Read dyu Dɔnkiliw Ala ye kitabu 139 Bible Online

Dɔnkiliw Ala ye kitabu 139 - dyu bible

Dɔnkiliw Ala ye kitabu 139

¹Dɔnkililabagaw kuntigi ka dɔnkili. Dawuda ka dɔnkili dɔ. Masaba, i be ne sɛgɛsɛgɛ ka ne ka koo lɔn.

²I be ne latuma ni n wilituma kala ma. I be n ka miiriyaw lɔn kabini tumajan.

³Ni ne be baara kɛra, walima ni ne be lafiɲɛna, i be n ka kɛtaw bɛɛ kala ma.

⁴Yanni kuma fitini yɛrɛ ka bɔ n daa la, ele Masaba b'o kala ma ka ban.

⁵I be ne kɔ, i be ne ɲa, e ye n tanga n'i ka sebagaya ye.

⁶O lɔnniya sifa ka bon ne ma, ne te se k'a faamu.

⁷Ne bena taga min ka n yɔrɔ jaɲa e la? Ne bena boli ka taga min ka bɔ i ɲakɔrɔ?

⁸Ni ne tagara sankolo kɔnɔ, e b'o yɔrɔ la. Ni ne tagara lahara fana, e b'o yɔrɔ la.

⁹Ni ne ye gamanw sɔrɔ ka pan ka taga sɔgɔma kɛnɛ ciyɔrɔ faan na, walima ka taga to tileben fɛ,

¹⁰ka n to o yɔrɔ la, i be sira yira ne la. I bolo te n to fewu.

¹¹Ni ne ko n bena to dibi kɔnɔ, tilefɛla ka yɛlɛma ka kɛ sufɛ ye,

¹²dibi do finnin te ele fɛ, sufɛla ye yeelen ye i fɛ i ko tilefɛla, dibi be i ko yeelen i fɛ.

¹³Ele le ye ne dan, ele le ye ne dilan n baa kɔnɔ.

¹⁴Ne kɛra danfɛn kabakoman ye, n b'i fo o la. E ka danfɛnw bɛɛ ye kabakow ye, i be ne lɔn cogo bɛɛ la.

¹⁵Ne fari cogo te dogo i ma, ne dantuma na e fɛ, yɔrɔdogonin na, ne lalagatuma na e fɛ n bamuso kɔnɔ.

¹⁶Ne tun ma kɛ foyi ye fɔlɔ, e ɲaa tun be ne la. Ne ka tileda tun sɛbɛnna ka ban i fɛ, sɛbɛ kɔnɔ, k'a sɔrɔ o loon nunu tun ma daminɛ fɔlɔ.

¹⁷Ala, ne te se k'i ka kolatigɛninw lɔn, u ka ca haali!

¹⁸Ni ne ko n b'u jati minɛ, u ka ca ni cɛncɛn ye. Ni ne kununna tuma o tuma, i be yen.

¹⁹Ala, ni e tun b'a kɛ mɔgɔjugu ka sa! Mɔgɔfagalaw, aw yɔrɔ ka jaɲa ne la!

²⁰U be kokolonw fɔ i kama, u be kumajugu fɔ k'i tɔgɔ cɛn.

²¹Masaba, minw banna i ta ma, olu koo ka go ne ye. I koo man di minw ye, olu fana koo man di ne ye.

²²U koo ka go ne ye kosɔbɛ, u kɛra ne juguw yɛrɛ ye.

²³Ala, ne sɛgɛsɛgɛ ka ne kɔnɔnakow lɔn. Ne kɔrɔbɔ ka ne ka haminakow lɔn.

²⁴A filɛ ni ne be sirajugu kan. Ne bila i ka sira kan tuma bɛɛ.