Read dyu Dɔnkiliw Ala ye kitabu 138 Bible Online

Dɔnkiliw Ala ye kitabu 138 - dyu bible

Dɔnkiliw Ala ye kitabu 138

¹Dawuda ka dɔnkili dɔ. Ne b'i bato ni n dusu bɛɛ ye. Ne b'i tanu sankololafɛnw ɲakɔrɔ.

²Ne be n kunbiri gwan i ka soo kɔnɔ k'i bato i ka ɲumanya n'i ka tiɲɛ kama, bari e y'i ka layidu dafa fɔɔ ka tɛmɛ an ka laɲinitaw kan.

³Tuma min na ne y'i daali, i ye ne jaabi. I ye ne jigi tugu, barika sɔrɔla.

⁴Masaba, ni dugukolo kan masaw y'i ka kuma mɛn, u bɛɛ bena i tanu.

⁵U bena dɔnkili la Masaba sago la, bari a ka sebagaya ka bon.

⁶Masaba, i be sanfɛ, nga i ɲaa be yɛrɛmajigilenw na. I be yɛrɛboɲalaw lɔn yɔrɔjan.

⁷Hali ni ne be dusukasi la, e b'a kɛ n be to nii na, e ka fanga be ne kisi. E b'a kɛ n juguw ka dimi be to u la.

⁸Masaba ben'a kɛ ne ka koow bɛɛ be laban ka ɲa. E ka ɲumanya te ban abada. E ye fɛɛn minw dan, Masaba, kana o to.