Read dyu Dɔnkiliw Ala ye kitabu 145 Bible Online

Dɔnkiliw Ala ye kitabu 145 - dyu bible

Dɔnkiliw Ala ye kitabu 145

¹Dawuda ka barikala dɔnkili dɔ. Ne bena ele tanu, ne ka Masacɛ ni n ka Ala. Ne bena barika la i ye tuma bɛɛ.

²Ne bena barika la i ye loon bɛɛ, ne bena i tanu tuma bɛɛ.

³Masaba ka bon, a ka kan ni tanuli ye kosɔbɛ. Daan t'a ka boɲa na.

⁴*Filankuru kelen kelen bɛɛ b'i ka kɛtaw lakali ɲɔgɔn ye. U b'i ka kɛwaliw fɔ.

⁵U bena i ka nɔɔrɔ n'i ka sebagaya fɔ. Ne bena miiri i ka kɛwali kabakomanw la.

⁶U bena i ka setigiya kabakomanw fɔ. Ne bena e ka boɲa fɔ.

⁷U hakili bena to i ka koɲumanw na, k'o fɔ. U bena i ka tilenninya fɔ.

⁸Masaba be makari, a be hinɛ. A te dimi joona, a ka ɲi kosɔbɛ.

⁹Masaba ka ɲumanya be se bɛɛ ma. A ka makari be se a ka danfɛnw bɛɛ ma.

¹⁰Masaba, e ka danfɛnw bɛɛ bena e tanu. E ka jama bena barika la e ye.

¹¹U bena i ka masaya boɲa fɔ, u fana bena e ka sebagaya fɔ.

¹²U bena i ka kɛtaw yira adamadenw na, k'i ka masaya dawula n'a boɲa fɔ.

¹³E ka masaya ye waati bɛɛ ta ye. E ka kuntigiya bena kɛ waati nata mɔgɔw bɛɛ kan.

¹⁴Masaba, e ka benbagaw bɛɛ dɛmɛ. Minw jɛngɛna, i k'olu tilen.

¹⁵Bɛɛ ɲaa be ele le kan, ele le b'u ka dumuni d'u ma a waati la.

¹⁶E b'i tigɛ yɛlɛ, i be nimanfɛnw bɛɛ wasa.

¹⁷Masaba ka koo bɛɛ tilennin lo. A ka ɲi a ka kɛwaliw bɛɛ la.

¹⁸Masaba b'a daalibagaw gɛrɛfɛ, minw b'a daali ni tiɲɛ ye.

¹⁹A b'a ɲasiranbagaw diyanako kɛ. A b'u kasikan mɛn k'u kisi.

²⁰A koo ka di mɔgɔ minw bɛɛ ye, a b'olu mara, nga a bena mɔgɔjuguw halaki.

²¹Ne bena Masaba tanu. Nimanw bɛɛ bena barika la a ye tuma bɛɛ.