Read dyu Dɔnkiliw Ala ye kitabu 142 Bible Online

Dɔnkiliw Ala ye kitabu 142 - dyu bible

Dɔnkiliw Ala ye kitabu 142

¹ Dawuda ka dɔnkili dɔ tuma min na a tun be farawo kɔnɔ.

²Ne be kasira Masaba kɔ. Ne be n kaan kɔrɔta k'a daali.

³Ne be n kɔnɔnako fɔ a ye. Ne be n ka dusukasiko fɔ a ye.

⁴Masaba, ni ne barika banna, ele be ne taayɔrɔ lɔn. Ne be tɛmɛ ni sira min ye, u ye jaan la o kan.

⁵E ka filɛli kɛ kinibolo fɛ, mɔgɔ si ma janto ne la. Dogoyɔrɔ te ne la cogo si la, mɔgɔ si te hami ne ka koo la.

⁶Masaba, ne be ele le daalila. Ne ko: Ele le ye ne dogoyɔrɔ ye, ele le ye ne ka fɛnɲuman ye diɲɛ kɔnɔ.

⁷Ne ka daalili mɛn, bari ne barika banna. Ne bɔsi n gwɛnbagaw bolo, bari u barika ka bon ni ne ye.

⁸Ne bɔ n ka degun la, janko n k'i bato. N'i ye koɲuman kɛ ne ye tuma min na, mɔgɔtilenninw bena na ne lamini.