ale min ye sankolo ni dugukolo dan.

¹⁶Sankolo ye Masaba dama ta ye, a ye dugukolo di adamadenw ma.

¹⁷Suuw tena Masaba tanu. Minw tagara lahara, olu ten'a tanu!

¹⁸An b'a fɛ ka Masaba fo kudayi k'a ta sisan ma fɔɔ tuma bɛɛ. Masaba ka tanu.