Read dyu Dɔnkiliw Ala ye kitabu 135 Bible Online

Dɔnkiliw Ala ye kitabu 135 - dyu bible

Dɔnkiliw Ala ye kitabu 135

¹Aw ka Masaba tanu! Aw k'a tanu, a ka baarakɛlaw,

²aw minw b'a ka soo kɔnɔ, aw minw b'an ka Ala ka luu kɔnɔ.

³Aw ka Masaba tanu, bari a ka ɲi. Aw k'a tanu ni fɔlikɛminanw ye, bari a ka koo ka di.

⁴Masaba ye Isirayɛlidenw woloma ka kɛ a yɛrɛ ta ye.

⁵Tiɲɛ na, ne y'a lɔn ko Masaba ka bon, ko an ka Matigi tɛmɛna batofɛn tɔw bɛɛ kan.

⁶Masaba be fɛɛn min fɛ, a b'o le kɛ. A b'o le kɛ sankolo la ani dugukolo kan. A b'o le kɛ kɔgɔji kɔnɔ ani dingɛbabaw bɛɛ la.

⁷A b'a kɛ sankabaw be wili fɔɔ diɲɛ daan na. A b'a kɛ san be manamana, sanji be na. A b'a kɛ fɔɲɔ be ci ka bɔ a marayɔrɔ la.

⁸Ale lo ye Ezipitikaw deen fɔlɔw faga, k'a ta adamadenw ta ma fɔɔ ka se begɛnw ta ma.

⁹A ye taamasiɲɛw ni kabakow kɛ Ezipiti jamana kɔnɔ. A y'o kɛ *Faraŋɔn n'a ka baarakɛlaw bɛɛ la.

¹⁰A ye siya wɛrɛ caaman halaki, ka masacɛ barikatigiw faga,

¹¹minw ye amoriw ka masa Siŋɔn ni *Basan masacɛ Ɔgi ye, ani Kanaankaw ka masaw bɛɛ.

¹²A y'u ka jamana di a ka mɔgɔw ma. A y'a di a ka jama Isirayɛli ma.

¹³Masaba, e tɔgɔ be yen kudayi. Waati nata bɛɛ mɔgɔw hakili bena to i la.

¹⁴Tiɲɛ na, Masaba ben'a ka jama ka koo ɲanabɔ. A bena makari a ka baarakɛlaw la.

¹⁵ Siya wɛrɛw ka joow dilannin be ni sanu ye, dɔw dilanna ni warigwɛ ye. Adamaden bulonɔ lo.

¹⁶Daa b'u fɛ, u te se ka kuma, ɲaa b'u fɛ, u te yeli kɛ.

¹⁷Tulo b'u fɛ, u te mɛnni kɛ. U te se ka ninakili.

¹⁸U n'u lalagabagaw ye kelen ye, ani minw bɛɛ jigi b'u kan.

¹⁹Isirayɛlidenw, aw ka barika la Masaba ye. Arɔn deenw, aw ka barika la a ye.

²⁰Levi kɔmɔgɔw, aw ka barika la Masaba ye. Aw minw be siran Masaba ɲa, aw ka barika la a ye.

²¹Barika ka la Masaba ye kabini *Siyɔn, ale min sigiyɔrɔ be Zeruzalɛmu. Aw ka Masaba tanu.