Read dyu Dɔnkiliw Ala ye kitabu 118 Bible Online

Dɔnkiliw Ala ye kitabu 118 - dyu bible

Dɔnkiliw Ala ye kitabu 118

¹ Aw ka Masaba tanu, bari a ka ɲi, a ka ɲumanya te ban abada.

²Isirayɛlidenw k'a fɔ ko: «A ka ɲumanya te ban abada.»

³Arɔn ka somɔgɔw k'a fɔ ko: «A ka ɲumanya te ban abada.»

⁴Masaba ɲasiranbagaw k'a fɔ ko: «A ka ɲumanya te ban abada.»

⁵Ka ne to dusukasi la, ne ye Masaba daali, a ye ne jaabi, a ye ne wasa.

⁶ Masaba be ni ne ye, ne tena siran foyi ɲa. Adamadenw be se ka mun kɛ ne la?

⁷Masaba be ni ne ye, ne dɛmɛbaga lo. Ne bena n juguw bentɔ ye.

⁸K'i yɛrɛ kalifa Masaba ma, o ka fisa k'i jigi la adamaden kan.

⁹K'i yɛrɛ kalifa Masaba ma, o ka fisa k'i jigi la mɔgɔbaba kan.

¹⁰Siya wɛrɛw bɛɛ tun ye ne lamini. Masaba barika la, ne y'u halaki.

¹¹U tun ye ne lamini ka ne datugu. Masaba barika la, ne y'u halaki.

¹²U tun ye ne lamini i ko lidenw. U fagara i ko kala tasuma na. Masaba barika la, ne y'u halaki.

¹³Juguw tun ye ne ɲɔti janko n ka ben, nga Masaba ye ne dɛmɛ.

¹⁴ Masaba le be fanga di ne ma, a ye ne kisi.

¹⁵Nisɔndiyapɛrɛnkan ni hɔrɔnya ta be bɔra mɔgɔtilenninw ka soow kɔnɔ. Masaba be baara kɛra ni barika ye.

¹⁶Masaba kinibolo be sanfɛ. Masaba kinibolo be baara kɛra ni barika ye.

¹⁷Ne tena sa dɛ, ne be to nii na le, ka Masaba ka kɛtaw fɔ.

¹⁸Tiɲɛ na, Masaba ye ne ɲaa gwan, nga a ma ne faga.

¹⁹Aw ka Alabatoso dondaw yɛlɛ ne ye. Ne bena don ka Masaba bato.

²⁰Masaba ka donda filɛ. Mɔgɔtilenninw be don o yɔrɔ la.

²¹Ne bena e tanu, bari e ye ne jaabi, bari e kɛra ne Kisibaga ye.

²² Bonlɔlaw banna kabakuru min na, o nana kɛ kabakuru barikaman ye, boon nɔnkɔn ta.

²³O koo bɔra Masaba le fɛ, o kɛra kabako ye an ɲana.

²⁴Masaba le ye bii loon latigɛ. An ka ɲanagwɛ ka nisɔndiya.

²⁵ Masaba, e k'an kisi. Masaba, a kɛ an be see sɔrɔ.

²⁶ Mɔgɔ min be nana Masaba tɔgɔ la, Ala ka barika don o la. An bena duba kɛ i ye k'an to Masaba ka soo kɔnɔ.

²⁷Masaba ye Ala ye, a be yeelen bɔ an ye. Aw ka jama lajɛn, yiri furaburu ka kɛ bɛɛ bolo fɔɔ ka taga se sarakabɔyɔrɔ ma.

²⁸E ye ne ka Ala ye, ne bena e bato. Ne ka Ala, ne b'i tanu.

²⁹Aw ka Masaba bato bari a ka ɲi. A ka ɲumanya te ban abada.