Read dyu Dɔnkiliw Ala ye kitabu 119 Bible Online

Dɔnkiliw Ala ye kitabu 119 - dyu bible

Dɔnkiliw Ala ye kitabu 119

¹Mɔgɔ minw taamacogo ka ɲi, n'u be Masaba ka sariya bato, olu dagamunin lo.

²Mɔgɔ minw be Masaba ka kolatigɛninw kɛ, ani k'a ɲini n'u dusu bɛɛ ye, olu dagamunin lo.

³U te tilenbaliyako kɛ, u be Masaba ka sira taama.

⁴Masaba, e y'i ka sariyaw fɔ janko mɔgɔ k'u bato kosɔbɛ.

⁵Ne b'a fɛ n taamacogo ka tilen janko ne ka se k'i ka kolatigɛninw bato.

⁶Ka ne to u batoli la, ne tena maloya n'o ye.

⁷Ne bena e bato ni kɔnɔgwɛ ye, ka miiri i ka fɔta tilenninw la kosɔbɛ.

⁸Ne b'a fɛ k'i ka kolatigɛninw bato, e kana ne bila.

⁹Kanbelen be se k'a yɛrɛ saniya cogo di? A ka kan ka ele ka kuma bato.

¹⁰Ne be ele ɲinina ni n dusu bɛɛ ye. Kana ne to ne be faran ka bɔ e ka fɔta la abada.

¹¹Ne b'i ka fɔta mara n dusu la janko ne kana i hakɛ ta.

¹²Ne be barika la e ye, Masaba. Ne kalan e ka kolatigɛninw na.

¹³E daa ye minw fɔ, ne y'o bɛɛ fɔ ka tugu ɲɔgɔn kɔ.

¹⁴Ka tugu i ka fɔta kɔ, o be ne nisɔndiya. Ne be nisɔndiya i ko nafolo bɛɛ le be ne fɛ.

¹⁵Ne be miiri i ka fɔtaw la, ne ɲaa be i ka sira la.

¹⁶Ne be nisɔndiya i ka kolatigɛninw na. Ne te ɲinɛ i ka kuma kɔ.

¹⁷Masaba, koɲuman kɛ i ka baarakɛla ye janko n ka to nii na, k'i ka kuma bato.

¹⁸E ka ne ɲaa yɛlɛ janko ɲumanya min b'i ka sariya la, ne k'o lɔn.

¹⁹Ne ye lonan ye dugukolo kan. Kana i ka fɔta dogo ne la.

²⁰E ka fɔta koo be ne la tuma bɛɛ. O koo be ne dusu la kosɔbɛ.

²¹I ye dangatɔ yɛrɛboɲala nunu bagabaga, olu minw y'i ka fɔta bila.

²²E ka ne tanga lɔgɔbɔ ni dɔgɔya ma, bari ne b'i ka kolatigɛninw bato.

²³Hali ni ɲamɔgɔw ye ɲɔgɔnye kɛ ne kama, ne ye ele ka baarakɛla ye, ne be miiri e ka kolatigɛninw na dɔrɔn.

²⁴E ka fɔtaw ka di ne ye, ne ladifɛnw lo.

²⁵Ne be sara. Ne nii lakuraya ka kɛɲɛ n'i ka fɔta ye.

²⁶Ne ye n ka koo fɔ i ye, e ye ne jaabi. Ne kalan i ka kolatigɛninw na.

²⁷A to ne k'i ka kolatigɛninw faamu. O la, ne bena miiri i ka kobabaw la.

²⁸Dusukasi y'a to ne be kasi, ne dɛmɛ i ka fɔta kosɔn.

²⁹Namara sira yɔrɔ jaɲa ne la. Ne dɛmɛ k'i ka sariya bato.

³⁰Ne ye tiɲɛsira le ta. Ne be taama ka kɛɲɛ n'i ka fɔta ye.

³¹Ne be nɔrɔ i ka fɔta la, kan'a to ne be maloya, Masaba.

³²Ne b'i ka fɔta sira taama, bari i be hakili di ne ma.

³³Masaba, e ka kolatigɛninw tɛmɛsira yira ne la janko ne k'u bato fɔɔ a daan na.

³⁴Hakilitigiya di ne ma janko ne k'i ka sariya bato k'a mara ni n dusu bɛɛ ye.

³⁵Masaba, a to ne k'i ka fɔta sira taama, o le ka di ne ye haali.

³⁶A to ne ka miiri ka to i ka sariyaw la ka tɛmɛ ne yɛrɛ ka tɔnɔ ɲini kan.

³⁷Masaba, fɛɛn fufafu koo bɔ ne hakili la. A to ne k'i sago kɛ.

³⁸E ye layidu min ta i ɲasiranbagaw ye, e k'o dafa i ka baarakɛla faan fɛ.

³⁹Ne be siran dɔgɔya ɲa, i ka ne tanga o ma, bari e ka fɔta ka ɲi.

⁴⁰E ka kolatigɛninw nigɛ be ne la. A to ne ka to sii la i ka tilenninya kosɔn.

⁴¹Masaba, ɲumanya kɛ ne ye tugu, ne kisi ka kɛɲɛ n'i ka layidu ye.

⁴²O la, ne bena se ka n dɔgɔyabaga jaabi, bari ne jigi be i ka kuma kan.

⁴³Kan'a to tiɲɛkuma ka ban n daa la fewu. Ne be n jigi la i ka fɔtaw le kan.

⁴⁴Ne bena i ka sariya bato tuma bɛɛ, ne ben'a bato kudayi.

⁴⁵Ne bena to hɛrɛ la, bari ne ka hami ye i ka fɔtaw batoko ye.

⁴⁶Ne bena e ka sariya koo fɔ masaw ye, ne tena maloya fana.

⁴⁷E ka fɔta le ka di ne ye, ne b'i ka fɔta kanu.

⁴⁸Ne b'i ka fɔtaw boɲa, u koo ka di ne ye. Ne bena miiri i ka sariyaw la.

⁴⁹I hakili to i ka layidu la e ka baarakɛla faan fɛ, min ye jigi di ne ma.

⁵⁰O le be ne jigi tugu sɛgɛntuma na, bari ne be to sii la e ka layidu barika la.

⁵¹Yɛrɛboɲalaw ye ne lɔgɔbɔ, o bɛɛ n'a ta, ne ma i ka sariya cɛn.

⁵²Masaba, ni ne hakili jigira i ka kitiw la waati tɛmɛnin na, o be ne jigi tugu.

⁵³Ne dimina kosɔbɛ mɔgɔjuguw kɔrɔ, minw be ban i ka sariya la.

⁵⁴Ka n to n ka lonanya la soo kɔnɔ, e ka kolatigɛninw kɛra dɔnkiliw ye ne daa la.

⁵⁵Sufɛ, ne hakili be i la, ne b'i ka sariya bato.

⁵⁶I ka fɔtaw batoko be ne nisɔndiya.

⁵⁷Masaba, ne niyɔrɔ ye min ye, o ye k'i ka kuma bato.

⁵⁸Ne b'i daali ni n dusu bɛɛ ye. Ne dɛmɛ i ka layidu kosɔn.

⁵⁹Ne ye n taamacogo sɛgɛsɛgɛ. Ne b'a fɛ ka segi i ka fɔtaw ma.

⁶⁰Ne be banba k'i ka fɔtaw bato.

⁶¹Mɔgɔjuguw ye ne minɛ u ka jaanw kɔnɔ, nga ne hakili ma bɔ e ka sariya kɔ.

⁶²Ne be wili dugutilama k'i bato, ne b'o kɛ e ka kiti tilennin kosɔn.

⁶³E ɲasiranbagaw ani minw b'i ka fɔtaw bato, olu le ye ne taamaɲɔgɔnw ye.

⁶⁴Masaba, e ka ɲumanya be dugukolo faan bɛɛ la. E ka ne kalan i ka kolatigɛninw na.

⁶⁵Masaba, e ye koɲuman kɛ i ka baarakɛla ye ka kɛɲɛ n'i ka kuma ye.

⁶⁶Ne kalan ne ka kɛ kolɔnbaga ye, ne ka se ka fɛɛnw bɔ ɲɔgɔn na, bari ne lanin b'i ka sariya la.

⁶⁷Sanni tɔɔrɔ ka se ne ma, ne tun filila. Sisan ne b'i ka kuma batora.

⁶⁸E ka ɲi, i be koɲuman kɛ, ne kalan i ka kolatigɛninw na.

⁶⁹Yɛrɛboɲalaw ye ne tɔgɔ cɛn n'u ka galonw ye. Ne b'i ka fɔtaw bato ni n dusu bɛɛ ye.

⁷⁰U hakili ka dɔgɔ, u te faamuyali kɛ. Nga ne kɔni, e ka sariya le koo ka di ne ye.

⁷¹Ne ka tɔɔrɔ ɲana ne ma, o y'a to ne b'i ka kolatigɛninw lɔn.

⁷²E ye sariya min di, o ka fisa ne fɛ ka tɛmɛ sanu ni warigwɛ caaman kan.

⁷³Ele le ye ne labɛn n'i bolo ye ka n dan. Hakili di ne ma janko n k'i ka fɔta faamu.

⁷⁴E ɲasiranbagaw mana ne ye, u be nisɔndiya, bari ne jigi b'i ka kuma kan.

⁷⁵Ne y'a lɔn ko e ka kiti tilennin lo, Masaba. I ye ne ɲaa gwan, tiɲɛ tun b'i fɛ k'o kɛ.

⁷⁶Masaba, e ka ɲumanya ka ne jigi tugu. O kɛ i ka baarakɛla ye ka kɛɲɛ n'i ka layidu ye.

⁷⁷E ka makari ne la janko ne ka to sii la, bari i ka sariya koo ka di ne ye.

⁷⁸Yɛrɛboɲala minw be ne tɔɔrɔ gwansan, a to olu ka maloya. Ne kɔni, ne be miiri i ka fɔtaw la.

⁷⁹E ɲasiranbagaw ka na ne fɛ k'i ka fɔtaw lɔn.

⁸⁰Ne b'a fɛ k'i ka fɔtaw bato ni n dusu bɛɛ ye janko ne kana maloya.

⁸¹Ne sigɛnna i ka kisili makɔnɔli la. Nga ne jigi b'i ka kuma kan.

⁸²Ne ɲaa sigɛnna i ka layidu ɲanafilɛ la. Ne ko: «E bena ne jigi tugu tuma jumɛn?»

⁸³Ne te foyi ɲa tugu i ko dagakolon, nga ne te ɲinɛ e ka kolatigɛninw kɔ.

⁸⁴E ka baarakɛla sii tileda tora joli? E ben'a tɔɔrɔbagaw kiti tuma jumɛn?

⁸⁵Yɛrɛboɲalaw ye dingɛw sogi ne ɲa. E ka sariya do ma sɔn o ma.

⁸⁶E ka fɔtaw bɛɛ ye tiɲɛ ye. U be ne tɔɔrɔla gwansan, ne dɛmɛ.

⁸⁷A tun tora dɔɔni, ne tun be sa. Ne kɔni, ne ma ban e ka fɔtaw la.

⁸⁸E ka ɲumanya kosɔn, a to ne be to sii la janko ka se ka e ka fɔtaw bato.

⁸⁹Masaba, e ka kuma be yen kudayi. A be sankolo kɔnɔ tuma bɛɛ.

⁹⁰E ye kantigi ye waati bɛɛ. E ye dugukolo sigi ka ɲa, a tora yen.

⁹¹Fɛɛn bɛɛ be yen bii e ka fɔta barika la, bari fɛɛn bɛɛ be baara kɛra e ye.

⁹²N'i ka sariya koo tun man di ne ye, ne tun bena to tɔɔrɔ la.

⁹³Ne tena ɲinɛ i ka fɔtaw kɔ fewu. Ne nii be lakuraya olu le sababu la.

⁹⁴Ne y'i ta ye, ne kisi, bari n be hami i ka fɔtaw la.

⁹⁵Mɔgɔjuguw be ne fagayɔrɔ le ɲinina, nga ne be janto i ka fɔtaw la kosɔbɛ.

⁹⁶Ne ɲaa b'a la ko daan be koo bɛɛ la, nga daan te e ka fɔtaw la.

⁹⁷E ka sariya koo ka di ne ye haali. Loon o loon ne be miiri a la.

⁹⁸E ka fɔta be barika don ne la ka tɛmɛ n juguw kan, bari o be to ne hakili la tuma bɛɛ.

⁹⁹Ne be koo lɔn ka tɛmɛ n kalanfaw kan, bari ne be miiri i ka kuma na kosɔbɛ.

¹⁰⁰Lɔnniya be ne la ka tɛmɛ cɛkɔrɔbaw kan, bari ne b'i ka kuma bato.

¹⁰¹Ne be ban kojugu ma janko n ka se k'i ka kuma bato.

¹⁰²Ne te ban e ka fɔtaw la, bari ele le be ne kalanna.

¹⁰³E ka layidu ka di ne ye, o ka di ka tɛmɛ lii kan.

¹⁰⁴Ne be kɛ hakilitigi ye i ka fɔtaw sababu la. Nanbarako si man di ne ye abada.

¹⁰⁵E ka kuma kɛra fitinɛ ye ne seen kɔrɔ, a be yeelen bɔ ne ka sira kan.

¹⁰⁶Ne ye layidu min ta ko n bena i ka fɔtaw bato, ne bena o dafa.

¹⁰⁷Ne ye dɔgɔya sɔrɔ kosɔbɛ. Masaba, ne nii lakuraya i ko i y'a fɔ cogo min na.

¹⁰⁸Masaba, ne ka daalili minɛ i ko boɲafɛn. Ne kalan i ka fɔtaw la.

¹⁰⁹Ne be farati la tuma bɛɛ, nga ne te ɲinɛ i ka sariya kɔ.

¹¹⁰Mɔgɔjuguw y'u ka jaanw la ne ɲa, nga ne tena n yɔrɔ jaɲa i ka fɔtaw la.

¹¹¹E ka fɔtaw le ye ne niyɔrɔ ye kudayi. Tiɲɛ na, o le be ne nisɔndiya.

¹¹²Ne bena i ka kolatigɛninw bato. Ne bena u bato fɔɔ a laban.

¹¹³Mɔgɔ kɔnɔ fila koo man di ne ye. E ka sariya koo ka di ne ye.

¹¹⁴Ne tangabaga ni n dogoyɔrɔ ye ele le ye. N jigi b'i ka kuma kan.

¹¹⁵Mɔgɔjuguw, aw ka bɔ ne ɲa janko ne ka n ka Ala ka fɔta bato.

¹¹⁶Ne dɛmɛ ka kɛɲɛ ni e ka layidu ye janko n be to sii la. Kana ne maloya n ka jigi koo la.

¹¹⁷Ne dɛmɛ janko ne ka kisi, ne ɲaa ka to e ka kolatigɛninw kan.

¹¹⁸Mɔgɔ minw banna e ka kolatigɛninw na, i ye olu gwɛn. Bari u ka namara te foyi ɲa.

¹¹⁹E be mɔgɔjuguw fili sunugu kan, o la, e ka fɔtaw koo ka di ne ye.

¹²⁰E ɲasiranya be ne yɛrɛyɛrɛ. Ne be siran e ka kiti ɲa.

¹²¹Ne be tiɲɛko ni kotilenninw le kɛ. Kana ne don n tɔɔrɔbagaw bolo.

¹²²A yira ne la ka gwɛ ko a bena laban ka ɲa. Kan'a to yɛrɛboɲalaw ka ne tɔɲɔ.

¹²³E tun ye dɛmɛ ni kisili layidu min ta, ne ɲaa sigɛnna o ɲanafilɛ la.

¹²⁴E ka ɲumanya kɛ i ka baarakɛla ye. E ka ne kalan i ka kolatigɛninw na.

¹²⁵Ne ye i ka baarakɛla ye, e ka ne sɔn hakili la janko ne ka se k'i ka fɔtaw faamu.

¹²⁶Masaba, waati sera, fɔɔ e ka dɔ kɛ, u b'i ka sariya cɛnna.

¹²⁷E ka fɔtaw ka di ne ye haali. U ka di n ye ka tɛmɛ sanu kan, hali sanu yɛrɛyɛrɛ.

¹²⁸E ka fɔtaw bɛɛ tilennin lo ne fɛ. Galon koo si man di ne ye.

¹²⁹E ka fɔtaw ka ɲi kosɔbɛ, o la, ne b'u bato.

¹³⁰E ka kuma lɔnni be yeelen bɔ, a be hakilitigiya di kolɔnbaliw ma.

¹³¹E ka kuma nigɛ be ne la. U nigɛ be ne la haali.

¹³²I ɲaa yɛlɛma ne faan fɛ ka makari ne la, i ko i be deli k'a kɛ cogo min na i kanubagaw ye.

¹³³Ne jaa gwɛlɛya n'i ka fɔtaw ye. Kan'a to kojugu ka se ne kɔrɔ.

¹³⁴Ne bɔsi n tɔɔrɔbagaw bolo janko ne ka e ka fɔtaw bato.

¹³⁵I ka baarakɛla minɛ ka ɲa. Ne kalan i ka kolatigɛninw na.

¹³⁶Ne be kasi ka ɲaji woyo, bari u te e ka sariya batora.

¹³⁷Masaba, e tilennin lo, i ka kitiw tilennin lo.

¹³⁸I y'i ka sariyaw sigi ni tilenninya ye. I y'o kɛ ni kantigiya ye.

¹³⁹Ne man'a ye ko n juguw ɲinɛna e ka kuma kɔ, n dusu be dimi kosɔbɛ.

¹⁴⁰E ka koo latigɛnin bɛɛ be kɛ. O ka di ne, e ka baarakɛla ye.

¹⁴¹Ne ka dɔgɔ, n kɛra lɔgɔbɔfɛn ye, nga ne te ɲinɛ e ka fɔtaw kɔ.

¹⁴²E ka tilenninya te banta ye. E ka sariya ye tiɲɛ ye.

¹⁴³Dusukasi ni hakiliɲagami ye ne sɔrɔ, nga e ka fɔtaw ye ne nisɔndiya.

¹⁴⁴E ka fɔtaw tilennin lo tuma bɛɛ. A kɛ ne k'o faamu janko ne ka to sii la.

¹⁴⁵Masaba, ne y'i daali ni n dusu bɛɛ ye, e ka ne jaabi janko n k'i ka kolatigɛninw bato.

¹⁴⁶Ne b'i daali, ne kisi janko ne ka se k'i ka landaw bato.

¹⁴⁷Ne be kɔn dugugwɛ ɲa k'i daali. Ne jigi b'i ka kuma kan.

¹⁴⁸Ne be suu bɛɛ kɛ, ne te sinɔgɔ, janko ka miiri i ka kuma na.

¹⁴⁹Masaba, e ka ɲi, ne lamɛn. Ne nii lakuraya ka kɛɲɛ n'i ka latigɛta ye.

¹⁵⁰Ne tɔɔrɔbagaw be gwɛrɛla namara la. U y'u yɔrɔ jaɲa i ka sariya la.

¹⁵¹Masaba, e yɔrɔ ka surun ne la. E ka fɔta bɛɛ ye tiɲɛ ye.

¹⁵²Ne y'a lɔn kabini tumajan ko e ka fɔtaw ye waati bɛɛ ta ye.

¹⁵³Masaba, ne sigɛnnin filɛ, ne kisi, bari ne te ɲinɛ e ka sariya kɔ.

¹⁵⁴Ne dɛmɛ ka n bɔsi. Ne nii lakuraya ka kɛɲɛ n'i ka layidu ye.

¹⁵⁵Kojugukɛlaw tena kisi, bari u te e ka kolatigɛninw bato.

¹⁵⁶Masaba, e ka makari ka bon. Ne nii lakuraya ka kɛɲɛ n'i ka sariyaw ye.

¹⁵⁷Ne tɔɔrɔbagaw ni ne juguw ka ca, nga ne ma ban i ka latigɛta la.

¹⁵⁸Ne ɲaa mana la janfaciw kan, minw t'i ka kuma bato, u nigɛ be bɔ ne la.

¹⁵⁹Masaba, e yɛrɛ k'a filɛ e ka fɔtaw koo ka di ne ye cogo min na. E ka koɲuman kosɔn, ne to nii na.

¹⁶⁰E ka kuma bɛɛ ye tiɲɛ ye cogo bɛɛ la, e ka fɔta tilenninw be yen kudayi.

¹⁶¹Ɲamɔgɔw ye ne tɔɔrɔ gwansan, nga ne te siran foyi ɲa i ka kuma kɔ.

¹⁶²Ne be nisɔndiya e ka kuma kosɔn i ko mɔgɔ min ye nafolo caaman sɔrɔ.

¹⁶³Galon koo man di ne ye, ne b'o kɔniya. E ka sariya koo le ka di ne ye.

¹⁶⁴Ne b'i tanu siɲɛ wolonwula loon kelen kɔnɔ e ka kotilennin latigɛninw kosɔn.

¹⁶⁵E ka sariya koo ka di mɔgɔ minw ye, olu ka hɛrɛ ka ca. Foyi fana t'a kɛ u be talon.

¹⁶⁶Masaba, ne jigi be i ka kisili kan. Ne b'i ka fɔtaw bato.

¹⁶⁷Ne b'i ka fɔtaw bato. U koo ka di ne ye kosɔbɛ.

¹⁶⁸Ne b'i ka fɔtaw n'i ka latigɛta bato, bari ne ka kɛta be i ɲakɔrɔ.

¹⁶⁹Masaba, a to ne ka daalili ka don i tulo la. Ne sɔn hakili la ka kɛɲɛ n'i ka kuma ye.

¹⁷⁰Ne daalikan lamɛn. Ne bɔsi ka kɛɲɛ n'i ka layidu ye.

¹⁷¹A to ne k'i tanu, bari i be ne kalan i ka kolatigɛninw na.

¹⁷²Ne k'i ka kuma la dɔnkili la, bari e ka fɔtaw tilennin lo.

¹⁷³E ka ne dɛmɛ, bari ne b'i ka fɔtaw bato.

¹⁷⁴Masaba, ne kisi, o le ye n ka miiriya ye. E ka sariya le koo ka di ne ye.

¹⁷⁵A kɛ ne ka to sii la ka e tanu. I ka fɔtaw ka ne dɛmɛ.

¹⁷⁶Ne tununa i ko saga. E k'i ka baarakɛla yaala, bari ne te ɲinɛ e ka fɔta kɔ.